Војводина (село)

Војводина (грчки: Σπηλιά, Спилија; до 1927 г. Βοεβοδίνα, Воеводина,^[2] турски: Oyvodina, Ојводина) — село во Кајларско, Егејска Македонија, денес во општината Еордеја на областа Западна Македонија, Грција. Има 69 жители (2011), а атарот зафаќа површина од 25 км².^[3]

Оваа статија се однесува на село во Кајларско, Егејска Македонија. За истоимената покраина во Србија, погл. Војводина.

Војводина Δισπηλιό
Војводина
Местоположба во областа Војводина Местоположба на Војводина во Кожанскиот округ и областа Западна Македонија
Координати: 40°29′N 21°48′E
Земја	Грција
Област	Западна Македонија
Округ	Кожански
Општина	Еордеја
Општ. единица	Света Петка
Надм. вис.	&10000000000000820000000820 м
Население (2011)[1]
• Вкупно	69
Час. појас	EET (UTC+2)
• Лето (ЛСВ)	EEST (UTC+3)
Пошт. бр.	50200
Повик. бр.	+30 24630

Географија

Селото е сместено во областа Сариѓол, 15 км источно од градот Кајлари, во подножјето на планината Каракамен.

Историја

Кај Војводина е откриена древномакедонска гробница (наречена Војводинска гробница), слична на Кралските гробници во Кутлеш.^[4] Низ ова подрачје минува познатиот римски пат Вија Егнација.

Во Отоманското Царство

Кон крајот на XIX век Војводина бил турски чифлик. Во „Етнографија на вилаетите Адријанопол, Монастир и Салоника“ се вели дека во 1873 г. Војводино (Voïvodino) било село во Џумалиската каза со 15 домаќинства и 30 машки жители муслимани.^[5]

Во 1889 г. хрватскиот етнограф Стефан Верковиќ („Топографическо-этнографическій очеркъ Македоніи“) напишал за Војводина:

„

На југ одовде [Козлуќој] лежи муслиманското село Војводина со 28 куќи и 62 нуфузи, од кои се зема 3100 пијастри данок. Во селото има 1 џамија и неколку извори.[6]

“

Според статистиката на Васил К’нчов („Македонија. Етнографија и статистика“) во 1900 г. Војводина имала 250 жители Турци.^[7]

Според грчка статистика од 1904 г. во Војводина живееле 250 Турци.^[8]

Потпаѓање под Грција

Во Првата балканска војна селото го зазела грчката војска, а по Втората балканска војна Војводина конечно била припоена кон Грција, кога се заведен 381 жител.^[3] Во 1924 г. е иселено турското население, а на негово место се доведени грчки бегалци од Мала Азија согласно Лозанскиот договор. Во 1928 г. селото е заведено како наполно грчко, со 86 доселенички семејства од вкупно 332 лица.^[9] Во 1927 г. му е дадено новото име Спилија.^[10]

Демографија

Во следниот период бројот населението останал устојчив, така што во 1940 г. имало 394 лица, а во 1951 и 1961 г. селото имало 347 односно 375 жители. Населението во овој период почнало да се намалува поради релативната неплодност на почвата и иселувањето во градот Кајлари, кој доживеал подем благодарение на термоцентралите и фабриката за вештачки ѓубрива.^[3] Така, во 1971 г. селото се намалило на 188 жители, во 1981 г. на 133, а во 1991 г. на 114 лица.

Преглед на населението во сите пописни години, од 1940 г. до денес:

Година	1940	1951	1961	1971	1981	1991	2001	2011	2021
Население	394	374	375	188	133	114	134	69

Извор за 1940-1991 г.: Т. Симовски, Населените места во Егејска Македонија

Стопанство

Во селото Војводина претежно се одгледуваат житото, компирите и грозјето, а делумно е развиено и сточарството поради широките тревни предели.^[3]

Поврзано

• Војводинска гробница — древномакедонска гробница од II век п.н.е.

Надворешни врски

• Војводина на порталот на некогашната Општина Света Петка Архивирано на 21 март 2009 г. (грчки)
• История на селото Војводина Архивирано на 28 ноември 2004 г. (англиски)
• Информации за поранешната општина Света Петка Архивирано на 27 септември 2007 г. (грчки)