Пятро Бітэль

Пятро Бітэль, сапр. Пётр Іванавіч Бітэль (19 чэрвеня 1912, Радунь Лідскага павета — 18 кастрычніка 1991, в. Вішнева; Псеўданімы: Леанід з-пад Вішнева) — беларускі паэт, перакладчык, краязнавец, настаўнік.

Пятро Бітэль
Асабістыя звесткі
Дата нараджэння	19 чэрвеня 1912(1912-06-19)
Месца нараджэння	Радунь, Лідскі павет, Віленская губерня, Расійская імперыя
Дата смерці	18 кастрычніка 1991(1991-10-18) (79 гадоў)
Месца смерці	Вішнева, Вішнеўскі сельсавет, Валожынскі раён, Мінская вобласць, Беларусь
Пахаванне	Вішнева
Грамадзянства	Беларусь
Альма-матар	Віленская настаўніцкая семінарыя[d] БДПУ
Прафесійная дзейнасць
Род дзейнасці	перакладчык, паэт, краязнавец
Мова твораў	беларуская

Біяграфія

Скончыў Беларускую Віленскую настаўніцкую семінарыю (1931). У 1931—1939 гадах настаўнічаў. У 1944 годзе вывезены ў Германію, вызвалены ў 1945 годзе, служыў у Чырвонай Арміі.

У 1946—1947 гадах працаваў настаўнікам, у 1947 годзе звольнены з настаўніцкай працы. Стаў праваслаўным святаром. У 1950 годзе арыштаваны і асуджаны на 10 гадоў. Зняволенне адбываў у Кемераўскай вобласці, Омску і Джэзказгане. У 1956 годзе вызвалены. Да 1963 служыў у царкве.

У 1963—1974 гадах зноў настаўнічаў. Скончыў Мінскі педінстытут (1970). Рэабілітаваны ў 1978.

Памёр 18 кастрычніка 1991 года ў вёсцы Вішнева Валожынскага раёна. Пахаваны на мясцовых могілках^[1].

Творчасць

Дэбютаваў у 1929 годзе пад псеўданімам Леанід з-пад Вішнева ў часопісе «Шлях моладзі», дзе публікаваўся і пазней. Аўтар паэм «Замкі і людзі» (1968), «Сказанне пра Апанаса Берасцейскага» (1984).

Пераклаў на беларускую мову творы А. Міцкевіча («Пан Тадэвуш», «Конрад Валенрод», «Гражына», «Дзяды», «Крымскія санеты»), польскамоўныя паэмы і п'есы В. Дуніна-Марцінкевіча, аповесць Ю. Крашэўскага «Хата за вёскай», (1989), паасобныя творы М. Канапніцкай, Б. Пруса, Ю. Славацкага, Г. Сянкевіча, М. Лермантава, А. Пушкіна, І. Франко, Т. Шаўчэнкі, Б. Брэхта, Ё. В. Гётэ, Ф. Шылера і інш.

Рукапіс перакладу паэмы «Пан Тадэвуш» зроблены ў лагеры на паперы з мяшкоў з-пад цэменту, захоўваецца ў Музеі гісторыі беларускай літаратуры.

Зноскі

1. Аблажэй — Брыль – Белліт  (бел.) (14 ліпеня 2023). Праверана 21 ліпеня 2024.