遊戲改檔

基本諗頭

乜嘢係 mod？Mod 係英文 modification（改造噉解）嘅簡稱，指由用家對視像遊戲做嘅編輯，可以算係同人小說嘅遊戲版。Mod 傳統上係免費嘅，可以係稍為改改啲碼嚟修正錯誤或者令隻遊戲玩得順暢啲，以至完全轉化——即係大幅度噉改啲美術資產，創造全新嘅遊戲體驗。^[3]

改檔簡單嘅可以係改遊戲世界某啲物件嘅皮檔案（可以改變啲物件嘅樣），複雜啲嘅可以係加入全新嘅遊戲資產。

修補

内文：非官方修補

非官方修補^{[e 1]}係指隻 mod 整嚟係修正隻遊戲嘅某啲錯誤嘅，又或者係畀玩家睇到一啲原先睇唔到嘅遊戲內容。

「畀玩家睇到一啲原先睇唔到嘅內容」呢種情況有一個出名例子，就係二〇〇四年俠盜獵車手：聖安地列斯^{[e 2]}嘅熱咖啡模組：呢隻遊戲整嚟就係預咗畀大人玩嘅，原先預定會有隻小遊戲畀玩家控制住主角同主角嘅女朋友做愛；不過製作組諗諗吓，覺得噉搞法隻遊戲恐怕會引起大爭議，於是就將隻小遊戲收埋——佢哋並冇剷走隻小遊戲嘅源碼^{[註 1]}，只係剷走咗玩家可以用嚟玩嗰隻小遊戲嘅渠道；而隻遊戲出咗街之後，有玩家發現咗呢隻小遊戲嘅檔案，就整咗個 mod 將隻小遊戲「解鎖」，令到玩家群玩得到隻小遊戲，而遊戲主角同佢啲女朋友做愛嘅影片引起咗公眾譁然^[4]^[5]。

修改程度

改檔可以按「對遊戲內容作出幾大程度嘅修改」嚟分類。

一方面，改檔可以係純粹加少量嘅內容，形成所謂嘅附加檔^{[e 3]}，簡單嘅可以係例如改改遊戲主角嘅髮型或者主角件衫呀噉，當中模擬市民系列^{[e 4]}喺呢方面就出晒名——隻遊戲屬於模擬遊戲，畀玩家創造模擬人，起屋畀啲模擬人住，並且掌控啲模擬人嘅日常生活（飲食瞓玩等），玩家亦可以決定模擬人嘅外型，包括啲模擬人要著咩衫，而呢個遊戲系列嘅 fans 成日都幫隻遊戲改檔，加多啲唔同嘅衫畀啲模擬人揀，或者加多啲唔同嘅虛擬傢俬可以擺入啲虛擬屋入便... 等等^[6]；附加檔嘅例子，仲可能有同一隻射擊遊戲添加戰鬥地圖，同一隻 RPG 添加新嘅遊戲道具，或者係同一隻賽車遊戲添加新嘅賽道呀噉^[7]。呢啲噉嘅 mod，純粹係基於隻遊戲已有嘅內容，幫某啲類型嘅遊戲事物添加新嘅成員。

另一方面，又有啲 mod 會畀人稱之為大改^{[e 5]}，會增加新嘅遊戲機制，但未至於完全令到隻遊戲變咗第種體驗。玩家整呢種 mod 嘅目的，通常係為咗想「改良」隻遊戲。

自成遊戲

睇埋：獨立遊戲

唔少熱愛電子遊戲嘅人都有興趣創造屬於自己嘅遊戲。佢哋當中有啲會走去學同自己做遊戲開發，同時又有啲會整大改型嘅 mod 改造自己手上嘅遊戲。喺後者呢種情況下，有可能玩家係噉改檔，改改吓令隻遊戲嘅 mod 版本同原版有咗顯著嘅差異，唔再畀人認為係同一隻遊戲；個 mod 版本仲可能會大受歡迎好多人玩，最後好似自成咗一隻新遊戲噉嘅樣^[8]^[9]。呢種噉嘅 mod 就係所謂嘅完全轉化^{[e 6]}。

