Cambre
concello da comarca da Coruña, na provincia da Coruña From Wikipedia, the free encyclopedia
Remove ads
Cambre é un concello da provincia da Coruña pertencente á comarca da Coruña. Segundo o padrón municipal (INE 2019) ten 24.648 habitantes (23.621 no 2010, 23.231 no 2009, 22.513 no 2007, 22.092 no 2006, 21.523 no 2005, 20.919 no 2004). O xentilicio é cambrés/-esa.[1]
Para outras páxinas con títulos homónimos véxase: Cambre.
Remove ads
Xeografía
O concello ten unha superficie de 40,7 km², e abrangue 12 parroquias. Forma parte da rexión histórica das Mariñas dos Freires, caracterizada por unha sucesión de áreas achanzadas con vales moi suaves, sendo a altitude máxima de 130 m. Pertence á zona de influencia marítima, se ben a única parroquia con costa é O Temple. Está atravesado de leste a oeste polo río Mero, que alimenta o encoro de Cecebre.
O municipio ten clima oceánico húmido, con temperaturas son suaves e precipitacións altas. A humidade relativa do aire é elevada, cun índice superior ao 75 %. A vexetación é hidrófila, con bosques e fragas de carballos, piñeiros e eucaliptos.
Integrado na comarca da Coruña, sitúase a 16 km da capital coruñesa. O termo municipal está atravesado pola autovía A-6 entre os pk 575 e 583, ademais de pola autoestrada AP-9, que une A Coruña con Portugal, pola estrada N-550, alternativa convencional á anterior, pola AC-214, que une a N-VI coa N-550, e por outras estradas locais que permiten a comunicación entre as parroquias. En canto á comunicación ferroviaria, o concello conta con dous apeadoiros, un localizado na parroquia de Cambre e outro na de Cecebre; ambos situados na liña férrea de largo ibérico que une León con A Coruña.[2][3]
Limita ó norte con Oleiros, ó nordeste con Sada, ó leste con Bergondo e Abegondo, ó sur con Carral e ó oeste con Culleredo.
Demografía
| Evolución da poboación de Cambre Fontes: INE e IGE. | ||||||||||||||||||
| 1900 | 1930 | 1950 | 1981 | 2004 | 2009 | 2011 | 2012 | 2013 | 2014 | 2015 | 2016 | 2017 | 2018 | 2019 | 2020 | 2021 | 2022 | 2023 |
| 6.722 | 7.805 | 8.011 | 9.181 | 20.919 | 23.621 | 23.649 | 23.879 | 23.999 | 24.029 | 24.076 | 24.141 | 24.348 | 24.603 | 24.648 | 24.594 | 24.635 | 24.739 | |
| (Os criterios de rexistro censual variaron entre 1900 e 2004, e os datos do INE e do IGE poden non coincidir.) | ||||||||||||||||||
Remove ads
Historia
Consérvanse antas neolíticas nos límites co concello de Carral. Consérvase un petróglifo no castro de Sigrás. Tamén se conservan restos dos castros de Pravio, Armental, e Fraís, todos eles de tipoloxía clásica: construídos nun outeiro, cun poboado de casas circulares rodeado dun muro defensivo.[4] Posiblemente o concello, actual vía de paso da ruta inglesa do camiño de Santiago, xa fose percorrido por unha antiga vía romana que unía A Coruña e Betanzos.
Remove ads
Cultura e deporte
Topónimo
O topónimo da vila que dá nome ao concello, Cambre, podería ser de orixe prerromana. O seu significado referiríase a unha poboación ligada a unha altura, unha fortificación ou a un límite entre territorios.[5][6][7]
Patrimonio
Patrimonio arquitectónico
- Vila romana de Cambre, datada entre os séculos II e IV. Foi atopada accidentalmente durante unha obra en 1998.[8][9]
- Igrexa de Santa María de Cambre: monumento do século XII.
- Tramo do Camiño Inglés (Camiño de Santiago).
