Сува Гора (Преспа)

Сува Гора или Сува Планина (албански: Mali i Thatë) — планина во Мала Преспа, југоисточна Албанија со мал крак во околината на Љубаништа и Свети Наум во Охридско, југозападна Македонија и дел во Долна Преспа, Егејска Македонија. Висока е 2.288 м и претставува јужно продолжение на Галичица. Се граничи со Преспанското Езеро на исток, Охридското Езеро на северозапад и гледа кон градот Поградец на запад. Се протега во должина од 25 км во правец север-југ, а широка е 8 км во средишниот дел. Највиско место на планината е Вир (Pllaja e Pusit), на нешто поголема височина од врвот на самата Галичица во потесна смисла. Од овој врв се гледаат неколку планини во Албанија, Охридското и Преспанското Езеро, како и планината Баба на Пелистер (2.601 м) — трета по висина во Македонија.

Оваа статија се однесува на планина во Мала Преспа. За планината во северозападна Македонија, погл. Сува Гора.

Сува Гора
Mali i Thatë
Поглед на билото на Сува Гора кон Грамошта во далечината, на растојание од 65 км
Највисока точка
Врв	Вир
Надм. вис.	2.288 м [1]
Координати	40.8833°N 20.8333°E / 40.8833; 20.8333
Географија
Сува Гора на карта
Место	Мала Преспа, Албанија
Матичен венец	Галичица
Геологија
Старост на карпата	мезозоик
Вид	варовничка

Планината има антиклинален облик и е речиси целосно сочинета од мезозојски варовнички образби.^[2] Падините се карпести и каменливи (особено од западната страна), додека пак билото е речиси рамно, но полно со карстни шуплини.

Сртови

Планината има неколку сртови со одделно име кои се вон нејзиниот средиштен дел: Дева (1.373 м), Калуѓер (1.480 м), Слива (1.414 м) и Цуцул (1.455 м).

Планинарење

Планината најдобро се искачува од страната на Поградец, почнувајќи од селото Аларуп, преку с. Грабовица па на исток до селата Блаце и Братомир.^[3]

Растителност и ресурси

Растителноста на Сува Гора претежно се состои од пасишта, додека источната страна кон Пустец е обрасната со буково-дабови шуми и честак.

Кај селото Горна Горица почвата е богата со железната руда боксит и наоѓалишта на креда.^[2]

Историски настани

Во Албанската буна од 1911 г. на Сува Гора се одвивале борби, во кои влашката чета на војводата Спиро Белкамени го поразила отоманскиот контингент.

Поврзано

• Галичица
• Иван Планина
• Мала Преспа
• Општина Пустец
• Поградец
• Национален парк Преспа
• Маличко Езеро