Faneca prateada

A faneca prateada,^[5][6][7] Gadiculus argenteus Guichenot, 1850, tamén coñecida ás veces como corbelo prateado,^[7] é un peixe osteíctio gadiforme da familia dos gádidos, único representante do xénero Gadiculus.^[8]

Faneca prateada Gadiculus argenteus
Clasificación científica
Reino: Animalia Filo: Chordata Subfilo: Vertebrata Infrafilo: Gnathostomata Superclase: Osteichthyes Clase: Actinopterygii Subclase: Neopterygii Orde: Gadiformes Familia: Gadidae Xénero: Gadiculus (Guichenot, 1850) [1][2] Especie: G. argenteus
Nome binomial
Gadiculus argenteus (Guichenot, 1850) [1]
Distribución de Gadiculus argenteus argenteus Distribución de Gadiculus argenteus argenteus
Subespecies
G. argenteus argenteus (Guichenot, 1850) G. argenteus thori (Schmidt, 1914)[3][4]

Características

É un peixe pequeno, duns 11 cm de lonxitude (máximo, 15 cm), de corpo moderadamente alongado, cuberto de escamas grandes, delgadas e facilmente caducas, de coloración rosa prateada no dorso e nos flancos, e prateada na rexión ventral e a ambos os lados da cabeza; as aletas son case transparentes e de cor cincenta. Na cabeza presenta o maxilar inferior proxectado lixeiramente respecto do superior, a boca oblicua, con dentes moi pequenos dispostos nunha banda estreita en ambos os maxilares e, ás veces, no vómer; carece de barbelas; os ollos son grandes, cun diámetro superior á lonxitude do fociño. As aletas peitorais son pequenas e arredondadas; e as pelvianas aínda máis curtas. A liña lateral e descontinua, e vai desde a segunda metade da base da terceira aleta dorsal até a parte superior da cabeza, onde remata en tres cavidades mucosas .^{[6][9][10][11]}

Distribución e hábitat

É un peixe de augas mariñas, peláxico e non migratorio, que habita no Atlántico nororiental, desde Islandia e Noruega até Marrocos e as costas do Sáhara Occidental, e no Mediterráneo occidental, até Italia e Tunisia,^[9] nadando en cardumes entre os 100 e os 1.000 m de profundidade sobre fondos *fangosos, de grava ou rochosos.^[6][10][11]

Subespecies

Distínguense dúas subespecies:^[11]

• Gadiculus argenteus argenteus, desde o norte até o golfo de Biscaia, e
• G. a. thori, na parte meridional da súa área de distribución.

Bioloxía

Aliméntase de pequenos crustáceos e quizais tamén de anélidos poliquetos.^[6]

A súa esperanza de vida ao nacer é de 3 anos.^[9]

A reprodución ocorre, no Mediterráneo occidental e a ambos os lados do estreito de Xibraltar, en inverno.^[9][10] Nas costas galegas, de xaneiro a febreiro.^[6]

Pesca

Péscase e comercialízase, pero ten pouca importancia comercial; ás veces péscase para usalo como carnada.^[9] Porén, o seu agradábel sabor fai que alcance elevados prezos nalgúns mercados.^[12]