Solveig Heilo

Solveig Heilo, òg kjend som Sol, (fødd 24. desember 1981) er ein norsk komponist, artist, musikar, musikkprodusent, arrangør, designar og kostymedesignar. Heilo er best kjend frå bandet Katzenjammer. Ho er multiinstrumentalist og arbeider innan fleire musikksjangrar.^[1][2][3]

Solveig Heilo
Fødd	24. desember 1981 (43 år)
Fødestad	Bærum kommune
Opphav	Noreg
Sjanger	folkemusikk, rock, pop, bluegrass, klassisk musikk, blues, soul, country, klezmermusikk, elektronisk musikk
Instrument	trommesett, trompet, domra, pitched percussion instrument, bassgitar, gitar, ukulele, banjo, balalaika, siter, harpe, fløyte, trekkspel, piano, munnspel, mandolin
Plateselskap	Propeller Recordings
Verka som	gitarist, songar

Oppvekst

Heilo vaks opp i Bærum som den yngste av fire sysken. Faren lærte dei å spele piano, og mora song med dei kvar dag. Begge brørne hennar er musikalsk aktive, og ho har skrive musikk saman med broren Kristian Heilo. Ho var sju år gammal då ho byrja med perkusjon i Haslum skoles jentekorps, og tolv år gammal deltok ho som trommeslagar under fakkelstafetten til Lillehammer-OL saman med ti år eldre perkusjonistar frå Norges musikkhøgskole. Etter vidaregåande skule reiste ho verda rundt og enda opp i Connecticut, der ho ein kort periode var perkusjonist i symfoniorkesteret i Norwalk.^[2][4]

Utdanning

Årane 1998–2000 gjekk Heilo på musikklinja på Rud vidaregåande skule i Bærum. Der møtte ho Marianne Sveen, som ho seinare fekk inn i Katzenjammer. Frå 2000 til 2001 tok ho faga foto og teater ved Buskerud Folkehøgskole. Sidan flytta ho til Oslo og studerte komposisjon og musikkproduksjon ved Nordisk Institutt for Scene og Studio frå 2003 til 2005. Her vart Katzenjammer danna av Heilo, Anne Marit Bergheim og Turid Jørgensen Honerud. Ho byrja då å spela gitar og andre instrument Katzenjammer ynskte å bruka og debuterte òg som vokalist. Ho gjekk ut av Nordisk Institutt for Scene og Studio med dei beste karakterane til årskullet, og mottok St. Olavsprisen som Årets student.^[2][5][6]

Arbeid

Frilans

Etter studietida jobba Heilo som frilansmusikar saman med fleire kjende artistar, blant anna spelte ho keyboard for Bertine Zetlitz, vokal og fleire instrument på albumet Diggin Deep (2006) av HP Gundersen, trompet for Westlife, vokal og trommer på fleire Espen Lind- og Stargate-innspelingar, vokal og trommar for Magnus Ugglas band, trompet på Grand Island-albumet Boys and Brutes (2008), vokal på Vinni sin låt Mørkredd (2011), mandolin på Thomas Dybdahl-songen Før Morgengry (2011) og dessutan perkusjon og vokal med Odd Nordstoga og Kåre Vestrheim på eit videoprosjekt for NRK.^[2][7][8]

I 2005 sat Heilo og Johan Wilhelm Schioldborg saman eit musikkstudio hos Propellar Recordings, der ho øvde på innspeling av fonogram, og produserte det første demoalbumet til Katzenjammer. I 2012 og 2013 jobba ho som komponist, arrangør, musikar, musikkprodusent, teknikar, designar og skodespelar i Worsøe sin teaterproduksjon Stilleben.^[2][9]

I 2013 kunngjorde Holmenkollbakken og Skiforbundet ein songkonkurranse blant anerkjende musikarar og komponistar. Målet var ein ny, offisiell «Kollen-låt», og fleire prominente norske band og komponistar sende inn bidrag. Saman med Terje Borg skreiv Heilo vinnarlåten, og Kollenbrølet (2013) er no den offisielle Holmenkollen-songen.^[10]

Katzenjammer

Sol Heilo med Bassbalalaikaen til katzenjammer «Akerø»

