Кіпарысавік

Кіпарысавік, Ілжэкіпарыс^[2][3] (Chamaecýparis) — род голанасенных хвойных раслін сямейства кіпарысавыя (Cupressaceae).

Кіпарысавік
Кіпарысавік гароханосны (Chamaecyparis pisifera), Японія
Навуковая класіфікацыя
Дамен:  Эўкарыёты Царства:  Расліны Аддзел:  Хвойныя Клас:  Хвойныя Парадак:  Хвоі Сямейства:  Кіпарысавыя Род:  Кіпарысавік
Міжнародная навуковая назва
Chamaecyparis Spach, 1841[1]
Сістэматыка на Віківідах Выявы на Вікісховішчы ITIS   18045 NCBI   13414 EOL   34226 IPNI   11633-1

Апісанне

Вечназялёныя аднадомныя кусты або дрэвы вышынёй да 70 м і дыяметрам ствала да 3,5 м. Працягласць жыцця да 600 і больш гадоў. Каранёвая сістэма добра развітая. Крона конусападобная або пірамідальная, звычайна з паніклай верхавінай. Парасткі падоўжаныя, часцей пляскатыя. Лісце накрыж супраціўнае, простае, суцэльнае, суцэльнакраёвае, да 4 мм даўжынёй, дарослае лісце лускападобнае, ювенільнае — часта іголкападобнае. Пыленне ўвесну. Мужчынскія шышкі дробныя, прадаўгаватыя, даўжынёй 2–4 мм, чырванаватыя або жаўтаватыя. Спелыя жаночыя шышкі акруглыя, да 12 мм у дыяметры, з 4–5 (6) парамі шчытападобных супраціўных лускавінак. Шышкі спачатку зялёныя, пры выспяванні бурыя або фіялетавыя, спеюць восенню ў год апылення. Пасля выспявання ападаюць цалкам. Насенне пляскатае, з двума крыламі.

Галіна Chamaecyparis pisifera.

Вонкава расліна нагадвае кіпарыс, адрозніваецца ад яго больш сплошчанымі галінкамі і больш дробнымі шышкамі, якія спеюць за год.

Пашырэнне

Радзіма — Усходняя Азія і Паўночная Амерыка. Налічвае 5–6 відаў, распаўсюджаных пераважна ва ўмераных і субтрапічных шыротах прыбярэжных рэгіёнаў ЗША, Японіі, Кітая.

Шырока культывуюцца ў розных рэгіёнах зямнога шара. Большасць відаў марозаўстойлівыя. У Беларусі дзікарослых прадстаўнікоў роду няма, інтрадукаваны 4 віды. Найбольш распаўсюджаны ў культуры кіпарысавік Лаўсана і кіпарысавік гарохаплодны, якія маюць вялікую колькасць сартоў (больш за 700), што адрозніваюцца памерамі раслін, формай кроны, афарбоўкай лісця.

Віды

Паводле базы даных The Plant List (на ліпень 2016) род уключае 5 відаў^[4]:

• Chamaecyparis formosensis Matsum.
• Chamaecyparis lawsoniana (A.Murray) Parl. — Кіпарысавік Лаўзона
• Chamaecyparis obtusa (Siebold & Zucc.) Endl.
• Chamaecyparis pisifera (Siebold & Zucc.) Endl. — Кіпарысавік гароханосны
• Chamaecyparis thyoides (L.) Britton et al. typus^[5]

Да кіпарысавікаў таксама адносілі

• Chamaecyparis hodginsii (Dunn) Rushforth, які традыцыйна вылучаецца ў асобны род род Fokienia.

Выкарыстанне

У культуры з XVIII стагоддзя. Ценевынослівы, вільгацелюбівы, патрабавальны да ўрадлівасці глебы, дрэнна пераносіць засуху, умерана зімаўстойлівы, сярэднеўстойлівы да гарадскіх умоў, устойлівы да шкоднікаў і хвароб, добра пераносіць стрыжку, лёгка размнажаецца чаранкаваннем.

Драўніна лёгкая, жоўтая або светла-карычневая, духмяная, устойлівая да гніення, шырока прымяняецца ў будаўніцтве, лесаразвядзенні, парфумерыі, аздабленні будынкаў, суднабудаванні, для вырабу мэблі і розных прадметаў быту. Каштоўная дэкаратыўная расліна. Выкарыстоўваецца ў народнай медыцыне.