虹口

虹口，上海地區名，勒拉上海市中心城區，吳淞江搭仔黃浦江交匯處北面個一塊地區。原先特謂指今朝虹口區南部搭仔閘北區東南部地區，現在也用來指代虹口區。

遠處橋下頭個河口就是虹口

名字個由來

虹口箇只名字是從河口個名字來個。元代以前，吳淞江個河道勒拉現在個北側。作為吳淞江個支流，上海浦從十六鋪東面出發，向北流經宋家浜搭范家浜個（宋家浜就是今朝吳淞江市區段，范家浜是蘇州河口到慶寧寺當中箇段黃浦江），再向北流到今朝虹口港河道浪個嘉興路橋附近流進吳淞江故道。元代以後，上海浦河道逐漸畀黃浦用脫。

明隆慶三年（1569年），海瑞疏浚吳淞江，讓水從宋家浜流出去。乘槍勢里，黃浦變成功太湖個洩洪主河道，吳淞江則變成功黃浦江個支流，原上海浦入吳淞江故道河口附近個河道留拉，叫沙洪，伊流進黃浦個河口叫洪口^[1]。

清代中期，沙洪浪造起座拱橋，也就是通常講個虹橋。上海開埠以後，洪口逐漸寫成虹口，用到現在^[2]。

發展歷史

上海開埠前，虹口兩岸已經有小規模個集鎮，叫內外虹口市^[3]。1848年，美國傳教士買進英租界邊浪個虹口一帶土地，也就是上海美租界^[4]。1863年，上海道正式同美國簽訂條約，確定現在個武進路以南一帶區域均畀美租界。租界弗斷擴張，虹口個概念也弗斷擴張，逐漸變成蘇州河北面個租界個統稱。經過多趟個租界擴張搭仔越界造路，虹口好表示個地方弗只本生一塊地方，還有今朝閘北區東南部、四川北路中段、北段直到虹口公園。

抗日戰爭勝利以後，1947年，上海市政府更改行政區劃名字，拿數字編號改成地名。原十六區更名成虹口區，虹口箇只詞正式成為行政區劃個名字。1949年以後，虹口區經歷多輪行政區劃改革，到2011年，虹口廣義上好講南到蘇州河，北到江灣鎮，東到楊浦，西到閘北個咾大一塊地方^[5]。