ESET

ТАА ESET (па-славацку: ESET, spol. s r.o.) — славацкая фірма-вытворца праграмнага забесьпячэньня і рашэньняў у галіне кампутарнае бясьпекі, заснаваная ў 1992 року. Штаб-кватэра знаходзіцца ў Aupark Tower (Браціслава), філіі — у Буэнас-Айрэсе, Сан-Дыега, Сан-Паўлу, Манрэалі, Сынгапуры, Празе, Кракаве, Кошыцах і Маскве^[4]. Дзейнічае ў больш як 180 краінах сьвету.

ESET
Тып	Таварыства з абмежаванай адказнасьцю
Заснаваная	1992
Заснавальнікі	Міраслаў Трнка Пэтэр Пашка Рудольф Грубы
Уласьнікі	Miroslav Trnka[d], Rudolf Hrubý[d], Peter Paško[d], Richard Marko[d], Maroš Grund[d] і Anton Zajac[d]
Краіна	Славаччына[1]
Разьмяшчэньне	Браціслава
Ключавыя фігуры	Рыхард Марка (генэральны дырэктар)
Галіна	Распрацоўка праграмнага забесьпячэньня
Прадукцыя	Сьпіс прадуктаў[2] ESET NOD32 Antivirus (Windows, Linux) ESET Smart Security (Windows) ESET Cyber Security (Mac OS X) ESET Mobile Security (Android, Windows Mobile, Symbian) ESET Endpoint Security (Windows)
Апэрацыйны прыбытак	115 млн € (2009)
Чысты прыбытак	68,1 млн € (2018)[3]
Лік супрацоўнікаў	▲ 800
www.eset.com
ESET у Вікісховішчы

Назоў кампаніі ўяўляе сабой абрэвіятуру ангельскага выразу «Essential Security against Evolving Threats» — эфэктыўная абарона ад эвалюцыянуючых пагрозаў.

Мінуўшчына

Гісторыя кампаніі бярэ пачатак у 1987 року, калі два маладыя праграмоўцы Пэтэр Пашка і Міраслаў Трнка, знайшоўшы адзін зь першых кампутарных вірусаў, які атрымаў назву «Вена», напісалі праграму для ягонага выяўленьня. Антывірус для апэрацыйнае сыстэмы MS-DOS атрымаў назву NOD.

Пазьней са зьяўленьнем іншых вірусаў было вырашана стварыць праграмнае рашэньне для барацьбы зь невядомымі відамі пагрозаў. З гэтай мэтаю ў 1992 року шляхам аб’яднаньня з кампаніяй Рудольфа Грубага была заснаваная фірма «ESET».

У 1998 выйшаў NOD32 1.0 для Microsoft Windows, у 2003 зьявілася вэрсія 2.0. Апошняя вэрсія NOD32 пад нумарам 2.70.39 выйшла ў лістападзе 2006 року і мела падтрымку Windows Vista.

У лістападзе 2007 быў прадстаўлены NOD32 Antivirus 3.0, а таксама новы праграмны прадукт ESET Smart Security, які камбінаваў антывірусную праграму ESET NOD32 з функцыяй фаерволу і антыспаму.

У 2010 року «ESET» выдаў антывіруснае рашэньне пад назовам ESET Cybersecurity для Mac OS X, а праз год — для АС Linux.

Для мабільных прыладаў пад кіраваньнем Windows Mobile, Symbian ці Android існуе антывірусны прадукт ESET Mobile Security.

Узнагароды

Стала першай славацкай кампаніяй, якая тройчы (2008, 2009 і 2010) станавілася фірмай году паводле апытаньня TREND TOP Фірма году.

У 2011 року ESET была названая адною з найбольш інавацыйных кампаніяў Эўропы і ўдастоеная ўзнагароды HSBC European Business Awards.

Кампанія ўваходзіць у сьпіс найбольш разьвітых кампаніяў у сфэры высокіх тэхналёгіяў паводле рэйтынгу Deloitte Technology Fast 50 у рэгіёне Эўропы, Блізкага Ўсходу і Афрыкі (EMEA).