Дзернавая

Дзернава́я^[1] (трансліт.: Dziernavaja, руск.: Дерновая) — вёска ў Краснапольскім раёне Магілёўскай вобласці. Уваходзіць у склад Горскага сельсавета.

Вёска Дзернавая Цэнтральная вуліца вёскі Краіна Беларусь Вобласць Магілёўская Раён Краснапольскі Сельсавет Горскі Каардынаты 53°14′40″ пн. ш. 31°33′25″ у. д.HGЯO Першая згадка 1736 Насельніцтва 20 чалавек (2009) Часавы пояс UTC+3 Тэлефонны код +375 2238 Аўтамабільны код 6 СААТА 7238812041 Дзернавая Дзернавая

Дзернавая на Вікісховішчы

Геаграфія

Вёска знаходзіцца за 20 км на паўднёвы ўсход ад Краснаполля, за 129 км ад Магілёва, за 71 км ад чыгуначнай станцыі Камунары на лініі Крычаў I — Сураж. На захадзе цячэ рака Палуж (прыток ракі Беседзь). Транспартныя сувязі па мясцовай дарозе, далей па шашы Горы—Краснаполле.^[2]

Традыцыйная вясковая хата ў вёсцы

Планіровачна складаецца з прамалінейнай вуліцы, арыентаванай з паўднёвага ўсходу на паўночны захад уздоўж ракі. Забудавана пераважна аднабакова, драўлянымі дамамі сядзібнага тыпу.

Гісторыя

Паводле пісьмовых крыніц вядома з 18 стагоддзя. У 1736 годзе згадваецца як вёска ў Рэчыцкім павеце ВКЛ^[2]. У 1777 годзе ў Чэрыкаўскай акрузе Магілёўскай губерні. У 1816 годзе ў Чэрыкаўскім павеце, уласнасць памешчыка. У 1880 годзе частка вяскоўцаў займалася шавецкім і кравецкім промысламі, дзейнічала школа граматы. У 1897 годзе ў Палужскай воласці Чэрыкаўскага павета, меліся школа граматы і хлебазапасны магазін. Падчас рэвалюцыі 1905—07 гадоў адбываліся хваляванні. У 1910 годзе школа граматы пераўтворана ў земскую, для якой у 1917 годзе пабудавана памяшканне.

У 1925 годзе на базе земскай адкрыта працоўная школа 1-й ступені, дзейнічаў драмгурток. У 1930-я гады вяскоўцы ўступілі ў калгас, працавалі кузня і 2 ветракі.

У Вялікую Айчынную вайну з чэрвеня 1941 года да 1 кастрычніка 1943 года акупіравана нямецка-фашысцкімі захопнікамі. 22 вяскоўцы змагаліся на фронце, 17 з іх загінулі.

У 1990 годзе ў складзе калгаса імя В.Валадарскага (цэнтр — вёска Горы).

Славутасці

• На паўднёва-заходняй ускраіне, на левым беразе ракі Палуж, знаходзіцца археалагічны помнік — старажытны могільнік (2 курганы), які сведчыць аб засяленні гэтых месц у далёкай старажытнасці.

Насельніцтва

• XIX стагоддзе:
  • 1816 — 46 двароў, 283 жыхары.
  • 1834—343 жыхары.
  • 1858 — 55 двароў, 372 жыхары.
  • 1880 — 64 двары, 408 жыхароў.
  • 1897 — 96 двароў, 617 жыхароў.
• XX стагоддзе:
  • 1909—101 двор, 715 жыхароў.
  • 1926—140 двароў, 890 жыхароў.
  • 1990 — 23 гаспадаркі, 59 жыхароў.
• XXI стагоддзе:
  • 2007 — 15 гаспадарак, 23 жыхары.
  • 2009 — 20 жыхароў.

Вядомыя асобы

• Пятрусь Трафімавіч Бядулін (1912—1940) — беларускі паэт.
• Яўген Пятровіч Іваноў (нар. 1939) — беларускі гематолаг. Доктар медыцынскіх навук (1974), прафесар (1976).