Пясчатка

Пясча́тка^[1] — вёска ў Беларусі, каля ракі Брадцу. Уваходзіць у склад Расьнянскага сельсавету Камянецкага раёну Берасьцейскай вобласьці.

Пясчатка лац. Piasčatka
Краіна:	Беларусь
Вобласьць:	Берасьцейская
Раён:	Камянецкі
Сельсавет:	Расьнянскі
Насельніцтва:	18 чал. (2010)
Часавы пас:	UTC+3
Тэлефонны код:	+375 1631
Паштовы індэкс:	225071
Нумарны знак:	1
Геаграфічныя каардынаты:	52°28′13″ пн. ш. 23°22′23″ у. д.
Пясчатка на мапе Беларусі ± Пясчатка Пясчатка

Гісторыя

Вялікае Княства Літоўскае

Упершыню ўпамінаецца ў рэвізіі Берасьцейскага староства 1566 году пад назвай Пішчанка. Населены пункт уваходзіў у склад Палавецкага войтаўства. Пясчатцы належалі да катэгорыі дзяржаўных (вялікакняскіх) сялянаў.

Пад уладай Расейскай імпэрыі

У выніку трэцяга падзелу Рэчы Паспалітай (1795 год) Пясчатка апынулася ў складзе Расейскай імпэрыі. У сярэдіне ХІХ ст. у складзе маёнтку Полаўцы графа Старжынскага. У вёсцы налічвалася 267 рэвізскіх душ.

У другой палове XIX ст. вёска ў Палавецкай воласьці Берасьцейскага павету Гарадзенскай губэрні. У Пясчатцы месьцілася валасная ўправа. Існавала расейская Палавецкая народная вучэльня, дзе нядоўгі час працаваў настаўнікам Макар Ігнатоўскі — бацька беларускага грамадзкага і палітычнага дзеяча, гісторыка, першага прэзыдэнта Акадэміі навук Беларусі Ўсевалада Ігнатоўскага.

Найноўшы час

25 сакавіка 1918 году згодна з Трэцяй Устаўной граматай Пясчатка абвяшчалася часткай Беларускай Народнай Рэспублікі. 1 студзеня 1919 году ў адпаведнасьці з пастановай І зьезду КП(б) Беларусі яна ўвайшла ў склад Беларускай ССР, у Берасьцейскі павет («падраён») Баранавіцкага раёну^[2]. Паводле Рыскай мірнай дамовы 1921 году Пясчатка апынулася ў складзе міжваеннай Польскай Рэспублікі, у Палавецкай гміне Берасьцейскага павету Палескага ваяводзтва. У міжваенны пэрыяд населены пункт меў афіцыйную назву Пясчатка Палавецкая. У 1928 годзе Палавецкую гміну скасавалі: вёску Пясчатку перадалі ў склад Вярховіцкай гміны.

У 1939 годзе Пясчатка ўвайшла ў БССР, з 1940 году ў Галянскім сельсавеце Кляшчэльскага раёну Берасьцейскай вобласьці. У нямецка-савецкую вайну нямецкія акупанты загубілі 10 жыхароў вёскі. У 1945—1948 гадох паселішча знаходзілася ў складзе Польшчы. Пясчатку вярнулі БССР у выніку ўдакладненьня савецка-польскай дзяржаўнай граніцы. З 1954 году вёска ў складзе Расьнянскага сельсавету, з 1962 году 1962 году ў Камянецкім раёне.

Насельніцтва

• 1897 год — 391 чалавек
• 1905 год — 468 чалавек
• 1923 год — 96 чалавек
• 1940 год — 378 чалавек
• 1999 год — 25 чалавек
• 2010 год — 18 чалавек