- Museo Arqueolóxico (cos restos da Vila romana de Cambre e o seu centro de interpretación).[10]
- Villa Florentina, actual casa museo de Wenceslao Fernández Flórez, situada en San Salvador de Cecebre e dirixida pola Fundación Wenceslao Fernández Flórez.[10]
- A escultura de O Paraugas, construída entre 1945 e 1949 e situada nunha rotonda no Temple preto da ponte medieval do Burgo.[11]En 2014, no marco de obras realizadas pola Xunta de Galicia para mellorar a seguridade viaria, a escultura tivo que ser demolida (pois non puido ser conservada debido ó seu mal estado de conservación), para ser posteriormente substituída por unha réplica realizada en materiais máis resistentes á degradación.[12]
- Casa Arrigada, casa modernista de 1912 da que se descoñece o arquitecto. Describe unha planta rectangular con planta baixa e dous andares. A fábrica é de cemento revocado e está pintada de verde e ocre. Os balcóns e cornixas aparecen finamente decorados: os motivos fundamentais son habituais do modernismo a saber, naturais (exaltación da natureza), musicais e figuras alegóricas.[13] Actualmente funciona como Casa da Xuventude e unha das sedes da Oficina Municipal de Información Xuvenil (OMIX).[14]
- Casa Bailly: Vivenda modernista no Graxal (parroquia do Temple) con dous corpos divididos en dúas alturas, de andar case cadrado, con faiado e soto. Orixinalmente a mansión, que posuía 22 habitacións, formaba parte dun complexo que se atopaba dentro dun terreo con 30.000 metros cadrados. Contaba tamén cunha vivenda para o chofer e o xardineiro.[15]
Patrimonio natural
- Contorno do río Mero.
- Encoro de Cecebre, que é unha zona especial de conservación (ZEC). Construíuse en 1975 na confluencia entre o río Mero e o río Barcés.
- Paisaxes que se estenden entre Cecebre e Bribes, que coas súas fragas inspiraron ó escritor, periodista e humorista coruñés Wenceslao Fernández Flórez a escribir a famosa novela El bosque animado (1943), que inspirou á súa vez a varias películas de título homónimo como a de José Luis Cuerda de 1987 (El bosque animado) e a de animación de Ángel de la Cruz e Manolo Gómez de 2001 (O bosque animado).
Eventos culturais
- Rock in Cambre: Festival de música rock celebrado anualmente no mes de agosto dende 1992. A entrada é de balde.[16][17]
- Galaicoi: Romaría de temática Castrexo-Romana anual celebrada por primeira vez no ano 2016.[18] Entre as actividades que se realizan, destaca a representación de batallas entre romanos e castrexos do século I d.C. Durante o evento, as asociacións do concello poden solicitar ocupar unha das múltiples cabanas que se erixen en representación do poboado castrexo.[19][20]
- Open Science: Feira de ciencia aberta organizada anualmente dende 2018 pola asociación xuvenil Xente de Ciencia, vencellada ó IES David Buján.[21][22] Ó encontro acuden estudantes de institutos de secundaria galegos e internacionais, así como distintas asociacións adicadas á investigación e divulgación científica.[23]
Deporte
Os equipos deportivos máis destacados son o Sporting Cambre, o Club Ciclista de Cambre, o Brexo-Lema S.D., Once Caballeros C.F. do Temple, Club Baloncesto Cambre, Towers Football, Hockey Club Cambre, entre outros.[24]
Remove ads
Administración e política
Eleccións municipais 2023
O Pleno de Cambre consta de 21 escanos. Nas eleccións municipais de 2023 a forza máis votada foi Unión por Cambre (UxC), que obtivo 3370 votos e 7 concelleiros. Ademais de UxC obtiveron representación o Partido Popular de Galicia (PPdeG) (2423 votos, 5 concelleiros), Partido dos Socialistas de Galicia-PSOE (PSdeG-PSOE) (1728 votos, 4 concelleiros), Bloque Nacionalista Galego (BNG) (1492 votos, 3 concelleiros) e Alternativa dos Veciños (AV) (en cuxa lista se integraran Olga Santos e Loreto Taibo, números un e dous respectivamente na lista de Esquerda Unida nas eleccións anteriores)[25] (1182 votos, 2 concelleiros).[26] Nestas eleccións quedaron sen representación VOX (426 votos), Unidade Local (405 votos), Podemos Galicia (170 votos), Cidadáns-Partido da Cidadanía (168 votos) e AEQUALITATEM (16 votos).[27]
Na actualidade, o partido que goberna é o PP, con Diana Piñeiro Fernández na alcaldía[28], quen tomou o cargo en minoría tras as sucesivas dimisións do alcalde electo, Óscar García Patiño[29], e da súa substituta María Pan Lesta, ambos de UxC.[30][31]
Remove ads
Parroquias
Lugares de Cambre
Para unha lista completa de todos os lugares do concello de Cambre vexa: Lugares de Cambre.
Galería de imaxes
- Artigo principal: Galería de imaxes de Cambre.
Ponte da ría do Burgo.
Paseo marítimo.
Muller mariscadora,
obra de Xabier Correa Corredoira.
O Paraugas, escultura ó lado da ponte do Burgo.
Placa altimétrica
na casa do concello.
Casa do concello de Cambre
Igrexa de Santa María de Cambre,
fachada.
Igrexa de Cambre,
vista posterior.
Igrexa de Cambre,
tímpano da fachada.
A Barcala, Cambre.
Imaxe de Cambre.
Remove ads
Notas
Véxase tamén
Wikiwand - on
Seamless Wikipedia browsing. On steroids.
Remove ads