Андрэй Лаўрык

Андрэ́й Ла́ўрык (нар. 7 сьнежня 1974 году) — беларускі футбаліст і футбольны трэнэр, гуляў на пазыцыі абаронцы. У 1997—2005 гадах выступаў за нацыянальную зборную Беларусі. Найлепшы футбаліст Беларусі 1997 году.

Андрэй Лаўрык
Пэрсанальная інфармацыя
Нарадзіўся	7 сьнежня 1974(1974-12-07)[1][2] (50 гадоў) Ігумен, Менская вобласьць, БССР, СССР[3]
Пазыцыя	абаронца, паўабаронца
Клюбы
Гады	Клюб	Гульні (галы)¹
1992—1995	Дынама-93	94 (1)
1996—1997	Дынама Менск	51 (9)
1998—2001	Лякаматыў Масква	86 (1)
2002—2003	Дынама Санкт-Пецярбург[d]	64 (10)
2004—2007	Амкар Перм	89 (4)
2008	Тарпэда Масква	5 (0)
2008—2009	Актабе	37 (2)
2010	Балтыка	3 (0)
2010	Тарпэда-БелАЗ	16 (2)
Зборныя
1992—1995	Беларусь (да 21)	5 (1)
1997—2005	Беларусь	37 (1)
Трэнэрскія клюбы
2014	Партызан Менск
2015	Бяроза-2010

Кар’ера

Клюбная

Пачынаў гуляць у ДЮСШ гораду Ігумену Менскай вобласьці, дзе першым ягоным трэнэрам быў Аляксандар Чарнавец. Пазьней далучыўся да школы менскага «Дынама», дзе трэнаваўся ў Юрыя Пышніка і Івана Шчокіна. Выступаў за фарм-клюб «Дынама-93», які ў 1992—1993 гадах меў назоў «Дынама-2» і «Беларусь». Таксама быў футбалістам сталічнага «Дынама», дзе асабліва ўдалым стаў сэзон 1997 году, калі паўабаронца адзначыўся васьмю галамі^[4]. Пасьля гэтага быў футбалістам расейскіх клюбаў «Лякаматыў» і «Дынама» з Санкт-Пецярбургу.

З 2004 па 2007 гады гуляў за пермскі «Амкар». У сэзоне 2007 году перастаў трапляць у асноўны склад, паколькі галоўны трэнеэ Рашыд Рахімаў зрабіў стаўку на Нікалу Дрынчыча. 24 студзеня 2008 году на правах свабоднага агента перайшоў у расейскае «Тарпэда», якое тады спаборнічала ў першым дывізіёне. Згуляўшы ў 5 матчах першынства 2008 году, 29 красавіка 2008 году пакінуў каманду ў сувязі з датэрміновым скасаваньнем працоўнай дамовы. У ліпені 2008 году склаў паўгадавы кантракт з чэмпіёнам Казахстану «Актабе». У студзені 2009 году працягнуў кантракт яшчэ на год. У сакавіку 2010 году ўзгадніўся з «Балтыкай»^[5], але, у сувязі з тым неўзабаве ў клюбе ўзялі курс на амаладжэньне складу, футбаліст перайшоў у жодзінскае «Тарпэда»^[6], дзе і завяршыў кар’еру, дагуляўшы сэзон.

Міжнародная

Згуляў 37 матчаў у складзе зборнай Беларусі, адзначыўшыся адзіным голам, які правёў у браму зборнай Польшчы.

Трэнэрская праца

З 2011 году Лаўрык працаваў у якасьці трэнэра-асыстэнта Сяргея Гурэнкі ў «Тарпэда-БелАЗ», атрымаўшы трэнэрскую катэгорыю «В». У лютым 2014 году ачоліў менскі «Партызан»^[7]. У верасьні 2014 году пакінуў каманду ў сувязі зь зьняцьцём клюбу з спаборніцтваў у Другой лізе праз банкруцтва. З 2017 па 2018 гады працаваў спартовым дырэктарам у менскім «Дынама», але пакінуў клюб праз канфлікт з галоўным трэнэрам Сяргеем Гурэнкам. Увосень 2018 году стаў трэнэрам-сэлекцыянэрам берасьцейскага «Дынама»^[8]. Улетку 2020 года зноў стаў спартовым дырэктарам менскага «Дынама»^[9]. На гэтай пасадзе працаваў да 2022 году^[4].