Філарэт (Вахрамееў)

Філарэ́т (свецкае імя Кіры́л Варфаламе́евіч Вахраме́еў; 21 сакавіка 1935, Масква — 12 студзеня 2021, Мінск) — праваслаўны царкоўны дзеяч Беларусі, іерарх Рускай праваслаўнай царквы, прадстаяцель Беларускай Праваслаўнай Царквы (1978—2013), мітрапаліт, патрыяршы экзарх усяе Беларусі (1989—2013). Дэпутат Вярхоўнага Савета БССР і Вярхоўнага Савета Рэспублікі Беларусь (1990—1995).

Мітрапаліт Філарэт (Вахрамееў)
Мітрапаліт Мінскі і Слуцкі, Патрыяршы Экзарх усяе Беларусі 10 кастрычніка 1978 — 25 снежня 2013
Царква	Руская праваслаўная царква
Папярэднік	Антоній (Мельнікаў)
Пераемнік	Павел (Панамароў)
4-ы Старшыня Аддзела знешніх царкоўных зносін Маскоўскага Патрыярхата 14 красавіка 1981 — 13 лістапада 1989
Царква	Руская праваслаўная царква
Папярэднік	Ювяналій (Паяркаў)
Пераемнік	Кірыл (Гундзяеў)
Мітрапаліт Берлінскі і Сярэднееўрапейскі 18 красавіка 1973 — 10 кастрычніка 1978
Папярэднік	Лявонцій (Гудзімаў)
Пераемнік	Мелхіседэк (Лебядзеў)
Епіскап Дзмітраўскі, вікарый Маскоўскай епархіі 14 мая 1966 — 18 красавіка 1973
Папярэднік	Філарэт (Дзенісенка)
Пераемнік	Уладзімір (Сабадан)
Епіскап Ціхвінскі, вікарый Ленінградскай епархіі 24 кастрычніка 1965 — 14 мая 1966
Папярэднік	Антоній (Дзямянскі)
Пераемнік	Міхаіл (Мудзьюгін)
Адукацыя	Маскоўская духоўная акадэмія (1961) Маскоўская духоўная семінарыя[d] (1957)
Навуковая ступень	кандыдат багаслоўя[d]
Дзейнасць	праваслаўны святар
Нараджэнне	21 сакавіка 1935(1935-03-21) Масква, СССР
Смерць	12 студзеня 2021(2021-01-12) (85 гадоў) Мінск, Беларусь
Пахаванне	Жыровіцкі манастыр
Бацька	Варфаламей Аляксандравіч Вахрамееў[d]
Маці	Аляксандра Фёдараўна (у дзявоцтве Смірнова)
Прыняцце свяшчэннага сану	26 красавіка 1959
Прыняцце манаства	3 красавіка 1959
Епіскапская хіратонія	24 кастрычніка 1965
Аўтограф
Узнагароды	Ордэн Айчыны 3 ступені, Беларусь Ордэн Пашаны, Беларусь Ордэн Дружбы народаў, Беларусь Ордэн «За заслугі перад Айчынай» IV ступені Камандор ордэна Заслуг перад Рэспублікай Польшча Ордэн «За заслугі» ІІІ ступені Канфесійныя ордэны: Ордэн Святога роўнаапостальнага вялікага князя Уладзіміра I ступені, РПЦ Ордэн Святога роўнаапостальнага вялікага князя Уладзіміра II ступені (РПЦ) Ордэн святога дабравернага князя Данііла Маскоўскага I ступені Ордэн свяціцеля Інакенція, мітрапаліта Маскоўскага і Каломенскага I ступені Ордэн прападобнага Сергія Раданежскага I ступені Ордэн Святога прападобнага Серафіма Сароўскага I ступені Ордэн прападобнага Андрэя Рублёва I ступені
Медыяфайлы на Вікісховішчы

У Вікіпедыі ёсць артыкулы пра іншых людзей з прозвішчам Філарэт.

Біяграфія

Нарадзіўся 21 сакавіка 1935 года ў Маскве. Царкоўнае служэнне пачаў у 1954 годзе іпадыяканам Патрыярха Маскоўскага і ўсяе Русі Аляксія.

У 1957 годзе скончыў Маскоўскую духоўную семінарыю, потым у 1961 годзе — Маскоўскую духоўную акадэмію.

У 1959 годзе ў Троіца-Сергіевай лаўры прыняў манаства з імем у гонар святога Філарэта Літасцівага і ў 1961 годзе быў пасвячоны ў іераманаха. Дата хіратоніі: 24 кастрычніка 1965 года.

З 1965 года — епіскап Ціхвінскі, у 1966—73 гадах — епіскап Дзмітраўскі, рэктар МДА і семінарыі. У 1971 годзе ўзведзены ў сан архіепіскапа, з 15 красавіка 1975 — мітрапаліта. Мітрапаліт Берлінскі і Сярэднееўрапейскі да 1978 года.

