18-я партызанская брыгада імя М. В. Фрунзэ

18-я партызанская брыгада імя М. В. Фрунзэ — партызанская брыгада, створаная ў верасні 1942 года на базе атрадаў імя Фрунзэ (арганізаваны ў жніўні 1942 года) і імя Дзяржынскага (арганізаваны ў верасні 1942 года). Дзейнічала на акупіраванай тэрыторыі Дзяржынскага, Заслаўскага, Івянецкага, Клецкага, Ганцавіцкага раёнаў. У снежні 1943 — студзені 1944 гадоў брыгада зрабіла рэйд з Івянецкага раёна ў Клецкі і ўвайшла ў склад Баранавіцкага партызанскага злучэння паўднёвай зоны. 3 ліпеня 1944 года брыгада (735 партызан, 5 атрадаў) злучылася з Чырвонай Арміяй.

18-я партызанская брыгада імя М. В. Фрунзэ
Гады існавання	1942—1944
Краіна	СССР  Беларуская ССР
Падпарадкаванне	Беларускі штаб партызанскага руху
Уваходзіць у	Івянецкае партызанскае злучэнне Баранавіцкае партызанскае злучэнне паўднёвай зоны
Тып	партызаны
Функцыя	змаганне з акупантамі
Колькасць	735 партызан (3 ліпеня 1944)
Дыслакацыя	Дзяржынскі, Івянецкі, Клецкі, Ганцавіцкі раёны
Войны	Другая сусветная вайна Вялікая Айчынная вайна
Удзел у	Вялікая Айчынная вайна
Камандзіры
Вядомыя камандзіры	П. І. Серабракоў С. С. Ключко

Склад

• атрад імя Фрунзэ;
• атрад імя Дзяржынскага;
• атрад імя Суворава;
• атрад імя Катоўскага;
• атрад імя Леніна;
• атрад мясцовай самаабароны вёскі Колкі Клецкага раёна.

Камандаванне

Камандзіры

• П. І. Серабракоў;
• С. С. Ключко.

Камісары

• М. І. Ваўчак;
• В. І. Каробкін;
• П. А. Бягун.

Начальнікі штаба

• І. В. Анохін;
• К. П. Лойка;
• К. І. Бутрымовіч.

Гісторыя

Партызаны вялі баявыя дзеянні на чыгуначных участках Мінск — Маладзечна, Мінск — Стоўбцы, Баранавічы — Лунінец. У жніўні 1942 года разбілі нямецкія апорныя пункты ў вёсках Волма і Залатары. У маі — ліпені 1943 года падарвалі больш за 100 рэек, 7 мастоў, 15 эшалонаў, знішчылі 33 аўтамашыны, у час разгрому апорнага пункта ў вёсцы Тарасава каля Мінска захапілі мінамёт, 5 кулямётаў, больш за 40 вінтовак. У сакавіку 1944 года выбілі немцаў з вёскі Будча Ганцавіцкага раёна, вывелі са строю вузкакалейку на ўчастку Ганцавічы — Дзяніскавічы. У чэрвені 1944 года ў час «рэйкавай вайны» на чыгуначным участку Баранавічы — Лунінец падарвалі 550 рэек.

Літаратура

• Беларусь у Вялікай Айчыннай вайне, 1941—1945: Энцыкл. / Рэдкал.: І. П. Шамякін (гал. рэд.) і інш. — Мн.: БелСЭ, 1990. — 680 с. — 20 000 экз. — ISBN 5-85700-012-2.