Гарнастаевічы

Гарнаста́евічы^[1] (трансліт.: Harnastajevičy, руск.: Горностаевичи) — вёска ў Свіслацкім раёне Гродзенскай вобласці Рэспублікі Беларусь. Уваходзіць у склад Поразаўскага сельсавета.

Вёска Гарнастаевічы Краіна Беларусь Вобласць Гродзенская Раён Свіслацкі Сельсавет Поразаўскі Каардынаты 52°59′07″ пн. ш. 24°23′25″ у. д.HGЯO Насельніцтва ▼161 чал. (2019) Часавы пояс UTC+3 Тэлефонны код +375 1513 Паштовыя індэксы 231973 Аўтамабільны код 4 СААТА 4252857041 Гарнастаевічы на карце Беларусі ±

Гарнастаевічы на Вікісховішчы

Геаграфія

За 0,8 км на ўсход — паўночны ўсход ад вёскі знаходзіцца Гарнастаевіцкае радовішча пясчана-жвіровага матэрыялу і жвірыстых пяскоў^[2]. Паклад у выглядзе дзвюх раз’яднаных лінз звязаны з канцова-марэннымі адкладамі сожскага зледзянення. Ва ўскрышы супескі, дробныя пяскі; падсцілаюць паклад грубыя супескі і дробныя пяскі.

Гісторыя

У першай палове XVII ст. вёска належала шляхецкаму роду Ляцкіх і ўваходзіла ў склад Ваўкавыскага павета Вялікага Княства Літоўскага. Ад мінскага кашталяна Яна Альфонса Ляцкага (памёр у 1646 г.) вёска перайшла ў якасці пасагу да берасцейскага ваяводы Тэафіла Трызны (памёр у 1645 г.), які ажаніўся з дачкой Яна Альфонса Ляцкага — Ізабэлай^[3]. Невядома, каму вёска належала пазней.

У сярэдзіне XVIII ст. вёска становіцца ўласнасцю шляхецкага роду Бутаўт-Андрайковічаў. Пасля трэцяга падзелу Рэчы Паспалітай вёска ўвайшла ў склад Ваўкавыскага павета Слонімскай губерні, а пазней Літоўскай губерні і Гродзенскай губерні (Расійская Імперыя).

У другой палове XIX ст. вёскай валодае Яраслаў Бутаўт-Андрайковіч, ад якога вёска пераходзіць у валоданне яго дачкі — дваранкі-мастачкі Марыі Магдалены Бутаўт-Андрайковіч (1852—1933).

Паводле Рыжскага мірнага дагавора (1921) вёска ўвайшла ў склад міваеннай Польшчы — у склад Беластоцкага ваяводства. Па прычыне таго, што Марыя Магдалена Бутаўт-Андрайковіч не мела мужа і дзяцей, яна запісала па тэстаменту свой маёнтак Гарнастаевічы свайму сваяку Генрыху Канстанціну Бутаўт-Андрайковічу (1882—1941), які і стаў апошнім уласнікам маёнтка Гарнастаевічы (аж да пачатку Другой сусветнай вайны)^[3]. Генрых Канстанцін Бутаўт-Андрайковіч (1882—1941) быў жанаты з Геленай Стафановіч (1887—1960)

• 
  Царква ў пач. XX ст.
• 
  Сядзіба, гаспадарчая пабудова. Пач. XX ст.
• 
  Сядзібны дом. Пач. XX ст.

Пасля далучэння Заходняй Беларусі ў склад БССР, маёнтак Гарнастаевічы быў нацыялізаваны, а яе ўласнік Генрых Канстанцін Бутаўт-Андрайковічу (1882—1941) быў арыштаваны ў 1939 г. савецкай уладай і памёр у Мінску (сталіцы БССР)^[3].

У 1967—1977 гадах цэнтр Гарнастаевіцкага сельсавета^[4]. Да 18 кастрычніка 2013 года вёска знаходзілася ў адміністрацыйным падпарадкаванні Поразаўскага пассавета^[5].

Цяпер вёска ўваходзіць у склад Поразаўскага сельсавета Свіслацкага раёна Гродзенскай вобласці Рэспублікі Беларусь.

Славутасці

Свята-Петра-Паўлаўская царква

Рака Рось у парку

• Сядзібна-паркавы ансамбль Бутаўт-Андрайковічаў
• Свята-Петра-Паўлаўская царква (1801)

Вядомыя асобы

• Віктар Аляксандравіч Сняжыцкі (нар. 1959) — беларускі кардыёлаг і дзяржаўны дзеяч.