著名英雄射擊遊戲絕地要塞 2 ^{[e 7]}就係完全轉化嘅一個出名例子：絕地要塞 2 呢隻遊戲一度風靡全球，係 Steam 平台上便最多人玩嘅遊戲之一；呢隻遊戲起源自一九九六年雷神之鎚^{[e 8]} ——雷神之鎚係一隻第一身射擊遊戲，有提供畀玩家對局嘅死亡競賽遊戲模式；隻遊戲非常之受歡迎，吸引咗好多玩家嚟玩同埋整改檔，當中有個檔叫做絕地要塞，為隻遊戲添加咗職業^{[e 9]}嘅概念，畀每位玩家揀一個職業，而每個職業有自己嘅一套特殊能力；個改檔吸引咗好多玩家，及後仲由美國嘅 Valve 製作組將佢整咗做一隻遊戲叫絕地要塞，唔使裝落雷神之鎚嗰度都玩得^[10]。及後製作組喺二〇〇七年出咗絕地要塞 2 做絕地要塞嘅續作——玩家貪得意整改檔最後出咗隻經典遊戲^[11]。

Remove ads

Mod 開發

睇埋：加密同代碼難讀化

要改檔，第一步就係要搵想改嘅數據。呢點就隻隻遊戲都唔同，有啲遊戲開發者會將隻遊戲整到對改檔友善^{[e 10]}，例如二〇〇〇年嘅模擬遊戲模擬市民^{[e 11]}就將遊戲角色嘅皮檔案（啲角色嘅外型）以 BMP 快勞嘅形式擺晒喺目錄裡便^[12]，玩家攞住小畫家等嘅簡單工具都可以改呢啲快勞；有啲開發者甚至仲會將隻遊戲嘅源碼公開，玩家可以任意攞啲源碼去改；另一方便，遊戲開發者梗會或多或少噉保護遊戲快勞，例如係唔想啲內容太易改，費事玩家唔小心改軭咗隻遊戲，有部份開發者因而會用進階嘅加密將隻遊戲嘅數據「鎖住」唔畀人改，玩家要用專化嘅工具先可以開到隻遊戲嘅數據嚟睇^[13]。

改造架生

内文：十六進制編輯器同反編譯器

玩遊戲改檔成日都會用到反編譯器^{[e 12]}。反編譯器係一種喺還原工程上好常用嘅工具^[14]^[15]，屬於一類電腦程式，特徵係識得將行得到嘅二進制格式檔案，轉化做高級程式語言源碼，即係例如個反編譯器能夠（簡化講）睇住一個遊戲程式行嗰陣，佢用嗰啲數據點樣變化（機械語言或者組合語言會表達嘅嘢），砌返出一段能夠出到相同功能嘅 Python 源碼。喺廿一世紀初嘅世界，遊戲界甚至仲有埋一啲開源嘅反編譯架生，例如係 dnSpy 噉。

十六進制編輯器^{[e 13]}係一種工具，容許用戶睇同編輯檔案嘅原始二進制數據。電腦檔案係以一系列字節嘅形式儲住嘅，而十六進制編輯器就會用十六進制格式表示呢啲字節，呢種格式比起二進制更加易讀。每一對十六進制數字對應一個字節，而編輯器通常仲會顯示一欄附加嘅 ASCII（文字）等價數據。因此，十六進制編輯器可以用嚟分析或者修改一般編輯器無法存取嘅數據^[16]。

玩改檔嗰陣，十六進制編輯器適合用嚟改二進制檔案入面嘅遊戲數據，例如行得嘅檔案（.exe 或 .dll）、存檔檔案或者設定檔案。玩改檔嘅人可以篡改特定數值——例如角色嘅生命值或者其他屬性，從而修改隻遊戲。舉個例，玩家嘅最大生命值以數值形式儲咗喺遊戲數據入面，玩改檔嘅人可以用十六進制編輯器搵呢個數值出嚟，將佢轉換成十六進制，然後再做想要嘅更改。因此，十六進制編輯器對玩遊戲改檔嘅人嚟講好有用。

用十六進制編輯器打開咗個檔案