Tim nazzjonali tal-futbol tal-Ukrajna

It-tim nazzjonali tal-futbol tal-Ukrajna (bl-Ukren: Збірна України з футболу) jirrappreżenta lill-Ukrajna fil-futbol internazzjonali u hu mmexxi mill-Assoċjazzjoni tal-Futbol tal-Ukrajna.

Ukrajna

Psewdonimu	Синьо-жовті (Il-Koħol u s-Sofor) Збірна (It-Tim Nazzjonali)
Assoċjazzjoni	Assoċjazzjoni tal-Futbol tal-Ukrajna
Konfederazzjoni	UEFA (Ewropa)
Kowċ	Oleksandr Petrakov
Kaptan	Andriy Yarmolenko
Rekord ta' preżenzi	Anatoliy Tymoshchuk (144)[a]
Rekord ta' gowls	Andriy Shevchenko (48)
Kodiċi tal-FIFA	UKR
L-ewwel kulur It-tieni kulur
Klassifika tal-FIFA
Pożizzjoni attwali	27 (Awwissu 2022)
L-ogħla	11 (Frar 2007)
L-inqas	132 (Settembru 1993)
L-ewwel logħba
Ukrajna 1–3 Ungerija  (Uzhhorod, Ukrajna; 29 ta' April 1992)
L-ikbar rebħa
Ukrajna 9–0 San Marino  (Lviv, Ukrajna; 6 ta' Settembru 2013)
L-ikbar telfa
Franza 7–1 Ukrajna (Saint-Denis, Franza; 7 ta' Ottubru 2020)
Tazza tad-Dinja
Preżenzi	1 (l-ewwel fl-2006)
L-aqwa riżultat	Kwarti tal-finali (2006)
Kampjonati Ewropej
Preżenzi	3 (l-ewwel fl-2012)
L-aqwa riżultat	Kwarti tal-finali (2020)

It-tim sar membru tal-UEFA u l-FIFA fl-1992 wara l-qsim tal-Unjoni Sovjetika.^[2] Huma lagħbu l-ewwel logħba tagħhom fid-29 ta' April 1992 kontra l-Ungerija u fit-Tazza tad-Dinja tal-2006 għamlu d-debutt tagħhom f'kompetizzjoni maġġuri. Sitt snin wara ospitaw il-Kampjonati Ewropej tal-2012.^[2]

Storja

Wara x-xoljiment tal-Unjoni Sovjetika, it-tim nazzjonali Ukren lagħab l-ewwel logħba uffiċjali fid-29 ta' April 1992 kontra l-Ungerija f'telfa ta' 3–1. Għal-logħba l-Ukrajna kienet nieqsa kemm mill-preparazzjoni, hekk kif iltaqgħu fis-27 ta' April u vvjaġġaw l-għada għall-belt ta' Uzhhorod, kif ukoll minn plejers ta' esperjenza li kienu qegħdin jilgħabu mal-Komunità tal-Istati Indipendenti f'logħba ta' ħbiberija kontra l-Ingilterra ġewwa Moska.^[3][4]

Qabel it-twelid tat-tim nazzjonali proprju, ħafna plejers Ukreni kienu pedini importanti fit-tim tal-Unjoni Sovjetika li ħalla figura tajba fit-Tazza tad-Dinja tal-1986 u fil-Kampjonati Ewropej tal-1988. Sebgħa mill-ħdax li lagħbu il-finali tal-Kampjonati Ewropej kienu Ukreni. Ħafna minn dawn il-plejers għażlu li jirrapreżentaw lir-Russja minflok art twelidhom hekk kif il-FIFA għażlet lir-Russja bħala l-werrieta tat-tim nazzjonali Sovjetiku.

Minkejja l-abbandun ta' diversi plejers Sovjetiċi b'oriġini Ukreni, id-disgħinijiet kien perjodu tajjeb. Dan deher l-aktar fil-produzzjoni ta' plejers bħal Anatoliy Tymoshchuk u Andriy Voronin, kif ukoll talenti mill-mixtla ta' Dynamo Kyiv, fosthom Andriy Shevchenko, wieħed mill-aktar attakkanti ta' stoffa ta' dak iż-żmien u li iktar tard sar kaptan u emblema tat-tim. Għal tliet drabi in fila, bejn l-1998 u l-2002, it-tim Ukren naqas li jagħmilha għat-Tazza tad-Dinja u l-Kampjonati Ewropej wara telfiet fl-aħħar logħob ta' spareġġ wara li kienu spiċċaw it-tieni fil-grupp ta' kwalifikazzjoni.

