Севяране

Севяра́не, север (ст.-слав: сѣверо, сѣверъ^[1], сѣверы) — усходнеславянскае этнапалітычнае аб'яднанне (правадырства).

Севяране
Саманазва	ст.-слав: сѣверо, сѣверъ, сѣверы
Колькасць	невядома
Рассяленне	Басейны рэк Дзясны, Сеймы, Сулы, Ворсклы, Пслы, Северскага Данца
Археалагічная культура	Помнікі валынцаўскага тыпу  (руск.) і Роменска-боршаўская  (укр.)
Этнічныя мовы	старажытнаруская
Традыцыйныя рэлігіі (канфесіі)	паганства, праваслаўе
Геаграфічна-моўная група	усходнія славяне

Насялялі тэрыторыі па Дзясне, Сейму, Суле, межавалі на захадзе з палянамі і дрыгавічамі, на поўначы з радзімічамі і вяцічамі, на усходзе і поўдні з качавымі плямёнамі. У VIII—X стст. для іх характэрны помнікі валынцаўскага тыпу  (руск.) і роменска-боршаўскай культуры: бескурганныя і курганныя могільнікі з трупаспаленнем, гарадзішчы і селішчы з ляпной і ганчарнай керамікай, з канца X—XII стст. — курганныя могільнікі з трупапалажэннем на гарызонце. Характэрныя племянныя адзнакі — спіралепадобныя і прамянёвыя скроневыя кольцы, пласціністыя галаўныя венчыкі. У VIII—пачатку IX стст. севяране плацілі даніну хазарам. У канцы IX ст. заходнія севяране разам з палянамі ўвайшлі ў склад Кіеўскай Русі, усходнія захоўвалі адносную аўтаномію да канца X ст. У XI—XII стст. севяране складалі значную частку насельніцтва Чарнігаўскай зямлі. У 907 г. удзельнічалі ў паходзе Алега на Візантыю. Упамінаюцца ў «Аповесці мінулых гадоў» пад 884, 885, апошні раз пад 1024 гг. Найбуйнейшыя гарады Чарнігаў, Ноўгарад-Северскі, Сноўск, Пуціўль, Курск і інш.

Гл. таксама

• Славяне
• Вялікае перасяленне народаў
• Славянская каланізацыя Беларусі