Жаночая зборная Нямеччыны па баскетболе

Жаночая зборная Нямеччыны па баскетболе — нацыянальная каманда, якая прадстаўляе Нямеччыну на міжнародных баскетбольных турнірах. Кіруецца Нямецкім баскетбольным зьвязам.

Нямеччына Deutsche Basketballnationalmannschaft der Damen
Асноўныя зьвесткі
Рэйтынг ФІБА	13 (9 лютага 2025)
Чалец ФІБА з	1954
Рэгіён ФІБА	Эўропа
Фэдэрацыя	Нямецкі баскетбольны зьвяз
Трэнэр
Алімпійскія гульні
Удзелаў	1
Мэдалёў	0
Чэмпіянаты сьвету
Удзелаў	2
Мэдалёў	0
Чэмпіянаты Эўропы
Удзелаў	17
Мэдалёў	Бронза: (1997)
Форма
Сьветлая Цёмная
Спасылкі
Вэб-старонка
(абнаўленьне: 29 чэрвеня 2025)

Гісторыя

Першы ўдзел нямецкай жаночай каманды на чэмпіянаце Эўропы адбыўся ў Бялградзе ў 1954 годзе^[1]. Нямеччына саступіла зборным Югаславіі (14:69), СССР (11:106) і Італіі (35:60). Немкі прайгралі таксама зборнай Аўстрыі зь лікам 25:33, але перамаглі зборную Даніі зь лікам 33:21. У выніку дружына заняла перадапошняе дзявятае месца ў спаборніцтвах^[2]. Праз два гады нямецкія жанчыны занялі 15-е месца, якое зноў было перадапошнім, на наступным чэмпіянаце Эўропы. Наступныя чэмпіянаты Эўропы гуляліся без удзелу нямецкай зборнай. Але немкі бралі ўдзел у чэмпіянаце Эўропы 1966 году, які ладзіўся ў Будапэшце. У турніры яны занялі апошняе 12-е месца, а жаночая зборная Ўсходняй Нямеччыны тым часам здабыла бронзавыя мэдалі. Праз два гады сытуацыя з камандай Заходняй Нямеччыны паўтарылася, то бок дружына фінішавала на апошнім месцы. У 1970-я гады рабілася тое самае, калі немкі і кваліфікаваліся на турнір, яны звычайна занімалі апошнія месцы. Апошні ўдзел у чэмпіянаце Эўропы перад аб’яднаньнем Нямеччыны адбыўся ў 1983 годзе.

Каманда ў 2022 годзе.

Пасьля дванаццацігадовага перапынку жаночая зборная ўзяла ўдзел у чэмпіянаце Эўропы 1995 году ў Брно, заняўшы апошняе дзявятае месца ў заліку. Нечаканым аказаўся выступ немак на чэмпіянаце Эўропы 1997 годзе ў Вугоршчыне. Зборная прасунулася да паўфіналу, дзе саступіла зборнай Летувы толькі ў авэртайме зь лікам 77:78. У матчы за трэцяе месца дружына выгуляла гаспадынь зь лікам 86:61 і здабыла бронзавыя мэдалі. Немка Марліз Аскамп была названая самай каштоўнай гульчыхай турніру. Але гэты посьпех застаўся выключэньнем. На сваім першым чэмпіянаце сьвету 1998 году на радзіме зборная заняла 11-е месца пры 16 краінах-удзельніц. На чэмпіянаце Эўропы 1999 году ў Польшчы немкі былі дванаццатымі, то бок фінішавалі апошнімі. У 2001 і 2003 гадах каманда прапусьціла турніры, а ў Турэччыне ў 2005 годзе былі перадапошнімі. На чэмпіянаце Эўропы 2007 году ў Італіі яны выйшлі ў папярэдні раўнд пасьля перамог над зборнай Румыніі і паразаў ад зборных Бэльгіі і Летувы. Немкі нечакана перамаглі дзейных чэмпіёнак з зборнай Чэхіі, але пасьля шэрагу паразаў фінішавалі на 11-м радку. Каманда згуляла на эўрапейскім чэмпіянаце ў 2011 годзе, але наступнага ўдзел давялося чакаць ажно да 2023 году. Немкі дакрочылі да чвэрцьфіналу, дзе зазналі паразу ад зборнай Гішпаніі зь лікам 42:67^[3]. На летніх Алімпійскіх гульнях 2024 году немкі трапілі ў чвэрцьфінал, дзе прайгралі гаспадыням турніру зборнай Францыі зь лікам 71:84^[4].