ஐ-சிட்டி

ஐ-சிட்டி அல்லது ஐ-சிட்டி சிலாங்கூர் (மலாய்; ஆங்கிலம்: i-City அல்லது i-City Selangor; சீனம்: 智慧城市); என்பது மலேசியா, சிலாங்கூர், சா ஆலாம், செக்சன் 7-இல்; முழுமையாக ஒருங்கிணைக்கப்பட்ட ஓர் அறிவார்ந்த தொழில்நுட்ப வளாகம் (Fully Integrated Intelligent City) ஆகும்.^[3] இதன் பரப்பளவு ஒரு மில்லியன் சதுர அடி (93×103 மீ²)^[4]

ஐ-சிட்டி
தொழில்நுட்ப வளாகம்
i-City
இரவு நேரத்தில் ஐ-சிட்டி
ஐ-சிட்டி தீபகற்ப மலேசியாவில் அமைவிடம்
ஆள்கூறுகள்: 3°03′57″N 101°29′0″E
நாடு	மலேசியா
மாநிலம்	சிலாங்கூர்
உள்ளாட்சி	சா ஆலாம் மாநகராட்சி
அமைவு	சனவரி 2002[1]
நேர வலயம்	மலேசிய நேரம் 08:00
அஞ்சல் குறியீடு	40000[2]
தொலைபேசி எண்	+6-03-55
போக்குவரத்துப் பதிவெண்கள்	B

பெருநிறுவனங்கள், ஓய்வகங்கள் மற்றும் குடியிருப்புக் கூறுகளை (ICT-based Urban Development) உள்ளடக்கிய இந்த வளாகத்திற்குள் பிராந்திய அங்காடி மாளிகைகள், அலுவலக உயர்க் கோபுரங்கள், பல்லூடக அலுவலக அறைகள் (Cybercentre Office Suites), தங்கும் விடுதிகள், அடுக்குமாடி குடியிருப்புகள், தரவு மையங்கள் மற்றும் ஒரு புத்தாக்க மையம் (Innovation Center) போன்றவை உள்ளன.^[5]

பொது

ஐ-சிட்டி என்பது மலேசிய பல்லூடகப் பெருவழியின் (Multimedia Super Corridor) ஓர் உயர் தொழில்நுட்ப வணிக மையமாகும். மலேசிய பல்லூடகப் பெருவழியின் தகுதி பெற்ற அறிவுசார் நிறுவனங்கள் இந்தத் தொழில்நுட்ப வளாகத்தில் செயல்படுகின்றன.

இந்தத் தொழில்நுட்ப வணிக மையம், மலேசிய சுற்றுலா, கலை மற்றும் பண்பாட்டு அமைச்சினால் ஒரு சுற்றுலா தலமாக அங்கீகரிக்கப்பட்டு உள்ளது. மேலும் சிலாங்கூர் மாநில அரசாங்கத்தால் ஒரு பன்னாட்டுப் பூங்காவாகவும் அறிவிக்கப்பட்டுள்ளது.

2002-ஆம் ஆண்டில் 1.5 பில்லியன் MYR-ஆக இருந்த ஐ-சிட்டி திட்டத்தின் மொத்த வளர்ச்சி மதிப்பு, தற்போது 10 பில்லியன் MYR-ஆக அதிகரித்துள்ளது.^[6]

போக்குவரத்து

தொடருந்து

மலேசிய தொடருந்து சேவையின் தஞ்சோங் மாலிம்–கிள்ளான் துறைமுக வழித்தடத்தில் அமைந்துள்ள  KD12  பாடாங் ஜாவா கொமுட்டர் நிலையம் இந்த ஐ-சிட்டி வணிக மையத்திற்கு அருகில் உள்ளது.^[7]

பேருந்து

இங்குள்ள சென்ட்ரல் ஐ-சிட்டி எனும் அங்காடி வளாகம், பாடாங் ஜாவா கொமுட்டர் நிலையத்துடன் அரை மணி நேர இடைவெளியில் இலவசப் பேருந்து சேவையை முன்பு வழங்கி வந்தது.^[8] இருப்பினும், அந்தச் சேவை 2020-இல் நிறுத்தப்பட்டது.

இதனால் தற்போது, பாடாங் ஜாவா கொமுட்டர் நிலையத்திலிருந்து ஐ-சிட்டிக்கு ஒரே அணுகல் SA04  இஸ்மார்ட் சிலாங்கூர் இலவசப் பேருந்து சேவையாகும். பள்ளி நாட்களிலும் ஞாயிற்றுக்கிழமை சந்தை நாட்களிலும் ஏற்படும் நெரிசல்கள் காரணமாக SA04  பேருந்து பாடாங் ஜாவா கொமுட்டர் நிலையத்திற்குள் செல்வது இல்லை.

2025-ஆம் ஆண்டின் பிற்பகுதியில் சா ஆலாம் வழித்தடம் முழுமையாகச் செயல்படத் தொடங்கிய பின்னர், SA15 பேருந்தின் மூலமாக ஐ-சிட்டி இணைக்கப்படுகிறது.^[9]

மேலும் காண்க

• சா ஆலாம்
• புக்கிட் ஜெலுத்தோங்
• குவாசா டாமன்சாரா
• கிள்ளான்