Bango
From Wikipedia, the free encyclopedia
Remove ads
Bango (Egretta Alba Modesta) nyaéta manuk jangkung anu asalna tina kulawarga Ardeidae mibanda bulu kelirna bodas.[1] Dina basa Inggris sok disebut ogé eastern great egret; Great White Egret; Large Egret; Great White Heron atawa Common Egret. [1]Loba kapanggih hirup di daérah anu mibanda iklim tropis tur haneut.[1] Panjang awakna 83-103 cm (33-41 in) beurat 0,7-1,2 kg (1,5-2,6 lb) buluna bodas, sukuna panjang kelirna hideung.[2]
Di Éropa ogé aya ngan teu pati loba utamana hirup di Éropa beulah kidul. Di Amérika kalér loba kapanggih di daérah anu kaliliwatan khatulistiwa jeung leuweung hujan di Amérika beulah kidul.[1] Ieu manuk mimiti ditalungtik ku John Edward Gray saurang ahli ornithologist urang Inggris dina taun 1831.[3]
Pareng ngadodoho hakaneun, bango ngajentul kawas tunggul nangtung dina luhureun cai anu déét, tempona hakaneun geus deukeut kakara pamatukna sakiceup macok ka jero cai.[3] Bango mah bisa ancrub ka sawah atawa rawa-rawa anu aya caian alatan mibanda suku anu jangkung matak awakna henteu nepi kabaseuhan.[3] Kitu deui pamatukna anu mencos tur panjang, bisa ngahontal atawa macok mangsa anu aya di jero cai. Beuheungna ogé kawilang panjang ieu ngajadikeun manuk bango bisa newak lauk atawa kahakananna anu jauh atawa di jero cai.[4] Sato anu diburu kayaning sasatoan ampibi, reptil, lauk, keuyeup, jeung sajabana.[4]
Populasi bango loba kapanggih hirup jeung baranahan di Australia, Bangladesh, China, India, Indonésia, Jepang, Koréa, Myanmar, Selandia Baru, Pakistan, Papua Nugini, Rusia, Kapuloan solomon, Sri Langka, Thailand. [5]
Usum begér manuk bango mah ngan sataun sakali, mimindengna mah dina bulan Maret nepika Méi.[5] Mangsa endogan bango sok nyieun sayang dina luhureun tatangkalan jangkuna kurang leuwih 25 méter tina luhureun taneuh, sayangna nemprak dijieun tina régang tatangkalan anu aya di sabudeuren tempat nyayangna.[5] Sakali usum ngendog, ilaharna ngahasilkeun opat nepika genep endog, kelirna bulao ngora semu pias wangunna lonyod gedéna kurang leuwih 52 x 36 mm.[5]
Manuk bango mibanda opat subspésiés :
- Egretta alba alba (Éropa) Ardea alba alba
- Egretta alba egretta (Amerika) Ardea alba egretta
- Egretta alba melanorhynchos (Aprika) Ardea alba melanorhynchos
- Egretta alba modesta (India, Asia Kidul) Ardea alba modesta
Keur maraban anakna dina sayang
Ngadodoho mangsa
Keur anjeucle dina daun kalapa
Bango mangsa keur hiber
Bango sawah
Bango sawah 1
Remove ads
Dicutat tina
Wikiwand - on
Seamless Wikipedia browsing. On steroids.
Remove ads