Менскі завод безалькагольных напояў

«Менскі завод безалькагольных напояў» — прамысловае прадпрыемства Беларусі, заснаванае ў 1966 годзе.

«Менскі завод безалькагольных напояў»
наркам. «Мінскі завод безалкагольных напояў»
Тып	закрытае акцыйнае таварыства
Дэвіз	Экспэрт у індустрыі напояў
Заснаваная	1966 (59 гадоў таму)[1]
Заснавальнікі	бровар «Беларусь»
Уласьнікі	Анатоль Арцюхоўскі
Краіна	Беларусь
Разьмяшчэньне	Менск
Адрас	Першамайскі раён, вуліца Макаёнка, дом 19[2]
Ключавыя фігуры	Анатоль Арцюхоўскі (генэральны дырэктар)
Галіна	харчовая прамысловасьць
Прадукцыя	кола, бярозавы сок, энэргетычны напой, квас, халодная гарбата, морс, мінэральная вада, пітная вада, ліманад, газаваная вада
Лік супрацоўнікаў	700 (2014 год)
mzbn.com

На 2025 год «МЗБН» меў праектную магутнасьць у 210 млн літраў за год^[3].

Вырабы

На 2025 год «Менскі завод безалькагольных напояў» вырабляў:

• «Бела-колу» з цукрам і «Бела-колу Лайт» з фруктозай і трыма заменьнікамі цукру, сярод якіх былі цыклямат натру, ацэсульфам калю і цукрынат натру, у плястыкавых пляшках па 0,5, 1 і 2 літры^[4];
• «Бярозавік» з цукрам і безь яго ў пляшках па 0,5 і 1 літры^[5];
• 4 найменьні энэргетычнага напою «Бізон» у пляшках па 375 і 500 мл, у тым ліку з таўрынам, апэльсінавым сокам, этэрным алеем цытрыны і лайма^[6];
• газаваны квас «Квасыч» у пляшках па 1 і 2 літры^[7];
• 3 найменьні «Ледзяной гарбаты» у пляшках па 0,5 і 1 літры з выцяжкай зялёнай гарбаты^[8];
• «Я-годны» морс у літровых пляшках з сока чорных і чырвоных парэчак, а таксама з даданьнем вінаграднага соку^[9];
• лекава-сталовую хлярыдна-натравую фторзьмяшчальную мінэральную ваду «Менская-4» са сьвідравінаў № 4, 5 і 7 глыбінёй 390, 380 і 360 м адпаведна ў пляшках 0,5 і 1, 1,5 і 2 літры^[10];
• 6 найменьняў «Менскай» пітной вады са сьвідравінаў № 8 і 9 глыбінёй 280 і 110 м у пляшках 0,5 і 1, 1,5 і 2, 5 і 10 літраў, у тым ліку газаваную з водарам парэчак і цытрыны^[11];
• 4 найменьні соказьмяшчальнага напою «Мультытэль» у пляшках па 0,5, 1 і 1,5 літры з маракуйным, кавуновым, апэльсінавым і ажынавым сокам^[12];
• газаваны ліманад «Расінка» ў пляшках па 0,5 і 1, 1,5 і 2 літры^[13];
• 4 найменьні газаванай вады «Поп шот» у пляшках па паўлітры зь даданьнем яблычнага соку^[14];
• 3 найменьні газаванай вады «Фан-фан» у пляшках па 0,5, 1 і 2 літры з апэльсінавым і мандарынавым алеем, а таксама з цытрынавым сокам^[15];
• 3 найменьні соказьмяшчальных напояў «Фантастык» з клубнічным, малінавым і кавуновым сокам^[16];
• 3 найменьні халоднай гарбаты «Фанці» з выцяжкай зялёнай і чорнай гарбаты^[17];
• 3 найменьні энэргетычнага напою «Слэм» для пастаўкі за мяжу^[18];
• газаваны ліманад «Лемув»^[19].

