詞性

詞性（粵拼：ci4 sing3；英文：part of speech，簡稱 POS），又有叫詞類，係語言學術語，指一個字詞響語法上嘅性質分類。喺廿一世紀初，主流語言學問一個字詞屬於邊個詞性，一般都係講緊個字詞「喺句子入便扮演咩角色」嘅。一般至少有兩類，名詞同動詞，而形容詞同副詞，有啲有，有啲無。通常都有細類，連詞、質詞同介詞^[1]。而喺粵語同英文等嘅多種主流語言裡便，字詞都可以分做名詞、代名詞、動詞同形容詞等嘅幾種主要詞性。

英文語句 The dog ate the bone（隻狗食嚿骨，過去式）用分析樹表達嘅樣，當中每個字詞都標咗佢係邊種詞性，例如 dog 係名詞（N）。

但一般來講，呢啲分類邊界，大多數唔乾唔脆，不周不備。舉例，字詞主要分四類，名詞、動詞、形容詞同副詞。之不過，點解一般分法，無啦啦彈出代名詞一類。既有代名詞，點解唔無考慮埋代動詞、代形容詞、代副詞。可見分類祇不過隨手拿起，毫不完備。失落分類，都派入去其他類別。

另一問題。傳統分類，都基於西歐語言，而呢啲語言大多數都屬屈折語，亦即靠字變形，預先定品，喺屈拆語問題較少。然而唐話大多數寫唔變形，讀唔變聲，隨便抽隻字，都唔能講得準。或者有啲字，會傾向某種類別，但用起上來又另一種類別。例如火，自然傾向屬名詞，但火人個火，火用來形容人，就變成形容詞。若果文言寫，火之，又變成動詞。自然類別，同用起來類別，就應該分開來講。事實上，就算英文歸為屈折語，但佢屈得唔夠勁，折得唔夠深，亦遇到唐話個問題。例如walking，究竟佢係動詞，定係名詞。佢貌似動詞，但有時用起上來似名詞。love共hate，究竟要於喺邊一瓣，都會考起專家。咁就預判分類同運用起來分類，就要分開來講。文法上，運用時功能分類，顯然更加重要。

例如睇吓以下嘅粵語語句噉，就可以按照每個字詞響語句入便嘅角色，同每個字詞分詞類：

阿妹	想	食	魚蛋	。
名詞	助動詞[2]	動詞	名詞

理論基礎

内文：句法學同構詞學

響廿一世紀初嘅語言學上，一個字詞嘅詞性係由佢嘅句法同構詞特性反映嘅。

詞性係句法學^{[e 1]}上嘅一個重要概念。句法學有一種常見觀點，主張語句嘅基本組成單位並唔係字詞，而係字詞嘅類型。想像以下嘅粵語語句：

「我食咗冬甩。」

根據一般嘅觀點，如果將句嘢入面嘅冬甩換做（例如）叉燒包、的士或者阿明等嘅字詞，句嘢依然可以啱語法——縱使我食咗的士呢一句嘢意思好怪。不過，粵語咗就淨係可以黐響動詞嘅尾^[3]，如果將食換做的士，出咗的士咗噉嘅短語，成句嘢就會變到錯語法。由呢個例子睇得出，攞住一句語句，搵其中一個字詞（X）嚟睇，研究者都梗會響同一隻語言入便搵到大量嘅字詞，就算將呢啲字詞當中是但一個代入去 X 嗰個位^{[註 1]}，成句語句都仲會係合符語法嘅，而唔同 X 屬同一類別嘅字詞換咗入去 X 個位，就會搞到句嘢唔啱語法^[4]。呢個就係廿一世紀初語言學上講緊嘅詞性。

除此之外，詞性呢樣嘢亦都可以體現響構詞^{[e 2]}之上。諸如粵語、潮州話、上海話同標準官話等嘅漢語，一般畀人認為係較少詞形變化^{[e 3]}嘅，但係好似英文、法文同葡文等嘅歐洲語言就具有豐富嘅詞形變化。例如響英文裡便，一個字詞可以變眾數（通常係加個 -s 喺尾）表示個字詞指緊嘅物體有多過一件，而眾數呢一種變化淨係得名詞做得，（例如）動詞或者形容詞唔做得。亦可以睇睇英文入便嘅時態（例如由現在式變過去式）變化，係動詞先至做得嘅^[5]。

廿世紀嘅語言學家睇勻晒好多種語言，發覺以上噉嘅現象響世界各地嘅語言當中都可以觀察得到——無論係粵語等嘅漢語、英文等嘅歐洲語言、定係日文同韓文等阿爾泰語言聯盟嘅成員，都係有噉嘅情況^[6]。

