Мікалай Таўцігерд

Мікалай Таўцігерд (памёр па 1434) — дзяржаўны дзяяч Вялікага Княства Літоўскага, староста майшагольскі (1434). На Гарадзельскай уніі атрымаў герб «Дрыя».

Гэтая назва мае некалькі сэнсаў. Калі вас цікавяць іншыя сэнсы, глядзіце таксама Таўцігерд (неадназначнасьць).

Мікалай Таўцігерд
лац. Mikałaj Taŭcigierd / Taŭcihierd

Герб «Дрыя»
Асабістыя зьвесткі
Нарадзіўся	XIV стагодзьдзе
Памёр	па 1434
Дзеці	Андрэй

Меў уладаньні ў Майшагольскай воласьці^[1].

Імя

Асноўны артыкул: Таўцігерд

Тэўтгерда або Тэўтгарда (Teutgerdis, Teutgardis) — імя германскага паходжаньня^[2][3]. Іменная аснова -тэўд- (-дэўт-, -тыд-) (імёны ліцьвінаў Таўдвід, Таўцівіл, Таўтвін; германскія імёны Teutwidis, Theudowills, Teutwin) паходзіць ад гоцкага þiuda^[4], германскага þeudo^[5] 'род, народ'^[6], а аснова -гард- (-герд-, -герт-) (імёны ліцьвінаў Альгерд, Вісігерд, Мундыгерд; германскія імёны Algardus, Wisgeard, Mundgerd) — ад гоцкага gairdan 'падпяразваць' (пераноснае 'ахоўваць'), garda 'агароджа' (пераноснае 'ахова, бясьпека')^[7]. Такім парадкам, імя Таўцігерд азначае «ахова роду»^[3].

Варыянты імя ў гістарычных крыніцах: cum Nicolao Tavtigerd^[8], Nicolaus Tawtigerd^[9], Nicolaum Tawtygerd^[10] (2 кастрычніка 1413 году); Teutigerd Mischegoliensis [tenutarii] (27 лютага 1434 году)^[11][12].

Біяграфія

Зь літоўскага баярскага роду. Упершыню ўпамінаецца ў акце Гарадзельскай уніі (1413 год).

27 лютага 1434 году засьведчыў Гарадзенскую ўмову з Польшчай як староста майшагольскі.

Меў сына Андрэя.