Għall-fażi ta' kwalifikazzjoni tat-Tazza tad-Dinja tal-2006, l-Assoċjazzjoni Ukrena ħatret lil Oleg Blokhin bħala l-kowċ nazzjonali. Huma spiċċaw l-ewwel fil-grupp quddiem il-Greċja (ċampjin Ewropew attwali), it-Turkija u d-Danimarka b'telfa waħda minn tnax-il logħba. Din kienet l-ewwel kwalifikazzjoni tagħhom għat-Tazza tad-Dinja, iggwidati mill-istilla u rebbieħ tal-Ballun tad-Deheb Andriy Shevchenko li skorja sitt gowls fi tmintax-il logħba. Fit-turnew li sar fil-Ġermanja huma kienu fi grupp ma' Spanja, it-Tuneżija u l-Arabja Sawdija. Wara telfa ta' 4–0 fl-ewwel logħba kontra Spanja, l-Ukreni rrispondew fil-logħbiet l-oħra b'żewġ rebħiet. Fir-rawnd tal-aħħar sittax, huma affaċċjaw lill-Iżvizzera. Il-logħba marret għall-ħin barrani u l-Ukreni ħarġu rebbieħa wara l-għoti tal-penalties grazzi għas-salvataġġi ta' Oleksandr Shovkovsky. Fil-kwarti tal-finali, l-Ukrajna sabet lill-Italja li ttrijonfat b'rebħa ta' 3–0 u baqgħet sejra biex tirbaħ it-turnew.

Andriy Shevchenko jiċċelebra wieħed mill-gowls fir-rebħa kontra l-Iżvezja fil-Kampjonati Ewropej tal-2012.

L-Ukrajna kellha tistenna sal-Kampjonati Ewropej tal-2012 biex tieħu sehem għal darb'oħra f'kompetizzjoni maġġuri u dan seħħ minħabba li kienet pajjiż ospitu flimkien ma' Polonja.^[2] Fl-ewwel logħba, l-Ukrajna rebħet lill-Iżvezja b'doppjetta ta' Shevchenko, madanakollu ġiet eliminata wara żewġ telfiet kontra Franza u l-Ingilterra.^[5]

Għat-Tazza tad-Dinja tal-2014, l-Ukrajna reġgħet sofriet disfatta fil-play-offs hekk kif minkejja li kienet rebħet l-ewwel leg kontra Franza bl-iskor ta' 2–0, il-Franċiżi rrispondew ġewwa darhom b'rebħa ta' 3–0. Fil-Kampjonati Ewropej ta' sentejn wara, l-Ukrajna reġgħet kisbet post fil-play-offs wara li temmet l-impenji tal-kwalifikazzjoni fit-tielet post. Din id-darba rebħet l-ispareġġ kontra s-Slovenja, però l-prestazzjoni fil-fażi finali kienet diżappuntanti: wara żewġ telfiet kontra l-Ġermanja u l-Irlanda ta' Fuq, l-Ukreni kienu l-ewwel mill-eliminati. L-aħħar logħba kontra l-Polonja kienet mitlufa wkoll biex għalqu l-avventura tagħhom mingħajr punti u mingħajr gowl wieħed.

F'Lulju tal-2016 Shevchenko ġie maħtur kowċ tat-tim nazzjonali.^[6] Għat-Tazza tad-Dinja tal-2018 li kienet se ssir fil-pajjiż ġirien tar-Russja, l-Ukreni kienu fi triq tal-kwalifikazzjoni, imma żewġ telfiet fl-aħħar tliet logħbiet kontra l-Iżlanda u l-Kroazja tefgħuhom fit-tielet post u barra mill-postijiet ta' kwalifikazzjoni.^[7] Fil-Kampjonati Ewropej tal-2020, li saru fl-2021 minħabba l-pandemija tal-COVID-19, wara l-kwalifikazzjoni bħala l-ewwel fil-grupp, huma rebħu logħba waħda minn tlieta fil-grupp tal-fażi finali. It-tliet punti kienu biżżejjed biex jgħaddu għar-rawnd ta' wara minħabba li l-Ukrajna kienet ir-raba' l-aqwa tim mis-sitta li spiċċaw it-tielet fil-gruppi. Din kienet l-ewwel darba li qabżu l-gruppi fil-Kampjonati Ewropej. Fl-aħħar sittax huma għelbu lill-Iżvezja 2–1 fil-ħin barrani grazzi għall-gowl tar-rebħa ta' Artem Dovbyk, però ġew eliminati mill-Ingilttera fil-kwarti tal-finali, li xorta jibqa' l-aqwa riżultat għall-Ukrajna f'din il-kompetizzjoni.^[8]