Foto: Ketil Hardy

Heilo har vore sentral i arrangementa og komposisjonane til til Katzenjammer, og var medprodusent på det første (Le Pop) og tredje (Rockland) albumet deira. Ho var med å skriva singlane Rock Paper Scissors og I Will Dance frå albumet A Kiss Before You Go (2011) og har skrive singlane My Dear og Shine Like Neon Rays frå albumet Rockland (2015). Saman med Eivind Buene står ho bak Katzenjammer sin versjon av Bjørn Rønningens julesang Vi Tenner Våre Lykter, som er tittelsporet på Kronprinsparets humanitære fond si juleplate frå 2011. Ho arrangerte òg all vokal for Katzenjammer-versjonen av The Pogues sin song Fairytale of New York, der Tormod Tvete Vik gjorde arrangementet for strykarar. Ho arrangerte åleine Katzenjammer-versjonane av songane When You Wish Upon a Star, God Rest Ye Merry Gentlemen og White Christmas.^{[2][11][12][13][14][15][16]}

Katzenjammer står bak omarrangeringa og innspelinga av musikken til animasjonsfilmen Dyrene i Hakkebakkeskogen (Qvisten animasjon, 2016). Musikken er skriven av Thorbjørn Egner og Christian Hartmann med unntak av "Skinkestek" (Heilo). Gaute Storaas står bak den øvrige filmmusikken.

Design

Heilo gjorde designen til det første albumet til Katzenjammer, Le Pop (2008), saman med systera Kaja Heilo og Sandrine Pagnoux. Ho deltok òg i designen til andrealbumet A Kiss Before You Go (2011) saman med Mathias Fossum og Heydays, og hadde eineansvar for design til tredjealbumet Rockland (2015). Ho har òg designa det meste av salsartiklane til Katzenjammer, som t-skjorter, buttons og koppar, i tillegg til plakatar, sceneoppsett, tidleg webdesign og design av den velkjende balalaikabassen Akerø. Dei fleste av scenekostyma ho brukar i Katzenjammer har ho sydd sjølv, og ho har òg sydd kjolar som salsartiklar for Katzenjammer.^{[11][17][18][19]}

Andre prosjekt

I 2012 starta Heilo eit band saman med Unni Wilhelmsen og Hanne Mari Karlsen. Trioen spelar eit utval av låtar skrivne av Wilhelmsen og Heilo. Alle byter på å spela til saman 14 instrument, og alle syng. Heilo er òg med på soloprosjektet til Magnus Grønneberg, der ho spelar trommar og syng. I 2015 deltok ho med vokal på CC Cowboys sitt siste album Til det blir dag (2015). Ho jobbar òg på eit prosjekt saman med Andreu Jacob, der begge produserer og spelar noko av Heilo sitt nyskrivne material. Ho har starta eit nytt prosjekt ho kallar SOL, der fokuset er hennar solomaterial.^{[3] [20][21][22]}

Diskografi

Album

• Skinhorse Playground (2017)

Singlar

• Hold on (2012)
• America (2017)
• Killing Karma (2017)

Katzenjammer

• Le Pop (2008)
• A Kiss Before You Go (2011)
• A Kiss Before You Go: Live in Hamburg (2012)
• Rockland (2015)
• Live at Gearbox (2016)

Singlar

• Play My Darling, Play (2008)
• Demon Kitty Rag (2009)
• A Bar in Amsterdam (2009)
• Tea with Cinnamon (2010)
• Den lengste natten (2010), med Øystein Dolmen & Lisa Gansmoe
• I Will Dance (When I Walk Away) (2011)
• Rock-Paper-Scissors (2011)
• A Fairytale of New York (2012)
• Lady Gray (2014)

Deltakingar

• HP and his Patient Orchestra: Diggin' Deep (2007)
• Grand Island: Boys and Brutes (2008)
• HP and his Patient Orchestra: Uncle Johnny Had a Cool Guitar (2008)
• Barneselskapet: Supersanger med Fantorangen og Kuraffen (2010)
• Vinni: Mørkredd (2011)
• Kronprinsparets fond: Vi tenner våre lykter – Kronprinsparets fond (2011)
• CC Cowboys: Til det blir dag (2015)
• Aslak Borgersrud: Det er valgfritt å irritere seg (2016)
• Filmmusikk: Dyrene i Hakkebakkeskogen (2016)
• Kutoppen: KuToppen – Musikken fra filmen (2018)