Вольга Генадзеўна Сітнік

У Вікіпедыі ёсць артыкулы пра іншых людзей з прозвішчам Сітнік (значэнні).

Вольга Генадзеўна Сітнік (нар. 24 студзеня 1983(1983-01-24), Слуцк, Мінская вобласць) — беларуская вікіпедыстка. Адміністратарка беларускамоўнага раздзела Вікіпедыі. Аўтар тысяч артыкулаў і 200 тысяч правак. Некалькі разоў затрымлівалася з красавіка 2025 года. Разам з іншымі вікіпедыстамі праходзіць па невядомай крымінальнай справе. Праваабарончымі арганізацыямі прызнана палітычнай зняволенай.

Вольга Генадзеўна Сітнік
Род дзейнасці	актывістка, вікімедыстка, вікіпедыстка
Дата нараджэння	24 студзеня 1983(1983-01-24) (42 гады)
Месца нараджэння	Слуцк, Слуцкі раён, Мінская вобласць, Беларуская ССР, СССР
Грамадзянства	Беларусь
Альма-матар	Школа № 10 імя С. Ф. Рубанава (2000) Факультэт інфармацыйных тэхналогій і робататэхнікі БНТУ (2005)
Медыяфайлы на Вікісховішчы

Біяграфія

Нарадзілася і расла ў Слуцку^[1]. Вучылася ў школе № 10 імя С. Ф. Рубанава. У 2005 годзе скончыла факультэт інфармацыйных тэхналогій і робататэхнікі БНТУ па спецыяльнасці «робататэхніка»^[2].

Актыўна ўдзельнічае ў Вікіпедыі з 2009 года пад псеўданімам «Хомелка». У 2010 годзе атрымала статус адміністратара раздзела^[3]. У асноўным піша пра гісторыю і культуру Беларусі, вядомых асоб, помнікі архітэктуры, жывёльны і раслінны свет^[1]. Больш за два дзясяткі артыкулаў яе аўтарства былі адзначаны статусам «добрых» ці «выдатных»^[3]. Аўтар тысяч артыкулаў і сотні тысяч правак^[2][4]. Прадстаўляла беларускую Вікіпедыю на Вікіманіі-2014 у Лондане^[1].

Акрамя Вікіпедыі таксама ўдзельнічае ў Вікікрыніцах і Вікісховішчы^[1].

Пераслед

17 красавіка 2025 года Вольга перастала выходзіць на сувязь і правіць артыкулы. Яна была затрымана, але пазней адпушчана дадому. 7 мая Вольгу зноў затрымалі і змясцілі на 10 сутак на Акрэсціна^[5][6]. Сутнасць абвінавачанняў застаецца невядомай. Сітнік праходзіць па крымінальнай справе з іншымі адміністратарамі беларускай Вікіпедыі, якія аказаліся за кратамі. У чэрвені 2025 года з захопленага сілавікамі акаўнта Вольгі ў Тэлеграме дасылаліся розныя паведамленні ў чатах беларускай дыяспары пра пошук фатографаў на пратэсныя акцыі^[4]. 23 ліпеня 2025 года беларускімі праваабарончымі арганізацыямі была прызнана палітычнай зняволенай^[7].

Асабістае жыццё

Замужам^[1]. Мае трох дзяцей: старэйшую дачку Ганну і двух малодшых двайнятак^[1][2]. На момант затрымання ў 2025 годзе ўсе яны былі непаўналетнімі^[8].

Гл. таксама

• Спіс людзей, арыштаваных за рэдагаванне Вікіпедыі
• Рэпрэсіі супраць беларускіх вікіпедыстаў (з 2022)