Індзеец (сузор’е)

Індзе́ец (па-лацінску: Indus, Ind) — сузор’е ў паўднёвай частцы зорнага неба, створанае ў канцы XVI стагодзьдзя. Слова «індзеец» у тыя часы магло тлумачыцца як карэнны жыхар Амэрыкі або Азіі.

Пра карэннае насельніцтва Амэрыкі глядзіце артыкул Індзейцы.

Індзеец
Сьпіс зорак у сузор’і Індзейца
Лацінская назва	Indus
· у родным склоне	Indi
· скарот	Ind
Простае ўзьняцьцё	21г
Схіленьне	−55°
Квадрант	SQ4
Плошча	294 кв. гр. (49-е)
Зорак паводле Баера/Флэмстыда	16
Зорак з плянэтамі	2
Зорак ярчэй за 3.00m	0
Зорак у 10 пк (32,62 сьв. г.)	1
Найярчэйшая зорка	α Ind (3,11m)
Найбліжэйшая зорка	ε Ind (11,83 сьв. г., 3,62 пк)
Аб’екты Мэсье	0
Памежныя сузор’і	Мікраскоп Стралец (кутамі) Тэлескоп Паўлін Актант Тукан Журавель
Назіраецца ў шыротах паміж +15° і −90°. Найлепш назіраецца ў 21:00 на працягу верасьня.

Адметнасьці

Сузор’е Індзеец у начным небе.

У Індзейцы ня маецца яскравых зорак. Найярчэйшай зоркай сузор’я зьяўляецца α Індзейца — аранжавы гігант зорнай велічыні 3,1, які знаходзіцца за 101 сьв. год ад Зямлі. β Індзейца — таксама аранжавы гігант зорнай велічыні 3,7, што знаходзіцца за 600 сьв. гадоў ад Зямлі. δ Індзейца — белая зорка зорнай велічыні 4,4 за 185 сьв. гадоў ад Зямлі.

ε Індзейца — адна з найбліжэйшых да Зямлі зорак — адлегласьць да яе складае каля 11,8 сьв. гадоў. Гэта аранжавы карлік зорнай велічыні 4,7 — жоўты карлік Сонца толькі крыху большы і гарачэйшы.^[1] У сыстэме была знойдзеная таксама падвойная пара карычневых карлікаў, якая здаўна зьяўляецца прыярытэтным кандыдатам для дасьледваньняў SETI.^[2]

Індзеец ёсьць прыстанкам для яскравай падвойнай зоркі θ Індзейца, кампанэнты якой можна адрозьніць у невялікі аматарскі тэлескоп. Сыстэма знаходзіцца за 97 сьв. гадоў ад Зямлі; першасны кампанэнт — белая зорка зорнай велічыні 4,5, другасны кампанэнт — белая зорка з зорнай велічынёй 7,0.^[1]

T Індзейца — адзіная яскравая зьменная зорка ў сузор’і. Гэта паўправільны чырвоны гігант з пэрыядам у 11 месяцаў, які знаходзіцца за 1900 сьв. гадоў ад Зямлі. Мінімальная зорная велічыня складае 7, максымальная — 5.^[1]

Гісторыя

Індзеец быў адным з дванаццаці сузор’яў, створаных Пэтэрам Плянцыем паводле назіраньняў Пітэра Дырксона Кейсэра і Фрэдэрыка дэ Гаўтмана.^[1] Упершыню сузор’е было выяўлена на 35-см нябесным глёбусе, створаным у 1597 (або 1598) годзе Плянцыем і Ёдакусам Хондыем. У 1603 годзе сузор’е было выяўлена ў зорным атлясе Ёгана Баера — «Уранамэтрыі».^[3] Плянцыюс выяўляў сузор’е як аголенага чалавека са стрэламі, які ня меў луку.^[4]