ប្រ៊ីក្ស

ប្រ៊ីក្ស គឺជាអង្គការអន្តររដ្ឋាភិបាលមួយដែលមានប្រទេសចំនួនដប់ជាសមាជិក រួមមាន៖​ ចិន ប្រេស៊ីល រុស្ស៊ី អ៊ីរ៉ង់ អាហ្វ្រិកខាងត្បូង អេត្យូពី​ អេមីរ៉ាតអារ៉ាប់រួម អេហ្ស៊ីប ឥណ្ឌា និងឥណ្ឌូណេស៊ី។ វាគឺជាក្រុមយុទ្ធសាស្ត្រ ហើយជាគូប្រជែងនឹងក្រុមប្រទេសកំពូលសេដ្ឋកិច្ចចំនួនប្រាំពីរ ដែលគេតែងនិយមស្គាល់ថា G7 នោះ។

ប្រ៊ីក្ស
BRICS

មេដឹកនាំនៃបណ្ដាប្រទេសប៊្រីក្សក្នុងឆ្នាំ២០១៩,​ រាប់ពីឆ្វេងទៅស្តាំ៖ ស៊ី ជីនពីង, វ៉្លាឌីមៀរ ពូទីន, ស៊ែរ បុលសូណារ៉ូ, ណារ៉េនដ្រា ម៉ូឌី និងស៊ីរីល រ៉ាម៉ាហ្វូសា
ប្រទេសសមាជិកប៊្រីក្ស   ប្រទេសជាដៃគូប៊្រីក្ស   ប្រទេសជាបេក្ខភាពចូលជាសមាជិកប៊្រីក្ស
អក្សរ​កាត់	ប៊្រីក្ស BRICS
ដាក់ឈ្មោះតាម	តួអក្សរដំបូងនៃឈ្មោះរបស់រដ្ឋជាសមាជិកដើមទាំងប្រាំក្នុងភាសាអង់គ្លេស
អង្គការ​មុន	ប៊្រីក
ស្ថាបនា	១៦ មិថុនា ២០០៩
ទីតាំងស្ថាបនា	យេកាតារីងបួរ,​ រុស្ស៊ី (កិច្ចប្រជុំកំពូលប៊្រីកលើកទី១)
ប្រភេទ	អង្គការអន្តររដ្ឋាភិបាល
គោល​បំណង	សេដ្ឋកិច្ច និងនយោបាយ
វិស័យ	នយោបាយអន្តរជាតិ
សមាជិកភាព (២០២៥)	ចិន  ប្រេស៊ីល  រុស្ស៊ី  អ៊ីរ៉ង់  អាហ្វ្រិកខាងត្បូង  អេត្យូពី  អេមីរ៉ាតអារ៉ាប់រួម  អេហ្ស៊ីប  ឥណ្ឌា  ឥណ្ឌូណេស៊ី
ឈ្មោះពីមុនហៅថា	ប៊្រីក BRIC

ពាក្យថា "ប៊្រីក" (BRIC) ដើមឡើយជាឈ្មោះទុកសម្គាល់ពី​ឱកាស​វិនិយោគថ្មី។^[១] ក្រុមអង្គការមួយនេះក្រោយមកក៏បានវិវត្តទៅជាប្លុកភូមិសាស្ត្រនយោបាយ និងភូមិសាស្ត្រសេដ្ឋកិច្ច^[២] ដោយរដ្ឋាភិបាលនៃប្រទេសសមាជិកនីមួយៗបានចូលជួបប្រជុំគ្នារៀងរាល់ឆ្នាំនៅក្នុងកិច្ចប្រជុំកំពូលផ្លូវការចាប់តាំងពីឆ្នាំ២០០៩ មកដើម្បីសម្របសម្រួលគោលនយោបាយពហុភាគី។ ទំនាក់ទំនងក្នុងចំណោមសមាជិកប៊្រីក្សត្រូវបានធ្វើឡើងជាចម្បងដោយផ្អែកលើការមិនជ្រៀតជ្រែកកិច្ចការផ្ទៃក្នុង សមភាព និងផលប្រយោជន៍រួម។^[៣]

បណ្ដាប្រទេសស្ថាបនិកដូចជា ប្រេស៊ីល រុស្ស៊ី ឥណ្ឌា និងចិនបានរៀបចំកិច្ចប្រជុំកំពូលថ្នាក់ដឹកនាំដំបូងឡើងនៅប្រទេសរុស្ស៊ីក្នុងឆ្នាំ២០០៩ ក្រោមឈ្មោះ ប៊្រីក (BRIC)។ ក្រោយពីបានប្តូរឈ្មោះអង្គការមក BRICS ប្រទេសអាហ្រ្វិកខាងត្បូងក៏បានចូលរួមក្នុងកិច្ចប្រជុំកំពូលជាលើកដំបូងរបស់ខ្លួនក្នុងនាមជាសមាជិកថ្មីនៅក្នុងឆ្នាំ២០១១ ក្រោយពីបានក្លាយជាសមាជិកផ្លូវការនៅក្នុងឆ្នាំ២០១០។^[៤][៥] បន្ទាប់មក ប្រទេសអ៊ីរ៉ង់ អេហ្ស៊ីប អេត្យូពី និងអេមីរ៉ាតអារ៉ាប់រួមក៏បានចូលរួមក្នុងកិច្ចប្រជុំកំពូលលើកដំបូងរបស់ពួកគេក្នុងនាមជារដ្ឋសមាជិកថ្មីថ្មោងនៅក្នុងកិច្ចប្រជុំកំពូលឆ្នាំ២០២៤ នៅឯប្រទេសរុស្ស៊ី។ អក្សរកាត់ថា BRICS+ ត្រូវបានប្រើប្រាស់ក្រៅផ្លូវការដើម្បីឆ្លុះបញ្ចាំងពីសមាជិកភាពថ្មីៗក្នុងរយៈពេលប៉ុន្មានឆ្នាំចុងក្រោយនេះ។^[២] ឥណ្ឌូណេស៊ីបានក្លាយជាសមាជិកថ្មីបំផុតនៃអង្គការមួយនេះ។^[៦]

ស្ថាប័នប៊្រីក្សត្រូវ​បាន​គេ​ចាត់​ទុកថាជាគូប្រជែង ឬជម្រើស​មួយ​ផ្សេងទៀតក្រៅពី​​ប្លុក G7 ដែល​ជាប្លុក​សេដ្ឋកិច្ច​កំពូលមួយ។^[២] ជារួម ប៊្រីក្សបានអនុវត្តគំនិតផ្តួចផ្តើមជាច្រើនដូចជា ធនាគារអភិវឌ្ឍន៍ថ្មី កិច្ចសម្របសម្រួលបម្រុងសមាយាតប៊្រីក្ស ប៊្រីក្សផេ ប្រកាសនវត្ថុស្ថិតិរួមប៊្រីក្ស^[៧] និងកញ្ចប់រូបិយវត្ដុបម្រុងប៊្រីក្ស។^[៨] ប៊្រីក្សធ្លាប់និងត្រូវបានទទួលទាំងការកោតសរសើរ និងការរិះគន់ពីអ្នកអត្ថាធិប្បាយ និងព្រមទាំងថ្នាក់ដឹកនាំនៃប្រទេសមួយចំនួនជុំវិញពិភពលោក។^{[៩][១០][១១][១២][១៣]}