Жупа Угоча

Жупа Угоча, лат. Comitatus Ugotsensis, мад. Ugocsa vármegye — административно-териториална часть историчного Мадярского кральовства. Днесь векша часть жупы належить Украинѣ, а менша — Румынии.

Жупа Угоча Comitatus Ugotsensis Ugocsa vármegye
Жупа Мадярского кральовства
XIII. стороча–1920
Герб
Location of Угоча
столиця		Севлюш (Nagyszőllős) 48°8′N 23°2′E
доба
-	основаня	XIII. стороча
-	заник	4. юн 1920
розлога
-	1910	1213 км2
обывательство
-	1910	91 755
	густота	75,6/км2
днешны штаты		Украина Румыния
Жупа Угоча на Викискладѣ

Рельеф Угочанской жупы

География

Територия жупы переважно ровинна. В ей западной части, де середнѣ высоты 120–130 м н.м., зачинать ся Велика дунайска нижина. Найвекша рѣка Угочи, Тиса, роздѣлять жупу на двѣ части. На правом березѣ Севлюшскы горы поднимають ся до 878 м н.м., а их найзападнѣйша Чорна Гора (368 м н.м.), на котрой стоять руины стародавного Угочанского замка, высить ся над Севлюшом, главным городом жупы. На лѣвом березѣ горске пасмо Аваш досягуе 827 м н.м. Еще двѣ векшы рѣкы течуть на сѣверѣ и на югу жупы: одповѣдно Боржава и Тур, их берегы мѣстами мочаристы. Сосѣдны жупы: Берег Мараморош, Сатмар.^[1]

История

Зачаткы жупы

До конця XII. стороча територия приналежала ку кральовскому лѣсному ревиру. Первы просперуючы села около Тисы основали Сасы, котрых покликав Гейза II. (1141–1162). По часѣ Бейла III. (1172–1196) уже послав на тоту невелику, але добрѣ оселену територию свого справника (ispán). Славянскы осадникы зачали ся появляти в конци XIII. стороча (Verbőc – Вербовець), але так, як и Сасы, помадярили ся. Подля легенды, славне гесло Ugocsa non coronat родило ся уже в року 1505 на соймѣ жупы, подля документалных свѣдчень, то было в року 1635 або 1722.^[1] Селяне Угочи были участниками гуситского повстаня (1437–1438), селянской войны (1514).^[2]

Въедно з колонизациев Угочѣ сформовала ся и церковна штруктура: з року 1301 походить упоминка о угочанском деканатѣ, чий декан Деметер быв викарьом ардялского епископа.^[3]

Конець жупы

В зачатку мая 1919 вшитка територия Руськой Крайны была окупована чешскым и румынскым войском.^[4] Мадярска администрация, а з ньов и жупы были зликвидованы. Передачи Руськой Крайны в Чехословакию дав правну основу Сен-Жерменскый мирный договор (10. септембер 1919) и Трианонскый мирный договор (4. юн 1920).

Обывательство

Обывательство в року 1910 было 75 461 особ, з того:

Народность	Число особ	%%
Русины	32 076	42,51
Мадяре	28 852	38,23
Румыны	8 830	11,70
Нѣмцѣ	5 447	07,22
Словаци	40	00,05
иншы	216	28,62

Жерела и одказы

• Komáromi András: Ugocsa vármegye keletkezése. — Budapest: Magyar Tudományos Akadémia, 1896 Ugocsa vármegye keletkezése (PDF). MTA Értekezések a Történeti Tudományok köréből. http://digilib.mtak.hu/B339/issues/vol16/B3391607.pdf.
• Révai nagy lexikona. Révai Testvérek Irodalmi Intézet Részvénytársaság, Budapest. 18. köt. 1925.
• Исламов Т.М., Пушкаш А.И., Шушарин В.П. (ред.): История Венгрии. Том 1. — Москва: Наука, 1971
• Пушкаш, Андрей. Цивилизация или варварство. Закарпатье 1918–1945. Институт славяноведения РАН. — Москва: Издательство «Европа». 2006. ISBN 5-9739-0083-5