Kijerumani

Kijerumani (kwa Kiswahili cha kale: Kidachi^[1], kwa Kijerumani: Deutsch au (die) deutsche Sprache) ni lugha ya Kijerumaniki ya magharibi katika jamii ya lugha za Kihindi-Kiulaya. Huzungumzwa hasa katika nchi za Ujerumani, Austria, Uswisi, Liechtenstein na Luxemburg. Kuna pia wasemaji asilia katika nchi jirani za Ujerumani / Austria kama Ubelgiji, Uholanzi, Ufaransa, Denmark, Polandi na Italia. Nchi nyingi za Ulaya ya Mashariki zilikuwa na wasemaji wa Kijerumani lakini wengi walifukuzwa au kuondoka wakati wa Vita Kuu vya Pili vya Dunia au baadaye; vikundi vimebaki hasa katika Hungaria, Romania, Ucheki, Urusi na Kazakhstan.

"de" inaelekezwa hapa. Kwa matumizi mengine, tazama de (maana).

Kijerumani Deutsch (de)
Lugha
Asili	Ujerumani Austria, Uswisi Liechtenstein, Luxemburg, Ubelgiji
Wasemaji	L1 : 76.1 Milioni L2: 97 Milioni Jumla: 155 Milioni
Familia za lugha	Kihindi-Kiulaya Kijerumaniki Kijerumaniki cha Magharibi
Aina za Awali	Kihindi-Kiulaya cha Kale Kijerumaniki cha Kale Kijerumani cha Kati
Mfumo wa kuandika	Alfabeti ya Kilatini
Lugha Rasmi
Lugha rasmi kwa	Nchi 6
Nambari za Msimbo
ISO 639-1	de
ISO 639-2	deu
Glottolog	stan1295
Eneo ambako lugha ya Kijerumani huzungumzwa

Hadhi ya Kijerumani katika nchi mbalimbali.

Vikundi vidogo vya watu waliohamia katika karne za 19 na 20 wanaoendelea kutumia Kijerumani wako katika Amerika ya Kaskazini (Marekani, Kanada), Amerika Kusini (Brazil, Chile) na Afrika (hasa Namibia na Afrika Kusini).

Kijerumani huzungumzwa na watu milioni 100 katika Ulaya, ambako ni lugha ya pili kwa wingi wa wasemaji baada ya Kirusi kushinda Kifaransa na Kiingereza.

Lugha ya kitaifa

Kijerumani kinatumiwa kama lugha rasmi kitaifa katika nchi zifuatazo:

• Ujerumani
• Austria
• Liechtenstein
• Uswisi (pamoja na Kifaransa, Kiitalia na Kirumanj)
• Luxemburg (pamoja na Kiluxemburg na Kifaransa )
• Ubelgiji (pamoja na Kifaransa na Kiholanzi lugha rasmi ya kitaifa, katika wilaya za Eupen na Sankt Vith ni lugha rasmi ya utawala pamoja na Kifaransa)
• Namibia (Kijerumani ni kati ya lugha 20 zinazotambuliwa kuwa lugha za kitaifa; ilikuwa lugha rasmi ya kitaifa pamoja Kiingereza na Kiafrikaans hadi 1990)

Lugha rasmi kieneo

Kijerumani kinatumiwa kama lugha rasmi ya utawala kieneo (ama kimkoa au kwenye ngazi ya miji / tarafa tu) katika nchi zifuatazo:

• Italia (katika wilaya ya Bolzano ya Italia Kaskazini pamoja na Kiitalia)
• Hungaria (mjini Ödenburg / Sopron baada ya Kihungaria)
• Romania (lugha rasmi kieneo pamoja na Kiromania)
• Urusi (lugha ya utawala kwenye wilaya zenye tabia ya kitaifa Asowo na Halbstadt katika Siberia ya magharibi)

Umoja wa Ulaya

Kijerumani ni kati ya lugha rasmi za Umoja wa Ulaya pamoja na Kiingereza na Kifaransa. Ndani ya Umoja huo ndiyo lugha yenye wasemaji wengi kushinda nyingine zote.

Lugha inayofundishwa

Kijerumani kama lugha ya kigeni kinafundishwa shuleni au kwenye taasisi za elimu ya watu wazima katika nchi nyingi. Mwaka 2004 idadi ya wanafunzi wa Kijerumani ilikuwa kama ifuatayo:

• Urusi: 4.657.500 (3,26%)
• Polandi: 2.202.708 (5,70 %)
• Ufaransa: 1.603.813 (2,52 %)
• Ucheki: 799.071 (7,80 %)
• Ukraine: 629.742
• Hungaria: 629.472
• Kazakhstan: 629.874
• Uholanzi: 591.190
• Marekani: 551.274

Kijerumani ni lugha ya pili katika mtandao (intaneti) baada ya Kiingereza. Takriban nusu ya kurasa zote mtandaoni ni za Kiingereza, lakini Kijerumani kinafuata kikiwa na 8% za kurasa zote.

Kijerumani kimeathiri kwa kiasi fulani lugha ya Kiswahili cha Tanzania bara kama vile kukikopesha maneno mbalimbali, kwa mfano: shule, hela n.k.

Maneno machache

hujambo? – sijambo	Wie geht es dir? – Mir geht es gut.
jambo	Hallo!
ndiyo	ja
hapana	nein
mgeni	Gast, Fremder
rafiki	Freund
karibu	Willkommen!
kwa heri	Auf Wiedersehen!
asante	Danke!
asante sana	Vielen Dank!
safari	Reise
ninakupenda	Ich liebe dich.
hatari	Gefahr
daktari	Doktor
polepole	langsam
Afya! (wakati wa kunywa na mwingine)	Prost!
kijiji	Dorf
mji	Stadt