Dafydd Parri

Awdur Cymraeg oedd Dafydd Parri (29 Gorffennaf 1926 – 29 Tachwedd 2001)^[1] a ddaeth yn fwyaf adnabyddus am ei gyfresi poblogaidd o lyfrau ffuglen i blant yn cynnwys Cyfres y Llewod a Chyfres Cailo. Bu farw yn 75 oed yng Nghartref y Bont, Llanrwst wedi gwaeledd hir.^[2]

Dafydd Parri
Ganwyd	29 Gorffennaf 1926  Rowen
Bu farw	29 Tachwedd 2001  Llanrwst
Dinasyddiaeth	Cymru
Alma mater	Athrolys
Galwedigaeth	nofelydd
Plant	Myrddin ap Dafydd, Iolo ap Dafydd

Bywyd cynnar ac addysg

Ganwyd yn Rowen, Sir Conwy a fe'i hyfforddwyd fel athro yng Ngholeg Normal, Bangor.^[1]

Gyrfa

Dysgu

Aeth i ddysgu mewn amryw ysgolion yn Sir y Fflint cyn cymryd swydd athro Hanes a Daearyddiaeth yn Ysgol Dyffryn Conwy, Llanrwst. Roedd yn un o'r criw dedwydd o addysgwyr a weithiodd yn galed i gyflwyno addysg cyfrwng Cymraeg i ogledd-orllewin Cymru. Cynhyrchodd ddeunydd ar gyfer gwerslyfrau daearyddiaeth yn Gymraeg ar gyfer yr ysgolion newydd dwyieithog.^[1]

Gwerthu llyfrau

Gyda'i wraig bu'n gwerthu llyfrau drwy ymweld â chymdeithasau Cymraeg yn Sir y Fflint, Sir Gaer ac ardal Wrecsam, cyn sefydlu siop lyfrau a recordiau Cymraeg yn Llanrwst yn 1955. Roedd ei wraig yn rhedeg y siop tra oedd Dafydd yn gweithio fel athro. Symudodd eu merch Gwawr Dafydd yn ôl i'r ardal ar ddechrau'r 1980au i sefydlu busnes gwasanaeth swyddfa 'Bys a Bawd' a phan ymddeolodd ei mam o'i gwaith llawn amser yn 1986 fe unwyd y siop lyfrau gyda'r busnes.^[3] Fe aeth y siop ar werth yn 2007 a fe'i prynwyd gan Dwynwen Berry.^[4]

Awdur

Daeth yn awdur cynhyrchiol yn y 1970au.^[2] Rhwng 1975 a 1980 ysgrifennodd dros 30 o lyfrau yn cynnwys 23 stori antur i blant yng Nghyfres y Llewod a chyfres am gi defaid o'r enw Cailo. Ysgrifennodd dwy gyfrol o storïau byr ar gyfer oedolion hefyd, Nos Lun a Storïau Eraill (1976) a Bwrw Hiraeth (1981).^[5] Ail-gyhoeddwyd pump o gyfres y Llewod ar ddiwedd y 1990au.^[6]

Bywyd personol

Priododd Arianwen Walters yn 1953 ac roedd ganddynt un ferch, Gwawr Dafydd a phedwar mab: yn cynnwys y prifardd ac awdur Myrddin ap Dafydd^[7], y dyn busnes Deiniol ap Dafydd a'r darlledwr Iolo ap Dafydd.^[8]