再現

再現（粵拼：zoi3 jin6）係科學哲學上嘅重要概念，講緊同一個研究結果能唔能夠「再次出現」：科學講究客觀，所以同一份研究，理應要係由唔同人喺唔同時地做都得出一樣結果，噉先展現到個結果係幾咁客觀。而科學家見到同行做咗啲出人意表嘅結果嗰陣，好多時都會嘗試用嗰位同行用嘅方法，做多次份研究，目的就係想睇吓嗰份研究嘅結果有冇再現呢樣特性。

想像有位化學家用兩條試管做同樣嘅實驗－「兩次都出錯」嘅機率應該低過「其中一次出錯」嘅機率。

基礎概念

睇埋：科學哲學同客觀

科學哲學係哲學一門，專研究科學嘅本質以及研究方法。科學追求嘅係準確噉理解現象，而客觀就係實踐科學嘅其中一個基本要求。所謂客觀，意思係話研究者理應要盡量排除主觀偏見、個人信念、情緒或者社會期望對觀察同解釋所造成嘅干擾。客觀亦係分辨科學知識同其他形式嘅信念（譬如係占卜或者信仰）嘅其中一個關鍵：唔同文化都有佢哋理解世界嘅方法，但科學之所以能夠建立起全球一致嘅共識，就係因為佢依賴一套清楚嘅原則：證據優先、邏輯推理以及反覆檢驗。呢種態度令科學能夠跨越文化、語言以至時代嘅限制，產生可重用、可預測嘅知識^[1]。

因為科學追求客觀，所以同一份科學研究應該無論由邊個做，結果都係一樣嘅：再現正正就係講緊手上嘅研究結果「能唔能夠再次出現」——假想依家某份研究搵到個結果，如果第位研究者攞住份研究報告，跟住佢個方法去做，理應能夠得到相同^{[註 1]}嘅結果。而事實表明，廿一世紀初嘅科學界不時會有研究者為咗炒作，而報告一啲有誤導嘅結果，甚至偽造結果，因此科學家睇到一啲「樣眼、有話題性」嘅結果嗰時，往往會或多或少帶有一啲懷疑，想知道個結果係咪可再現^[2][3]。

再現對科學研究嚟講至關重要，因為研究結果一定要可再現先至可靠^{[註 2]}。​透過唔同研究者重複實驗並得到相似嘅結果，科學界可以確立手上嘅新發現唔係偶然或者受偏差影響。而​做唔到再現嘅研究結果，往往會削弱公眾對科學嘅信任，阻礙科學進步。​

再現危機

内文：再現危機

睇埋：p-hack

喺二十一世紀初，多個科學領域都出現嚴重嘅再現危機，好多研究結果都事後發現係無法再現嘅。响社會科學領域（經濟學同心理學等）有二〇一五年嘅調查發現，有成 62% 嘅研究者喺研究結果出街後，都拒絕分享自己嘅數據^[4]，而响醫學領域就有二〇一一年嘅調查發現，只有 6% 嘅研究結果係完全可再現嘅^[5]。

再現危機嘅成因有好多：有好多研究者為咗想登吸引人注意嘅論文，而選擇性報告結果，例如漁翁撒網噉試大量唔同嘅變數，然後淨係報告搵到結果嗰啲，甚至有部份嘅科研人員會偽造數據^{[註 3]}；而且學術出版嘅相關人員亦被指有問題，例如有人批評學術期刊為咗爭取注意力，淨係肯刊登一啲引人注目嘅結果，間接令科研人員有誘因選擇性報告同偽造數據。

確保再現

再現危機引起咗科學界嘅廣泛關注。為咗應對呢個問題，科學界開始推行改革措施，例如提倡開放科學、預註冊研究、公開數據同研究方法，以及鼓勵發表再現研究嘅結果^[6]。呢啲努力旨在想提升科研嘅透明度同可靠度，重建公眾對科學嘅信任^[7][8]。

有研究者指出，為咗確保研究結果達致可再現，做科研嘅人可以採取多項嚴謹嘅措施。​首先，研究設計要事先清晰定義啲變數，同時盡可能控制混淆變數，而且樣本應該要充足，減少隨機誤差嘅影響。^[9][10][11]

原則上，做科研嘅人應該要詳細記錄低自己嘅研究方法，包括係用咗咩樣本、抽樣方法係乜、樣本特性、以及係量度方法呀噉，並且寫論文發表研究結果嗰陣如實將一切稟報晒出嚟，防止選擇性報告研究結果^{[註 4]}，增加研究嘅透明度。噉就可以確保啲同行可以睇自己嘅報告嘗試返做，有助科學界檢驗研究結果係咪做到再現。

睇埋

• 科學方法
• 可否證度
• 實驗
• 發表偏差

註釋

1. 喺社會科學上，因為人類同社會本質上係高度複雜嘅，結果好難百分百一樣，所以社會科學家比較追求結果相似多過結果完全一樣。
2. 但係齋靠再現，未必一定達致可靠。可以睇睇充分條件同必要條件嘅概念。
3. 喺二十一世紀初嘅學術界，偽造數據係嚴重嘅行為過失，一個人偽造數據畀人揭發，可以完全摧毀自己嘅科研事業。
4. 可以睇睇 p-hack 嘅概念。