Магілёўскі мясакамбінат

«Магілёўскі мясакамбіна́т» — дзяржаўнае мясаперапрацоўчае прадпрыемства Беларусі, заснаванае ў 1905 годзе ў Магілёве ў якасці прыватнай жывёлабойні.

Магілёўскі мясакамбінат
Тып	адкрытае акцыянернае таварыства
Заснаванне	1905
Краіна	Беларусь
Размяшчэнне	Магілёў
Адрас	Кастрычніцкі раён, прасп. Дзімітрава, д. 11[1]
Ключавыя постаці	Сяргей Любянкоў, Андрэй Дрэнь[2]
Галіна	прамысловасць
Прадукцыя	каўбаса, пельмені, сардэлькі, сасіскі, стэйкі і фарш з кураціны, ялавічыны і свініны
Абарот	▼1125,340 млрд рублёў[3] (2015 г.; $69,236 млн)[4]
Аперацыйны прыбытак	▼4,085 млрд руб (2015 год; $251,3 тыс.)
Чысты прыбытак	▲1,029 млрд руб (2015 год; $63,3 тыс.)
Колькасць супрацоўнікаў	1048 (2016 год)
Дэвіз	У мясе нашым сіла Ваша
Матчына кампанія	ДА «Мясамалпрам»
Сайт	mogmk.by

На 2019 год прадпрыемства выпускала мясныя вырабы пад 2 беларускамоўнымі таварнымі знакамі: уласным «Гурмістр»^[5] і сумесным «Панскія прысмакі» з ТАА «Міт Вялес Груп»^[6]. Фірмовы гандаль налічваў 18 уласных крам — 7 у Магілёве, 3 у Шклове і па 1 у Віцебску, Мінску, а таксама ў іншых 5 гарадах Магілёўскай вобласці: Бабруйску, Горках, Кіраўску, Круглым і Крычаве^[7]. Гандлёвыя прадстаўніцтвы дзейнічалі ў 4 з 6 абласцей Беларусі — Бабруйску (Магілёўская вобласць), Брэсце, Віцебску і Мінску^[8]. У Маскоўскай вобласці Расіі працавалі 2 замежныя дылеры: ТАА «Міт Вялес Груп» (Каралёў) для збыту каўбасы і ТАА «Партнёр-М» (Даўгапрудны) для збыту ялавічыны^[9].

Вырабы

На 2019 год ААТ «Магілёўскі мясакамбінат» вырабляла пад таварнымі знакамі «Гурмістр» і «Панскія прысмакі»:

• стэйкі з ялавічыны і ялавічны язык;
• пельмені з ялавічыны («Сакавітыя новыя»), а таксама з кураціны і свініны;
• варана-вэнджаныя каўбасы (у тым ліку салямі) з кураціны («Браслаўская», «Палескі сервелат»), а таксама з ялавічыны і свініны;
• сардэлькі з кураціны («Траецкія») і ялавічыны («Прэміум»), а таксама са свініны;
• сасіскі з кураціны («Папулярныя») і ялавічыны («Ялавічныя»), а таксама са свініны;
• вараную каўбасу з кураціны («Венская») і ялавічыны («Прэміум»), а таксама са свініны;
• чыпсы з ялавічыны («Святочныя»), а таксама са свініны;
• сыравэнджаныя каўбасы з ялавічыны («Араматная», «Іарданская»), а таксама з кураціны і свініны;
• фарш з ялавічыны і свініны;
• чабурэкі з кураціны, ялавічыны і свініны;
• паўвэнджаныя каўбасы з ялавічыны і свініны;
• сыравяленыя каўбасы з ялавічыны і свініны;
• свіныя зельц, крывяную (кішка) і ліверную каўбасу, рагу, рэбры, сальцісон, студзень, крывяны хлеб і шашлык;
• свіную бужаніну, бекон, грудзінку, каркоўку, карэйку, кумпяк, паляндвіцу, рулет, рульку, руляду, сала, шпік і шынку^[10].

Гісторыя

У 1905 годзе ў Магілёве заснавалі гарадскую жывёлабойню. У 1913 годзе прадпрыемства абсталявалі лёдасаляным халадзільнікам на 5 тон мяса за суткі. У 1922 годзе пабудавалі каўбасны цэх на тону вырабаў за змену. У 1940 годзе перапрацоўвалі па 10 тон мяса і выпускалі 2 тоны каўбасы за змену. У 1953 годзе пабудавалі вытворчы корпус на 20 тон мяса, 5 тон птушкі і 4 тоны каўбасы за змену. Адначасова здалі халадзільнік на 1000 тон адначасовага захоўвання і на 20 тон замарозкі мяса за суткі^[11]. У 1963 годзе дырэктар Магілёўскага мясакамбіната абвясціў загадам 282 вымовы (44% работнікаў), з іх 121 за крадзяжы мясапрадуктаў. На 1 студзеня 1964 года інвентарызацыя выявіла па халадзільніку № 2 недастачу 26,45 тоны мясных вырабаў. У выніку на дзесяцігоддзе прадпрыемства стала атаясамлівацца са злачыннасцю ў мяса-малочнай прамысловасці Беларускай ССР^[12].

У 1965 годзе на Магілёўскім мясакамбінаце адкрылі скуракансервавы цэх. У 1970 годзе магутнасць халадзільніка павялічылі да 3000 тон захоўвання і 100 тон сутачнай замарозкі. Адначасова Магілёўскі мясакамбінат павялічыў магутнасць каўбаснага цэха з 8 да 12 тон за змену. У 1986-м стварылі цэх забою жывёлы і апрацоўкі туш, дзе сталі апрацоўваць звыш 60% сыравіны^[11]. 30 студзеня 2002 года прадпрыемства пераўтварылі ў адкрытае акцыянернае таварыства, якім стаў кіраваць камітэт сельскай гаспадаркі і харчавання Магілёўскага аблвыканкама^[13]. У 2016 годзе Магілёўскі мясакамбінат увёў беларускамоўны таварны знак «Гурмістр»^[14].