註：詞性嘅定義唔取決於語義

響廿一世紀初嘅語言學上，一個字詞要分做邊個詞性，並唔係按照嗰個字詞嘅語義嚟分嘅。響廿世紀嗰陣，啲人成日都有個諗法，覺得名詞實係指物件、人或者地方，而動詞就實係指動作，但事實表明，指動作嘅字詞好多時都可以攞嚟做名詞。

响英文入便，一個動詞加咗 -ing 就可以攞嚟當名詞噉用（動名詞^{[e 4]}）。例句：

I	like	dancing	.
名詞	動詞	名詞
我	鍾意	跳舞（呢種活動）

例如語言學家兼作家湯馬士·結文提議，名詞同動詞之間嘅差異在於佢哋指嘅嘢「有幾傾向^{[註 2]}穩定或者不變」，當中名詞指嘅嘢或者特性傾向不變而動詞就比較傾向指一啲稍瞬即逝嘅嘢^[7]。

常見詞性

以下一覽式噉列出廿一世紀初嘅主要詞性分類^{[註 3][8][6]}。

名詞

内文：名詞

名詞^{[e 5]}喺廿世紀嗰陣成日被描述為「指人、地方、物件或者諗法嘅字詞」^[9]；正式啲定義嘅話，名詞會有以下嘅特性：

• 眾數：可以做詞形變化變眾數，除非係不可數名詞；
• 衍生^{[e 6]}：喺好多語言當中，唔少衍生用嘅詞尾係名詞先用得嘅，例如英文加咗 -er 指做呢樣嘢嘅人（例字：dancer，指跳舞嘅人）正路會係名詞。
• 掕其他字詞，做名詞短語嘅中心：名詞可以掕住形容詞，由形容詞提供有關佢嘅資訊，形容詞唔一定擺名詞前面——粵語、標準官話、英文同日文傾向將形容詞擺喺名詞前，不過（例如）法文同越南話就好多時都會將形容詞擺喺名詞後便。除咗形容詞，名詞仲可以掕冠詞（想像英文 the 同 a 等）、數詞（想像一個同兩個等）以及處於屬格^{[e 7]}嘅字詞（簡化講就係佢嘅同我嘅等表示「屬於邊個」嘅字詞）。
• 互相修飾：一個名詞，有可能用嚟修飾第個名詞，粵語口語可以有嘅例子：「木門」、「語言學課堂」... 等等。

名詞仲可以再細分。例如分做專有名詞^{[e 8]}同普通名詞^{[e 9]}：如果話一個名詞係專有名詞，意思係指隻名詞指緊一件特定嘅物體，例如歐洲（指緊一笪地方）、阿莊（指緊一個人）或者微軟（指緊一間企業）都係固有名詞。相比之下，一個普通名詞會係指緊一類嘅物體，例如大陸、人類同企業都係普通名詞。

其他

• 動詞
• 形容詞
• 副詞
• 代名詞
• 介詞
• 連接詞
• 感嘆詞
• 數詞
• 量詞
• 冠詞

開放定封閉

睇埋：虛詞同實詞

詞類可以分做開放同封閉兩種，所謂嘅開放詞類^{[e 10]}係指呢啲詞類隨時都可以有新字詞加入，而封閉詞類^{[e 11]}就指好少可會有新字詞成功噉加入，例如喺英文入面，名詞、動詞、形容詞同副詞係開放詞類，而淨低嗰啲詞類就一般認為係封閉詞類，好似代名詞就係噉^[10]。

睇埋

• 詞類轉換^{[e 12]}：某啲語言入面有嘅一種現象，講緊一隻語言嘅使用者創造新字詞，期間攞咗一隻既有嘅字詞嚟用，但係隻既有字詞同隻新字詞喺詞性上唔同。例如英文啲字詞要變名詞往往要加 -ing、-ness、-ion 等嘅詞尾，而詞類轉換就係指唔做呢啲變化就（例如）直接攞咗一隻形容詞當係名詞噉用^[11]。
• 詞性標注
• 語序
• 字詞

文獻

• Croft, W. (2005). Word classes, parts of speech, and syntactic argumentation (PDF). Linguistic Typology, 9(3), 431-441.

註釋

1. 假設撇除咗詞形變化：例如英文 an apple 可接受但 an apples 唔可以，因為後者做咗詞形變化變眾數而 a 呢隻非指定冠詞只可以掕單數嘅名詞。
2. 可以睇返原型理論。
3. 以下嘅分類法建基於歐美嗰套語言學。有關呢套分類法係咪適用於漢語，廿一世紀初嘅學界有些少爭議。