Западна Африка

Западна Африка е регион во Африка кој ја зафаќа територијата меѓу приморјето на Гвинејскиот Залив и јужните делови на пустината Сахара и од Камерунските Планини на исток до Атлантскиот Океан на запад.^[1] Релјефот во Западна Африка е претежно низински, со незначителни територии под висорамнини и планини.^[1] Климата во Западна Африка е екваторска и тропска, со големи количества врнежи.^[1] Најпознати реки се Нигер, Волта, Сенегал, Гамбија и други.^[1]

Западна Африка

Овој регион се нарекува уште и Гвинејска Африка; името го добил поради тоа што излегува на Гвинејскиот залив.

Држави

На територијата на Западна Африка се наоѓаат следниве држави: Бенин, Брегот на Слоновата Коска, Буркина Фасо, Гамбија, Гвинеја, Гвинеја-Бисао, Гана, Зелен ’Рт, Либерија, Мали, Нигер, Нигерија, Сенегал, Сиера Леоне и Того.^[2]

Држава	Главен град	Површина(км2)	Население (ООН, 2009)
Бенин	Порто Ново	112 622	8 935 000
Брегот на Слоновата Коска	Јамусукро	322 460	21 075 000
Буркина Фасо	Уагадугу	274 000	15 757 000
Гамбија	Банџул	10 380	1 705 000
Гана	Акра	238 534	23 837 000
Гвинеја	Конакри	245 857	10 069 000
Гвинеја-Бисао	Бисао	36 125	1 611 000
Зелен ’Рт	Праја	4 033	506 000
Либерија	Монровија	111 369	3 477 000
Мали	Бамако	1 240 192	14 517 000
Нигер	Нијамеј	1 267 000	15 290 000
Нигерија	Абуџа	923 768	154 729 000
Сенегал	Дакар	196 723	12 534 000
Сиера Леоне	Фритаун	71 740	5 696 000
Того	Ломе	163 610	6 619 000

Население и стопанство

Се забележува дека Западна Африка зафаќа помалку од една петтина од површината на Африка, или 5,2 милиони км², но на неа живее една третина од населението во Африка односно околу 287 милиони жители. Со најмногу население се одликува Нигерија. Населението претежно се занимава со земјоделство и со сточарство. Најзастапени земјоделски култури се кафе, какао, пченка, банани, кикирики, маслодајни палми, шеќерна трска и др. Во сточарството најмногу се одгледуваат говеда, кози и овци.^[1]

Земјите од Западна Африка поседуваат и разни рудни богатства: железо, бакар, злато, алуминиум, олово, цинк, нафта и дијаманти.^[1] Индустријата е во постојан развој.

Поврзано

• Африка