Елисие Поповски

Елисие Поповски - Марко (Маврово, 13 јули 1907 - Скопје, 9 ноември 1972 ) — македонски комунист, учесник во Шпанската граѓанска војна и во НОВ. Бил делегат на Првото заседание на АСНОМ.^[1] Носител е на Партизанска споменица 1941.

Елисие Поповски

Животопис

Елисие Поповски

Поповски е роден на 13 јули 1907 година во село Маврово, Гостиварско.

Биста на Елисие Поповски во Маврово

Како припадник на прогресивното работничко движење од 1934 година, станал член на КПЈ во 1936 година. Учествувал во Шпанската граѓанска војна, каде пристигнал од Кралство Југославија на 15 јули 1937 година. Бил доброволец во 129-та интернационална бригада. По крајот на војната, бил во логорот за шпанските доброволци во Франција (1939–1941).

Потоа се вратил во Југославија и вклучил во НОБ на Србија. Бил командант на Топличкиот партизански одред и заменик политички комесар на Озренскиот партизански одред. Во април 1943 година дошол во Вардарскиот дел на Македонија. Бил политички комесар на Првата оперативна зона на НОВ и ПОМ и член на Главниот штаб на НОВ и ПОМ. Во ноември 1943 година водел преговори со Германската команда од Струга во Ботунската теснина меѓу Ботун и Струга за размена на германски заробеници за политички затвореници, припадници на НОАВМ.^[2] Во август 1944 година бил учесник на Првото заседание на АСНОМ.

По Ослободувањето бил на разни политички должности. Меѓу другото, бил раководител на УДБ-а во Македонија до 1952 година. Починал во Скопје на 9 ноември 1972 година.

Во негова чест, Средното училиште за внатрешни работи, основано во 1971 година, го носело неговото име.^[3]