Ганус Даўгердавіч

Ганус Даўгердавіч (? — па 1481) — дзяржаўны дзяяч Вялікага Княства Літоўскага, староста мерацкі (1481).

Ганус Даўгердавіч
лац. Hanus Daŭgierdavič / Daŭhierdavič

Асабістыя зьвесткі
Памёр	па 1481
Бацькі	Даўгерд
Дзеці	Якуб

Вотчынныя ўладаньні знаходзіліся ў Ашмянскім павеце (найперш — Відзы).

Імя

Асноўныя артыкулы: Ганус (імя) і Даўгерд (імя)

Ганус (Hanus, Hannus) — імя германскага паходжаньня^[1][2], варыянт імя Ёганэс (Johannes)^[3][4].

Варыянты імя ў гістарычных крыніцах: Hannus Dagirdowicz (6 лютага 1481 году)^[5], Ганусъ Дякгирдовичъ (18 сакавіка 1496 году)^[6], Ганус Дягирдович (9 красавіка 1499 году)^[7], Hanus Dawgyerdowycz або Hannusz Dagyrdowycz (10 траўня 1503 году)^[8].

Біяграфія

Зь літоўскага баярскага роду, сын Даўгерда, старосты ашмянскага. Меў брата Федзьку і сястру Кацярыну.

У 1481 годзе быў старостам мерацкім. Упамінаецца 10 траўня 1503 году, калі яго сястра прадала свой маёнтак у Менскім павеце.

Меў сына Якуба.

6 лютага 1481 году разам з братам фундаваў касьцёл у Відзах. 5 сакавіка 1481 году зрабіў яшчэ адно наданьне гэтаму касьцёлу^[9].

Мова і культура

Асноўныя артыкулы: Ліцьвіны і Русіны

У сваім супольным з братам Хведзькам (Chwyedko) лацінамоўным наданьні касьцёлу ў Відзах, зробленым у 1481 годзе, упамінуў «народныя» назвы «пуды» (pvdy) і «на тры сьцірты» (alias na trzy sterty)^[10]. Гэта адпавядае многім іншым тагачасным лацінскім граматам літоўскіх князёў і баяраў, дзе з азначэньнем «народны» («гутарковы») падаваліся менавіта беларускія словы^[11].