Akute

«Akute» (Акутэ) — музычны гурт з Магілёва, заснаваны ў 2008 годзе ў складзе дуэту былых удзельнікаў гурта «Глюкі», сьпевака Стаса Мытніка і бас-гітарыста Рамана Жыгарава.

Akute
Гады	Зь 2008-га
Краіна	Беларусь
Месца ўтварэньня	Магілёў (Беларусь)
Мова	Беларуская
Жанр	Рок, пост-панк
Выдавец	«Вігма»
Удзельнікі	Стас Мытнік, Раман Жыгараў
Былыя ўдзельнікі	Павал Емяльянаў, Павал Філатаў, Vicky Fates
akutemusic.net

Мінуўшчына

Упершыня гурт выступіў прыканцы жніўня 2009 г. на фэстывалі «Прыход» пад Магілёвам^[1]. Першая ж студыйная песьня «Адзіноцтва», прадстаўленая ў лістападзе, заняла ІІІ месца ў гіт-парадзе «Tuzin.fm» за 2010 год^[2]. 26 чэрвеня выступіў на фэстывалі Be2gether (вёска Нарвілішкі, Салечніцкі раён, Віленскі павет, Летувіская Рэспубліка)^[3]. Таксама перамог на «Басовішчы» (Польшча)^[4] і «Верціфэсьце» (Украіна), заняў другое месца на «Адкрытым музычным сьвяце Графіці» (Менск). Увосень запісаў усе песьні будучага першага альбому на магілёўскай студыі «Арзамас-16».

У чэрвені 2011 году выйшаў першы альбом «Дзевачкі і космас», за які гурт адзначылі ў намінацыі «Прарыў году» на «Рок-каранацыі». 21 красавіка 2012 г. у менскі клюбе «Рэпаблік» адбылася прэзэнтацыя другога альбому «Не існуе»^[5]. У верасьні граў на разагрэве ў брытанскага гурта Placebo. У сьнежні стаўся гуртом году паводле «Тузіну гітоў». Песьні гурта ўвайшлі ў саўндтрэк маладзёвага фільму «Вышэй за неба».

Ацэнкі

Зьміцер Падбярэскі сказаў пра гурт у 2014 годзе так: «„Akute“ — гэта „ULIS“ сёньняшніх часоў»^[6].

Віталь Маціеўскі, франтмэн гурта «Open Space», ацаніў пераможны выступ гурта на «Басовішчы-2010»: «Яны ўвогуле малайцы! Яны скамбавалі эўрапейскі саўнд з беларускай моваю. Я з задавальненьнем слухаю іх песьні»^[7][8].

Дыскаграфія

• «Дзевачкі і космас» (2011)
• «Kroŭ»^[9] (люты 2012)
• «Не існуе»^[10] (2012)
• «Ihołki»^[11] (кастрычнік 2012)
• «Рэальнасць і сны» (2014)
• «Пластыка» (2016)
• «V» (2019)^[12]
• «Напалову тут» (2022)

Узнагароды

• 2010 — галоўныя ўзнагароды «Басовішча» (Гарадок, Беластоцкі павет, Падляскае ваяводзтва, Рэспубліка Польшча) і «Верціфэсту» (Кіеў, Украіна)^[13].
• 2012 — гурт году паводле «Tuzin.fm», Ultra-Music^[14].
• 2013 — артысты году паводле прэміі «Рок профі»^[15].

Фэстывалі

• 2009 — «Прыход» (Магілёўскі раён, Беларусь)
• 2010 — Be2gether (Летува), «Басовішча» (Польшча), «Верціфэст» (Украіна)
• 2011 — Канцэрт на траве (хутар Шаблі, Валожынскі раён, Менская вобласьць)
• 2012 — Пікнік.by (Менск), Рок па вакацыях (Менск)
• 2013 — Мост (Баравая, Менскі раён), «Галапагаі» (Езяросы, Уцянскі павет, Летува)^[16], «Самаход» (Менск)^[17], «Men's Fest» (Берасьце)^[18]