Ясень (Магілёўская вобласьць)

Я́сень^[1] — вёска ў Асіпавіцкім раёне Магілёўскай вобласьці. Адміністрацыйны цэнтар Ясенскага сельсавету.

Гэтая назва мае некалькі сэнсаў. Калі вас цікавяць іншыя сэнсы, глядзіце таксама Ясень (неадназначнасьць).

Ясень
трансьліт. Jasień
Краіна:	Беларусь
Вобласьць:	Магілёўская вобласьць
Раён:	Асіпавіцкі раён
Сельсавет:	Ясенскі
Насельніцтва
колькасьць:	471 чал.
колькасьць двароў:	169
Часавы пас:	UTC+3
Тэлефонны код:	+375 2235
Паштовы індэкс:	213741
Геаграфічныя каардынаты:	53°15′14.3″ пн. ш. 28°55′43.7″ у. д.
Ясень на мапе Беларусі Ясень

Гісторыя

Каля вёскі знаходзіцца археалягічны помнік — курганны могільнік з 20 насыпаў, які належыў дрыгавічам і датуецца да 11—13 стагодзьдзяў. Сама вёска вядома з 16 ст., у 1524 — сяло, шляхецкая ўласнасьць. У 1579 дзейнічала царква. У 1581 сяло было ў складзе прыватнага маёнтка Глуск Рэчыцкага павету Менскага ваяводзтва ВКЛ. Ад 1793 у складзе Расейскай імпэрыі.

Ад 1795 у Бабруйскім павеце Менскай губэрні. У сярэдзіне 19 ст. вёска зьяўлялася ўласнасьцю памешчыка Лойкі. У 1897 у Замоскай воласьці Бабруйскага павету, было 70 сялянскіх гаспадарак, 80 жылых пабудоваў, 532 жыхары, працавалі царква, хлебазапасны магазін, вінная лаўка, млын. Побач зь вёскай знаходзілася аднайменная сядзіба. У 1907 адчыненая народная вучэльня.

Пасьля кастрычніцкага перавароту на базе народнае вучэльні створана працоўная школа 1-й ступені. У 1922 адкрыта хата-чытальня. У траўні 1942 нямецкія карнікі спалілі вёску і загубілі 11 яе мірных жыхароў. У 2001 было 182 двары, 469 жыхароў. У 2007 годзе 169 гаспадарак, 471 жыхар^[2].

Помнікі

У вёсцы знаходзяцца помнікі памяці настаўнікаў і вучняў мясцовай школы, якія загінулі ў 1941—1945. Таксама ўсталяваныя помнікі на магілах савецкага лётчыка А. Баранава, які загінуў у баі ў 1941, і Героя Сацыялістычнай Працы А. М. Гарбацэвіча.