Аляксандр Міхайлавіч Радзькоў

У Вікіпедыі ёсць артыкулы пра іншых людзей з прозвішчам Радзькоў.

Аляксандр Міхайлавіч Радзькоў (1 ліпеня 1951, в. Вотня, Быхаўскі раён, Магілёўская вобласць, БССР) — беларускі палітык і вучоны.

Аляксандр Радзькоў
Міністр адукацыі Беларусі 6 жніўня 2003 — 29 снежня 2010
Прэзідэнт	Аляксандр Лукашэнка
Кіраўнік урада	Сяргей Сідорскі
Папярэднік	Пётр Брыгадзін
Пераемнік	Сяргей Маскевіч
Нараджэнне	1 ліпеня 1951(1951-07-01) (74 гады) Вотня, Навабыхаўскі сельсавет, Быхаўскі раён, Магілёўская вобласць, Беларуская ССР, СССР
Дзеці	Юлія Аляксандраўна Пярцова[d]
Партыя	Белая Русь
Член у	Белая Русь
Адукацыя	МДУ імя А. А. Куляшова
Навуковая ступень	доктар педагагічных навук
Дзейнасць	матэматыка[1], педагогіка[1] і палітыка[1]
Месца працы	Адміністрацыя прэзідэнта Рэспублікі Беларусь МДУ імя А. А. Куляшова
Узнагароды	Ганаровая грамата Савета Міністраў Рэспублікі Беларусь (2006)

Біяграфія

У 1973 годзе скончыў фізіка-матэматычны факультэт Магілёўскага дзяржаўнага педагагічнага інстытута (цяперашні Магілёўскі дзяржаўны ўніверсітэт імя Аркадзя Куляшова). У 1974—1997 працаваў у ім на пасадах ад асістэнта кафедры да першага прарэктара. У 1982 годзе абараніў кандыдацкую дысертацыю на тэму «Актывізацыя навучання матэматыцы студэнтаў першага курса педагагічнага ВНУ: На прыкладзе алгебры ды тэорыі лікаў» (педагагічныя навукі). У 1996 годзе абараніў доктарскую дысертацыю на тэму «Навуковыя асновы тэставання ў сістэме непарыўнага навучання матэматыцы» (педагагічныя навукі)^[2]. У 1997 прызначаны першым прарэктарам Магілёўскага дзяржаўнага ўніверсітэта імя А. А. Куляшова, а ў 2001 — яго рэктарам.

З 6 жніўня 2003 года па 2010 год працаваў Міністрам адукацыі Рэспублікі Беларусь.

З 29 снежня 2010 года да 20 снежня 2014 года — першы намеснік кіраўніка Адміністрацыі Прэзідэнта Рэспублікі Беларусь. З 20 снежня 2014 года да 18 мая 2015 года — памочнік Прэзідэнта Рэспублікі Беларусь^[3].

А. М. Радзькоў таксама ўзначальваў РГА «Белая Русь», з’яўляючыся старшынёй аб’яднання.

У красавіку 2024 года быў выбраны дэлегатам на Усебеларускі народны сход 7-га склікання ад рэспубліканскага грамадскага аб’яднання «Белая Русь»^[4].

Санкцыі ЕС і іншых краін

У маі 2006 года па выніках прэзідэнцкіх выбараў Аляксандр Радзькоў стаў суб’ектам забароны на паездкі і замарожвання актываў Еўрапейскім Саюзам як частка спісу беларускіх чыноўнікаў, адказных за палітычныя рэпрэсіі, падтасоўку вынікаў галасавання і прапаганду і ЗША як частка спісу спецыяльна прызначаных грамадзян і заблакіраваных асоб^[5][6]. Тыя ж санкцыі былі прыменены да яго і пасля прэзідэнцкіх выбараў 2010 года^[7].

Згодна з рашэннем Еўрапейскага савета ад 15 кастрычніка 2012 года, у якасці першага намесніка кіраўніка Адміністрацыі прэзідэнта, былога міністра адукацыі ён закрыў Еўрапейскі гуманітарны ўніверсітэт, распачаў рэпрэсіі супраць апазіцыйных студэнтаў і арганізаваў студэнтаў, каб прымусіць іх галасаваць за рэжым^[8][9]. Таксама Аляксандр Радзькоў як блізкі да прэзідэнта Лукашэнкі кіраўнік «Белай Русі», галоўнай ідэалагічнай і палітычнай арганізацыі рэжыму, «адыграў актыўную ролю ў арганізацыі фальсіфікаваных выбараў у 2008, 2010 і 2012 гадах, а таксама ў наступных рэпрэсіях супраць мірных дэманстрантаў у 2008 і 2010 гадах»^[8][9].

Сям’я

Мае дзвюх дачок:

• Наталля Аляксандраўна Ігнаценка (11.09.1972 г.н.), беларуская дзіцячая пісьменніца^[10][11].
• Юлія Аляксандраўна Пярцова (13.04.1982 г.н.), вядучая Агенцтва тэленавінаў (праграмы «Навіны», «Галоўны эфір»)^[10][12].

Адзін з братоў, Міхаіл — гінеколаг, заслужаны ўрач Рэспублікі Беларусь.

Званні і ўзнагароды

• Узнагароджаны медалём «За працоўную адзнаку», 31 снежня 1998 года і 3 красавіка 2006 года — Ганаровай граматай Савета Міністраў Рэспублікі Беларусь^[13][14].
• Заслужаны дзеяч навукі Рэспублікі Беларусь.

Працы

• Алгебра и теория чисел: Атлас для самостоят. работы: Учеб. пособие для студентов физ.-мат. специальностей пед. ин-тов / А. М. Радьков, Б. Д. Чеботаревский.. — Мн.: Вышэйшая школа, 1992. — 286 с. — ISBN 5-339-00795-2.
• Лікі ды функцыі ў тэстах: Вучэб.-метад. дапаможнік / А. У. Кравец, А. М. Радзькоў. — Мн.: Скакун, 2000. — 188 с. — ISBN 985-6235-19-7.

Аляксандр Радзькоў з’яўляецца аўтарам і суаўтарам мноства дапаможнікаў па матэматыцы для вучняў сярэдняй школы.