У 1978 годзе Філарэт быў назначаны Мітрапалітам Мінскім і Беларускім, адначасова да 1984 займаў пасаду Патрыяршага Экзарха Заходняй Еўропы. Старшыня Аддзела знешніх царкоўных зносін Маскоўскага Патрыярхата з 1981 да 1989 год. З 1989 года — Мітрапаліт Мінскі і Гродзенскі, Патрыяршы Экзарх усяе Беларусі, пастаянны член Свяшчэннага Сінода.

З 1990 па 1995 — дэпутат Вярхоўнага Савета БССР, затым Вярхоўнага Савета Рэспублікі Беларусь. Са студзеня па снежань 1991 года — народны дэпутат СССР. У Вярхоўным Савеце быў старшынёй камісіі дэпутацкай этыкі. Апекаваўся праграмамі дапамогі ахвярам Чарнобыльскай катастрофы.

У 1992—2013 гадах быў Мітрапалітам Мінскім і Слуцкім, Патрыяршым Экзархам усяе Беларусі, свяшчэнна-архімандрытам Свята-Успенскага Жыровіцкага манастыра. Займаўся стварэннем і разбудовай Беларускай Праваслаўнай Царквы, якая атрымала сваю разгалінаваную структуру, але захавала падпарадкаванне Маскоўскагу Патрыярхату. У Беларусі былі адроджаны ўсе гістарычна існаваўшыя епархіі, аднавілі дзейнасць мужчынскія і жаночыя манастыры, брацтвы і сястрыцтвы, аднавіла дзейнасць Мінская духоўная семінарыя, былі заснаваны Мінская духоўная акадэмія, духоўнае вучылішча, школа катэхізатараў. Прыхільна ставіўся да прэм’ер-міністра Вячаслава Кебіча, а калі той прайграў на прэзідэнцкіх выбарах 1994 года, пачаў падтрымліваць прэзідэнта Аляксандра Лукашэнку (бадай, адзінае, у чым не супадаў з ім поглядамі, дык гэта ў пытанні смяротнага пакарання)^[1].

Па благаславенні Патрыяршага Экзарха была адноўлена святыня Беларусі — Крыж Еўфрасінні Полацкай, пачаў функцыянаваць сацыяльны праект Беларускай праваслаўнай царквы — Дом міласэрнасці. Па ініцыятыве Мітрапаліта Філарэта ў царкоўны каляндар унесена новае свята «Сабор Беларускіх святых» і ўстаноўлены агульнацаркоўныя святы ўсіх беларускіх святых, сярод якіх імёны прападобнай Еўфрасінні Полацкай, свяціцеляў Кірылы Тураўскага, Георгія Каніскага і іншых. Мітрапаліт Філарэт арганізаваў пераклад кніг Свяшчэннага Пісання на сучасную беларускую мову.

Дзякуючы намаганням мітрапаліта створаны Міжнародны хрысціянскі адукацыйны цэнтр імя святых роўнаапостальных Кірылы і Мяфодзія, а таксама Інстытут рэлігійнага дыялогу і міжканфесійных камунікацый. Пры яго дзейсным удзеле было распрацавана і заключана пагадненне аб супрацоўніцтве паміж Рэспублікай Беларусь і Беларускай Праваслаўнай Царквой.

У сувязі з дасягненнем 75-гадовага ўзросту залічаны на адпачынак, ганаровы Патрыяршы Экзарх усяе Беларусі.

16 снежня 2020 года Мітрапаліт Філарэт быў шпіталізаваны з прыкметамі захворвання, якое выклікае каранавірусная інфекцыя. Ён памёр у бальніцы ў Мінску 12 студзеня 2021 года. Пахаваны ў Жыровіцкім манастыры^[2].

Узнагароды

• Герой Беларусі
• Ордэн Францыска Скарыны
• Ордэн Айчыны
• Ордэн Пашаны
• Ордэн Дружбы народаў
• Медаль Францыска Скарыны
• ордэн За заслугі перад Айчынай IV ступені (Расія)
• шэраг царкоўных узнагарод

Ушанаванне памяці

• 3 мая 2022 года ў Мінску каля Кафедральнага сабора быў устаноўлены помнік мітрапаліту Філарэту^[3][4]

Зноскі

1. Радыё Свабода Архівавана 12 студзеня 2021.
2. Мітрапаліт Філарэт (Вахрамееў) пахаваны ў Жыровіцкім манастыры
3. Каля Кафедральнага сабора ў Мінску паставяць помнік мітрапаліту Філарэту
4. Помнік мітрапаліту Філарэту адкрылі ў Мінску