Станіслаў Казімер Радзівіл

Станіслаў Казімер Радзівіл (1648 — 8 сьнежня 1690) — дзяржаўны дзяяч Вялікага Княства Літоўскага. Стольнік (1670—1680) і маршалак вялікі літоўскі (з 1680).

Гэтая назва мае некалькі сэнсаў. Калі вас цікавяць іншыя сэнсы, глядзіце таксама Станіслаў Радзівіл (неадназначнасьць).

Станіслаў Казімер Радзівіл
лац. Stanisłaŭ Kazimier Radzivił

Станіслаў Казімер Радзівіл
Герб Трубы
Асабістыя зьвесткі
Нарадзіўся	1648[1][2][3][…]
Памёр	8 сьнежня 1690(1690-12-08)[3][4]
Род	Радзівілы
Бацькі	Міхал Караль Радзівіл Ізабэла Кацярына з Сапегаў
Жонка	Марыя Кацярына дэ Бецюн

Валодаў Ішкальдзю, Лысіцай, Лахвай, Чучэвічамі і часткай Нягневічаў у Наваградзкім павеце, а таксама часткай Налібакаў у Менскім павеце ды іншым. Ардынат на Клецку (1683)^[5].

Біяграфія

Марыя Кацярына дэ Бецюн

Зь нясьвіскай лініі роду Радзівілаў, сын Міхала Караля, падчашага вялікага літоўскага, і Ізабэлы Кацярыны з Сапегаў.

Навучаўся ў Нясьвіжы, Ліёне, вандраваў у Францыю, Ангельшчыну, Галяндыю, Італію.

Быў генэралам гвардыі Яго Каралеўскай Мосьці, дэлегатам на соймах 1664—1665, 1670, 1678—1679 гадоў. У 1670 годзе атрымаў урад стольніка вялікага літоўскага, у 1680 годзе — маршалка вялікага літоўскага.

Заснаваў кляштар дамініканаў у Клецку.

21 траўня 1690 году ажаніўся з францускай маркізай Марыяй Кацярынай (1677—1721), дачкой францускага амбасадара маркіза Франсуа Гастона дэ Бецюна (1638—1692) і Людвікі Марыі дэ Лагранж д’Арк’ен (каля 1638—1728), пляменьніцы каралевы і вялікай княгіні Марыі Казімеры Сабескай. Шлюб быў бязьдзетным.

З прычыны браку нашчадкаў па ягонай сьмерці Клецкая ардынацыя перайшла да ардыната на Нясьвіжы Дамініка Мікалая Радзівіла^[6].

Галерэя

• Іканаграфія Станіслава Казімера Радзівіла
• 
  Невядомы мастак, 1730 г.
• 
  З альбома «Выявы роду Радзівілаў». Г. Ляйбовіч, 1758 г.
• 
  М. Старкман, 1857 г.

У картцы да артыкула прыводзіцца партрэт, напісаны каля 1733 году невядомым мастаком, зь Нясьвіскай партрэтнай галерэі, які цяпер захоўваецца ў Нацыянальным мастацкім музэі Беларусі.