Мінуўшчына

У 1966 годзе каля менскага парку Чалюскінцаў (Беларуская ССР) прабурылі 418-мэтровую сьвідравіну для здабычы вады, пры якой утварылі адасоблены цэх безалькагольных напояў бровара «Беларусь»^[20]. У 1967 годзе цэх пераўтварылі ў «Менскі завод безалькагольных напояў» («МЗБН»), які ўлучылі ў склад створага дзяржаўнага аб'яднаньня «Белпіва». У 1973 годзе пачалі вырабляць соказьмяшчальныя напоі. У 1975 годзе стварылі вытворчасьць напояў на аснове араматычных траваў і гарбаты. У 1978 годзе запусьцілі сьвідравіну глыбінёй 380 м. У 1985 годзе склад і вытворчасьць павялічылі ў некалькі разоў. Цягам 1985—1993 гадоў выраблялі газаваную ваду на замову амэрыканскага прадпрыемства «Пэпсі» (штат Новы Ёрк). У 1987 годзе ўвялі ў дзеяньне артэзіянскую сьвідравіну глыбінёй 380 м. У 1989 годзе выпусьцілі 45 млн пляшак мінэральнай вады^[3].

У 1991 годзе «МЗБН» стаў самастойным прадпрыемствам. У 1992 годзе запусьцілі сьвідравіну глыбінёй 110 м^[3]. 26 студзеня 1993 году «МЗБН» пераўтварылі ў арэнднае прадпрыемства^[21]. 30 сьнежня 1994 году прадпрыемства пераўтварылі ў закрытае акцыйнае таварыства^[20]. У 1995—1998 гадох на сумесным прадпрыемстве «Кока-кола Аматыл Беларусі» выпускалі амэрыканскія газаваныя напоі «Кока-кола»^[3]. У 1998 годзе прыступілі да вытворчасьці ўласнага напою «Бела-кола». На 1999 год «Менскі завод безалькагольных напояў» вырабляў мінэральную і газаваную ваду, ліманад, садавінныя сокі, сыроп і джын-тонік^[20].

У 2003 годзе адчынілі сьвідравіну глыбінёй 360 м^[3]. 13 жніўня 2004 году «МЗБН» унёс «Менскую» мінэральную ваду ў Дзяржаўны рэестар месцаў паходжаньня тавараў Беларусі^[22]. У 2005 годзе далучылі падразьдзяленьне «Вяльля–Агра» ў вёсцы Пагост (Вялейскі раён). У 2007 годзе пачалі пастаўкі ў краіны Эўразьвязу. У 2008 годзе пачалі вырабляць газаваныя напоі без кансэрвантаў^[3]. У пачатку 2012 году антыманапольнай управа Менскага гарвыканкаму ўнесла «МЗБН» у сьпіс паноўных прадпрыемстваў на сталічным рынку мінэральнай вады з доляй звыш 65 %. На 2012 год заводам валодаў Анатоль Арцюхоўскі, які кіраваў прадпрыемствам яшчэ за савецкім часам. Сярод іншага, выпускалі соказьмяшчальныя напоі «Мультытэль»^[23]. На 2014 год на заводзе працавала звыш 700 чалавек. 1 верасьня 2014 году Эўрапейскі банк рэканструкцыі і разьвіцьця (Ангельшчына) пазычыў «МЗБН» 10 млн эўра на 7 гадоў для закупкі абсталяваньня і самаходаў^[24].

У 2015 годзе пачалі выпускаць арганічны бярозавы сок з амэрыканскім пасьведчаньнем для пастаўкі ў ЗША і Аўстрыю^[25]. У 2017 годзе «Менскі завод безалькагольных напояў» пачаў выкарыстоўваць беларускую мову ў аздабленьні сваіх вырабаў^[26]. У 2023 годзе дадалі беларускую мову на этыкетку «Бела-колы»^[27].