Brasil
País d'América / From Wikipedia, the free encyclopedia
El Brasil[1], oficialmente República Federativa do Brasil, ye'l país más grande d'América del Sur y el quintu más grande y pobláu del mundu, con 8,5 millones de km² d'estensión y una población de más de 208 millones d'habitantes. La so capital nacional ye Brasilia, que sustituyó a Rio de Janeiro en 1960, y la ciudá más poblada ye São Paulo. El país ta formáu por 26 estaos y un distritu federal, sodividíos en 5.570 conceyos. Ye'l país más grande que tien el portugués como llingua oficial, y ún de los más multiculturales y con mayor diversidá étnica del mundu.
Arrodiáu pol océanu Atlánticu al este, Brasil tien 7.491 km de costa, y llenda con toos menos dos de los países sudamericanos: Chile y Ecuador. Al norte llenda con Colombia, Venezuela, Guyana, Surinam y Guyana Francesa; al sur Arxentina, Uruguái y Paraguái; al este l'Océanu Atlánticu y al oeste Bolivia y Perú. La conca del ríu Amazones inclúi una xigantesca viesca tropical, bayurosa en recursos naturales y minerales, que ye l'hábitat de pueblos indíxenes que gocien de proteición llexislativa.
El Brasil actual taba habitáu por bien de naciones tribales primero de que, en 1500, aportara a elli Pedro Álvares Cabral, que reclamó les tierres nes que desembarcó pal Imperiu portugués. Siguió siendo una colonia d'esi país hasta 1808, cuando la capital del imperiu, nel contestu de les guerres napoleóniques, foi treslladada de Lisboa a Rio de Janeiro. En 1815 la colonia foi elevada al estatus de reinu cola formación del Reinu Xuníu de Portugal, Brasil y Algarve. La independencia brasilana producióse en 1822 cola creación del Imperiu de Brasil, un estáu xunitariu gobernáu por una monarquía constitucional y con un sistema parllamentariu. La ratificación de la primer constitución del país en 1824 llevó a la formación d'un parllamentu bicameral, niciu del actual Congresu Nacional. El país convirtióse nuna república presidencial en 1889, tres d'un golpe d'estáu. En 1964 xubió al poder una xunta militar, que gobernó el país hasta 1985. L'actual constitución brasilana, aprobada en 1988, define'l país como una república federal democrática.
Brasil ye una potencia económica emerxente: tien l'octavu productu interior brutu (nominal y en paridá de poder adquisitivu) del mundu, y suma a un sector agrícola perpotente un vigorosu sector industrial. Ye una potencia rexonal, considerada como una potencial superpotencia por dellos autores. Ye miembru fundador de les Naciones Xuníes, el G20, el BRICS, la Xunión de Naciones Suramericanes, Mercosur, la Organización de los Estaos Americanos, la Organización d'Estaos Iberoamericanos pa la Educación, la Ciencia y la Cultura y la Comunidá de Países de Llingua Portuguesa.