Чортаў камень (Кравец)

У паняцця ёсць і іншыя значэнні, гл. Чортаў камень.

У паняцця ёсць і іншыя значэнні, гл. Кравец.

Чортаў камень, або Кравец — геалагічны помнік прыроды рэспубліканскага значэння. Размешчаны на беразе р. Абалянкі за 0,5 кіламетра на захад ад вёскі Вароніна Сенненскага раёна Віцебскай вобласці.

Чортаў камень (Кравец)
Катэгорыя МСАП — III (Помнік прыроды)
Размяшчэнне	Беларусь, Вёска Вароніна, Сенненскі раён, Віцебская вобласць
Плошча	62 м²
Чортаў камень (Кравец)

Апісанне

Прынесены ледавіком з паўднёвага захаду Фінляндыі 17-20 тысяч гадоў назад у перыяд паазерскага абледзянення^[1].

Чортаў камень і рака Абалянка

Па форме нагадвае паралелепіпед, нахілены на поўдзень^[1]. Складзены з чырвона-бурага граніту рапаківі. Даўжыня валуна складае 10,2 м, шырыня — 6,0 м (1,7 м у зямлі), вышыня — 2,7 м (з улікам падземнай часткі — каля 4 метраў)^[2]. Аб’ём — каля 130 м³, вага — 340 тон^[1]. Чортаў камень з’яўляецца другім па велічыні валуном у Беларусі пасля Вялікага Каменя (Шумілінскі раён)^[1].

Легенда

Паводле адной з легенд, у балоце, што знаходзіцца побач, жылі чэрці, якія любілі пажартаваць з п’яных мужыкоў. Яны заводзілі мужыкоў у балота да каменя, тыя думалі, што дабраліся да ўласнай печы, распраналіся і лажыліся спаць на камені. Прачнуўшыся, яны ніяк не маглі зразумець, як яны сюды патрапілі, а чэрці ж рагочуць у хмызняку^[2][3].

Паводле іншай легенды, пад гэтым каменем жыў чорт, які займаўся краўцоўскай справай. Ён шыў адзенне сялянам, а тыя разлічваліся з ім пятакамі. Нібыта адбіткі тых пятакоў i цяпер можна ўбачыць на камені^[2]. Аднойчы дрэнны чалавек вырашыў пасмяяцца з чорта, кінуў на камень палатно і папрасіў сшыць «ні тое, ні сёе». На другі дзень з’явілася на камені нешта незразумелае: адзін рукаў у падоле, іншы на спіне, а галаву няма ўва што прасунуць. З тых часоў пакрыўдзіўся чорт і адмовіўся шыць^[4].

Яшчэ адна легенда распавядае пра тое, што адзін умелы кравец заганарыўся сваім майстэрствам і вырашыў працягваць сваю працу нават у Вялікдзень. Бог пакараў яго, ператварыўшы ў камень, які з той пары называюць Кравец^[3].

Зноскі

1. Другі па велічыні валун у Беларусі — Чортаў камень — рыхтуецца стаць турыстычным аб’ектам (нявызн.)(недаступная спасылка). Архівавана з першакрыніцы 4 сакавіка 2016. Праверана 5 мая 2015.
2. Помнікі гісторыі і культуры Сенненскага раёна (нявызн.)(недаступная спасылка). Архівавана з першакрыніцы 5 мая 2015.
3. Витебская область. Сенненский район (руск.)(недаступная спасылка). Управление спорта и туризма Витебского облисполкома. Архівавана з першакрыніцы 21 жніўня 2017.
4. Помнікі прыроды і Ахоўваемыя тэрыторыі (нявызн.)(недаступная спасылка). Архівавана з першакрыніцы 5 мая 2015.