Rekord kompetittiv

Tazza tad-Dinja

Sena	Fażi	Pożizzjoni	L	R	D	T	GF	GK
Mill-1930 sal-1990 kienu parti mill-Unjoni Sovjetika
1994	Mhux ammessi[b]
1998	Ma kkwalifikawx
2002
2006	Kwarti tal-finali	8	5	2	1	2	5	7
2010	Ma kkwalifikawx
2014
2018
2022
2026
Total	Kwarti tal-finali	1/8	5	2	1	2	5	7

Kampjonati Ewropej

Sena	Fażi	Pożizzjoni	L	R	D	T	GF	GK
Mill-1930 sal-1992 kienu parti mill-Unjoni Sovjetika u l-Komunità tal-Istati Indipendenti
1996	Ma kkwalifikawx
2000
2004
2008
2012	Fażi tal-gruppi	12	3	1	0	2	2	4
2016		24	3	0	0	3	0	5
2020	Kwarti tal-finali	8	5	2	0	3	6	10
2024
Total	Kwarti tal-finali	3/8	11	3	0	8	8	19

Rekords tal-plejers

L-aktar preżenzi

Anatoliy Tymoshchuk u Andriy Shevchenko huma l-plejers bl-aktar preżenzi u gowls rispettivament bil-flokk tat-tim nazzjonali Ukren.

Andriy Shevchenko fl-okkażjoni tal-mitt logħba tiegħu mal-Ukrajna fl-2010.

Poż.	Plejer	Preżenzi	Gowls	Perjodu
1	Anatoliy Tymoshchuk[a]	144	4	2000–2016
2	Andriy Shevchenko	111	48	1995–2012
3	Andriy Yarmolenko	109	45	2009–
4	Andriy Pyatov	102	0	2007–2022
5	Ruslan Rotan	100	8	2003–2018
6	Oleh Husyev	98	13	2003–2016
7	Oleksandr Shovkovskyi	92	0	1994–2012
8	Yevhen Konoplyanka	86	21	2010–
9	Serhiy Rebrov	75	15	1992–2006
10	Andriy Voronin	74	8	2002–2012

L-aktar gowls

Poż.	Plejer	Gowls	Preżenzi	Perjodu
1	Andriy Shevchenko	48	111	1995–2012
2	Andriy Yarmolenko	45	109	2009–
3	Yevhen Konoplyanka	21	86	2010–
4	Serhiy Rebrov	15	75	1992–2006
5	Roman Yaremchuk	13	39	2018–
	Oleh Husyev	13	98	2003–2016
7	Serhiy Nazarenko	12	56	2003–2012
8	Yevhen Seleznyov	11	58	2008–2018
9	Andriy Vorobey	9	68	2000–2008
	Andriy Husin	9	71	1993–2006

Noti

1. Nhar il-11 ta' Marzu 2022, l-Assoċjazzjoni tal-Futbol tal-Ukrajna ħassret il-preżenzi u l-gowls ta' Tymoshchuk mat-tim nazzjonali minħabba li kien irrifjuta li jitkellem kontra l-invażjoni Russa tal-Ukrajna tal-2022.^[1]
2. Il-FIFA għażlet li ma tħallix lit-timijiet nazzjonali tar-repubbliki Sovjetiċi li ma ħadux sehem fil-polza tal-kwalifikazzjoni tat-8 ta' Diċembru 1991 li jipparteċipaw fil-fażi finali.^[9] Proposta mill-Ukrajna sabiex isir kampjonat separat għas-suċċessi Sovjetiċi ġie mblukkat mir-Russja.^[10]