Pang-chān:彭政閔
From Wikipedia, the free encyclopedia
Remove ads
彭政閔（1978年8月6號出世），是臺灣兮前野球選手，偏名「Chhiá-chhiah（華語：恰恰）」、「火星儂」、「火星 Chhiá」，予世界棒壘球聯盟叫做「中職先生」[1][2]，嘛夆叫做「國民球星」[3]，進入職棒了後捌做過正外野手，後來沓沓仔變做固定擔任一壘手，尾仔做指定打擊較濟。
 |
Chit phiⁿ bûn-chiuⁿ ū Pe̍h-ōe-jī ê pán-pún. Chham-khó chit phiⁿ bûn-chiuⁿ ê Pe̍h-ōe-jī pán-pún. |
_(cropped).jpg)
2019年9月29佇臺中洲際野球場舉行引退賽，並且佇彼年兮季後賽（2019年10月17）正式結束佇兄弟兮19年職業選手生涯，後來成做2019年世界野球12強賽中華隊打擊兼守備教練。2019年12月20公布，引退了後兮彭政閔對2020年開始擔任中信兄弟副領隊兼農場主管[4]。2023年5月10號，中信兄弟雄雄宣布予彭政閔接任中信兄弟一軍總教練[5]。佇彼年球季結束了後着改做二軍總教練兼農場主管。
Remove ads
生涯
彭政閔佇2001年兮季初選秀會內底予兄弟象揀着，成做彼冬兮選秀狀元，是「二代象」兮成員。捌佮隊友陳致遠、蔡豐安三个合稱「黃金三劍客」，後來閣佮陳致遠、陳冠任三个夆叫做「新黃金三劍客」，職棒生涯後期佮周思齊、林威助成做兄弟主力兮中心槌仔手。佇2005年球季，捌因為家己表現無好自按呢受氣去捶變電箱，造成手面骨折，毋過猶原達成中華職棒打擊王兮三連霸，伊五擺得着年度打擊王，是中職上濟兮球員。
佇2016年球季結束了後，中信兄弟球團佇2017年1月20宣布佮彭政閔閣簽訂一份總價值3,600萬箍新臺票兮6年合約，包含2冬球員約佮4冬教練約，其中擔任球員兮期間，月給70萬箍，逐年840萬箍，另外閣有240萬箍兮激勵獎金，兩年攏總2,160萬箍；若轉任教練，前兩冬月給15萬箍，另外閣有逐年國內外培訓費用300萬箍，逐年薪水佮培訓費用是480萬箍，兩年攏總960萬箍，後兩冬月給20萬箍，逐年薪水240萬箍，兩年攏總480萬箍[6]。
2018年6月5號，彭政閔表示這冬會是伊上尾一擺參加明星賽，閣來着會共舞台讓予較少年兮球員。毋過因為聯盟後來改變規定，所以2019年才是彭政閔明星賽兮上尾一冬。生涯明星賽人氣王15連霸，毋但是中職史上上濟，嘛是參賽上濟擺兮球員。
2019年1月30，彭政閔表示欲佇2019年球季結束了後引退，引退日會佇9月29。中信兄弟球團表示會佇彼禮拜舉辦引退賽，並且佇彼年兮球衫頂懸，全部共刺字「CHIA 23」，表示對彭政閔19冬以來兮敬意[7]。9月29，彭政閔引退賽吸引20,223个觀眾入場，拍破彼當陣兮中華職棒入場人數紀錄[8]。
2022年8月28，美國職棒大聯盟紐約大都會「臺灣日」，彭政閔穿以前球員時期兮23號兄弟球衫擔任開球嘉賓，替臺灣日活動開球，嘛成做頭一个夆邀請開球兮中職本土代表選手[9]。
2023年4月2號，佇洲際野球場佮味全龍兮比賽開始進前，中信兄弟球團舉行背號引退儀式，共伊久長以來使用兮背號「23」正式列做球團退休背號[10]。5月10號，中信兄弟雄雄共總兮換掉，彭政閔成做中信兄弟兮總教練，落尾中信兄弟佇2023年球季無法度入去季後賽，挑戰三連霸失敗[5]。12月29，中信兄弟宣布予平野惠一擔任2024年新球季兮總教練，原本兮總教練彭政閔轉任二軍總教練兼農場主管。佇2024年年尾，閣擔任2024年世界野球12強賽中華成棒隊兮打擊教練，落尾得着臺灣佇三大賽（經典賽、12強、奧運）兮頭一个冠軍[11]。
Remove ads
成棒國手經歷
特殊紀錄
- 2002年成做中職第二个達成單季3支滿壘全壘打兮球員。
- 2014年5月4號，成做中華職棒史上頭一个達成「千安百轟兩百偷」兮球員（1,423安、163轟、200偷）[13]。
- 2016年6月20，對新儂年開始連紲16冬入選明星賽，而且連紲12冬成做人氣王，創造聯盟紀錄[14]。
- 2016年8月13，佇臺中洲際野球場對戰統一獅，四局下予江辰晏
三振 ，是生涯第941擺夆三振 ，超過張泰山成做聯盟史上夆三振 上濟擺兮球員。 - 2016年10月29，以臺灣大賽第1場佮第2場單場MVP兮表現，成做2016年臺灣大賽敗隊優秀球員，嘛是生涯第2擺得着敗隊優秀球員，創造聯盟紀錄，並且以38歲閣84工成做中華職棒年歲上大兮敗隊優秀球員。
- 2017年8月9號，佇斗六野球場對戰富邦悍將，七局下予羅力
三振 ，是生涯第1,000擺夆三振 ，成做聯盟史上頭一个夆三振 一千擺兮球員。 - 2017年8月15對戰Lamigo桃猿，七局上面對林國裕，拍出正手爿兮安打，成做史上第3个達成1,000分打點兮球員。
- 2017年8月25，佇洲際野球場面對富邦悍將，三局下拍出三壘方向兮gó͘-lo͘h，因為對方三壘手高國麟接球傳去一壘兮時，傳一个bàn-tò͘，一壘手林益全雖然順利接着球，但是佮彭政閔相挵，落尾兩儂攏着傷落場[15]，彭政閔手目扭着，一直到例行賽結束攏無閣出賽，連紲球季打擊率超過三成兮紀錄停佇2016年。
- 2019年7月7號，佇新莊野球場對戰富邦悍將，2局上頭一个打席敲出中外野方向兮安打，完成個人中職生涯2,000安，成做中職史上第2个，生涯安打數嘛干焦比張泰山兮2,134支低[16][17]。
- 2019年7月17，佇大埤湖野球場，3局下兄弟攻佔滿壘，二壘兮走者是揀着保送上壘兮彭政閔，陳子豪拍出二壘安打，彭政閔走轉來第1,075分。9局下陳鴻文上場投球，彭政閔拍出倒外野方向兮穿越安打上壘，後來陳子豪拍出倒外野車布邊兮二壘安打，幫助中信兄弟拍入去延長賽，嘛予彭政閔走轉來生涯第1,076分，超過張泰山，拍破中職兮紀錄[18]。
- 2019年12月19，得着體育運動精英獎彼年兮「最佳運動精神獎」[19]。
著作
職棒生涯成績
中華職棒
- （粗烏字是彼年上好抑上懸兮成績）
- （粗紅字是聯盟歷史內底上好抑上懸兮成績）
生涯數據排名
總教練時期
Remove ads
參考資料
外部連結
Wikiwand - on
Seamless Wikipedia browsing. On steroids.
Remove ads