Островско Езеро

Островско Езеро (грчки: Βεγορίτιδα, Вегоритида) — езеро во Егејска Македонија, денес во Грција, дел од групата на Егејските езера. Понекогаш се среќава и под името Свети Панталејмон.

Островско Езеро Βεγορίτιδα
Карта на Островското и Петерското Езеро
Координати	40.75°N 21.78°E / 40.75; 21.78
Сливни земји	Грција
Најг. должина	14,8 км
Најг. ширина	6,9 км
Површина	&1000000000000543100000054,31 км2
Најг. длабочина	70 м
Надм. височина	543 м
Населени места	Острово, Пателе

Рибари во Островско Езеро за време на Првата светска војна.

Езерото зафаќа дел од териториите на Леринскиот и Постолскиот округ. Во североисточниот дел на Островската Котлина меѓу планините Ниџе на север и Каракамен на југ. Надморска му висина изнесува 543 м. Тоа е едно од најдлабоките езера во Грција (70 метри). Тоа е долго 15, а широко 7 километри,^[1] но неговата површина е многу намалена по изградбата на две хидроцентрали кај Суровичево и Теово, така што денес неговиот југозападен дел е наполно пресушен. Езерото се полни од Петерското Езеро, западно од него, како и од реките Биралска, Ословска и Делова (Аспропотамос) и некои други помали рекички.

Езерското подрачје има повеќе населени места кои припаѓаат на општините Воден и Суровичево. Покрај градот Острово (Арниса) и селото Чеган од неговата северна страна, по крајбрежјето се сместени селото Пателе (Агиос Пантелејмонас) од западната и селата Коларица (Мањаки), Уклемеш (Фаранги) и Кочана (Переја) од источната страна.

Фауна

Островското и Петерското Езеро сочинуваат заеднички екосистем, во кој живеат повеќе од 130 видови птици, цицачи како и видри и уникатни видови риби како Coregonus lavaretus. На овој простор е живеалиште и на ретки и загрозени видови птици.

Тука се гнездат:

• ноќна чапја (Nycticorax nycticorax)
• жолта (гривеста) чапја (Ardeola ralloides)
• мала бела (сребреникава) чапја (Egretta garzetta)

Пошироко кај езерото исто така гнездат:

• мал воден бик (Ixobrychus minutus)
• мал корморан (Phalacrocorax pygmeus)
• египетски (бел) мршојадец (Neophron percnopterus)
• орел змијар (Circaetus gallicus)
• блатна еја (Circus aeruginosus)
• ливадска еја (Circus pygargus)
• лисест (белоопашест) глувчар (Buteo rufinus)
• златен (скалест) орел (Aquila chrysaetos)
• речна рибарка (Sterna hirundo)

Можат да се забележат и:

• белоопашест орел (Haliaeetus albicilla)

Меѓу водните птици можат да се видат:

• цуцулест нуркач (Podiceps cristatus)
• патка превез (Netta rufina)
• лиска (Fulica atra)

Надворешни врски

„Островско Езеро“ на Ризницата ?

• Слика на Островското и Петерското Езеро Архивирано на 28 септември 2007 г.
• Слика на Островското езеро и Острово Архивирано на 28 септември 2007 г.
• Слика на Островското езеро и село Чеган Архивирано на 28 септември 2007 г.
• Слики на Островското Езеро Архивирано на 14 март 2007 г.
• Авионски слики на Островското Езеро Архивирано на 27 септември 2007 г.