Papa Zakaria

Papa Zakaria alikuwa Papa kuanzia tarehe 3 Desemba 741 hadi kifo chake tarehe 15 Machi 752^[1]. Alitokea Ugiriki^[2] au Santa Severina, Calabria, Italia, labda akiwa na asili ya Balkani.

Mt. Zakaria Papa.

Jina la baba yake lilikuwa Polichronios.

Alimfuata Papa Gregori III akafuatwa na Papa Stefano II^[3].

Anasifiwa sana na wanahistoria mbalimbali kwa jinsi alivyokabili vizuri mazingira magumu na ya hatari^[4], akiongoza familia ya Mungu kwa umakinifu na busara ya hali ya juu ^[5].

Alifaulu kupatana na Walombardi walioteka sehemu kubwa ya Italia^[6] au kupunguza ukali wao, aliwaelekeza Wafaranki namna ya kutawala kwa haki na kumhimiza Pipino Mfupi kujifanya rasmi mfalme wao^[7], alifanya makabila ya Kijerumani yawe na makanisa zaidi, aliunga mkono umisionari wa Bonifas huko Ujerumani^[8], alidumisha umoja na Kanisa la Mashariki, alipinga sera ya kaisari Konstantino V dhidi ya picha takatifu^[7], alidhibiti mwelekeo wa kutunga majina kwa malaika^[9] na alikataza biashara ya watumwa mjini Roma akiwakomboa waliokwisha kuletwa^[6][10][11].

Tangu kale anaheshimiwa na Wakatoliki na Waorthodoksi kama mtakatifu.

Sikukuu yake huadhimishwa tarehe 15 Machi^[12].

Tazama pia

• Watakatifu wa Agano la Kale
• Orodha ya Watakatifu Wakristo
• Orodha ya Watakatifu wa Afrika
• Orodha ya Watakatifu Wafransisko
• Orodha ya Mapapa

Maandishi yake

• Barua na hati zake zilitolewa na Jacques Paul Migne katika Patrologia Latina lxxxix. p. 917–960.