Санскрит

Санскрит^[3] (संस्कृता वाक् saṃskṛtā vāk, кратко संस्कृतम् saṃskṛtam) — стар индоевропски јазик од индоиранската група јазици кој е класичен јазик на Индискиот Потконтинент. Санскрит е литургиски јазик на хиндуизмот, будизмот, сикизмот, џаинизмот и претставува еден од 23-те службени јазици на Индија.

Санскрит
संस्कृतम् saṃskṛtam
Зборот 'санскрит' (संस्कृतम्) на деванагари.
Изговор	sə̃skɹ̩t̪əm
Застапен во	Индија
Говорници	14.000[1]  (2001)
Јазично семејство	индоевропско индоирански индоариски санскрит
Писмо	нема свое писмо[2] Денес се пишува со деванагари, индиски писма, тајландско писмо и латиница.
Статус
Службен во	Индија, Утараканд
Јазични кодови
ISO 639-1	sa
ISO 639-2	san
ISO 639-3	san

Историја

Потекло и развој

Санскрит припаѓа на семејството на индоевропски јазици. Претставува еден од трите најстари документирани јазици кои се развиле од еден заеднички предок, кој денес се нарекува праиндоевропски јазик:^[4][5][6]

• Ведски санскрит (ок. 1500–500 п.н.е.).
• Микенски (ок. 1450 п.н.е.)^[7] и Старогрчки (ок. 750–400 п.н.е.).
• Хетски (ок. 1750–1200 п.н.е.).

Други индоевропски јазици кои се далечно поврзани со санскрит се статолатинскиот и класичниот латински јазик (ок. 600 п.н.е.–100 н.е., италски јазици), готскиот (архаичен германски јазик, ок. 350 н.е.), старонордискиот (ок. 200 н.е. и потоа), староавестискиот (ок. крај на 2 милениум н.е.^[8]) и младоавестискиот (ок. 900 н.е.).^[5][6] Најблиски сродни јазици на ведскиот санскрит се нуристанските јазици во регионот на Хиндукуш во североисточен Афганистан и северозападните Хималаи,^[6][9][10] како и изумрените авестиски и староперсиски јазик – и двата од групата на ирански јазици.^[11][12][13] Санскритот припаѓа на сатемската група на индоевропски јазици.

	Како звучи пеењето на санскрит
Проблеми со пуштањето? Помош.

Научниците од колонијалниот период запознаени со латинскиот и старогрчкиот јазик биле изненадени од сличноста на јазикот санскрит, и во неговиот вокабулар и во граматиката, со класичните јазици во Европа. Во The Oxford Introduction to Proto-Indo-European and the Proto-Indo-European World, Мелори и Адамс ја илустрираат сличноста со следниве примери на когнати^[14] (во табелата се додадени и староанглиски и старословенски за понатамошна споредба):

ПИЕ	Англиски	Староанглиски	Латински	Грчки	Старословенски	Санскрит	Поимник
*méh₂tēr	mother	mōdor	māter	mētēr	мати	mātár-	мајка
*ph₂tḗr	father	fæder	pater	patēr	-	pitár-	татко
*bʰréh₂tēr	brother	brōþor	frāter	phreter	братръ	bhrā́tar-	брат
*swésōr	sister	sweoster	soror	eor	сестра	svásar-	сестра
*suHnús	son	sunu	-	hyiós	синь	sūnú-	син
*dʰugh₂tḗr	daughter	dohtor	-	thugátēr	дъщи	duhitár-	ќерка
*gʷṓws	cow	cū	bōs	bous	говѧдо	gáu-	крава, говедо
*demh₂-	tame, timber	tam, timber	domus	dom-	домъ	dām-	куќа, дом