吴越地区

吳越地區，也叫江浙地區。在拉長江下游，主要在拉長江南許，有常時江南也是指迭個一塊地域。歷史浪幾經變遷，但總歸依靠吳語只家生交流，吳越地區乃歇也有處叫「講吳語（吳越語^[1]）個地區」 ^{徽語包屬問題，請看吳語}。

吳越大致輪廓

地理概念

弗同個時期，吳越個概念也是有著眼變化個。在拉老早個春秋搭秦漢伊歇，吳越個地理範圍一般搭江東重合；另一方面，閩地伊歇辰光常莊也是劃入吳越個範圍里向。但不過，到吳越國朝後，以及宋朝辰光兩浙路搭江南東路個行政區劃定型，吳越個範圍也逐眼定落來哉。

吳越地區一般性包括整隻浙江省搭上海市，還有江蘇省南部講吳語個地區，主要是蘇錫常地區。除脫常州之外，大部分儕在拉五代十國辰光是吳越國個國土管轄範圍，好講是吳越個核心地區。此外，江西省個上饒地區、福建省個西北部搭仔老早屬江南東路個安徽省長江以南個地區在拉歷史浪也曾經受著過仔吳越文化個影響，屬於廣義浪向個吳越。

南京儘管也屬於江南東路，弗過作為當今頂大個淮語城市，已經弗屬於吳越個範疇哉。長江以北個啟東、海門等地也講吳語。屬於難以推定個範圍。

歷史浪

吳越地區古代長期儕在拉一隻文化區里向。經歷仔先秦辰光個吳國、越國搭楚國、統一個秦漢、三國個東吳、兩晉還有南朝、統一個隋唐、 五代辰光個吳越國、宋朝江南東路搭兩浙路、元朝江浙行省等，江浙人還一淘創造仔輝煌個吳越文化，拿江南建設成東亞支那大陸浪向頂繁華個地區。

吳越地區在拉歷史浪長期屬於同一個政區管轄。秦時屬於會稽郡（治吳縣）搭鄣郡（漢時改為丹陽郡）。朝後因為人口增長，到東漢個辰光拿原來個會稽郡拆分為吳郡搭會稽郡，分別治吳（蘇州）跟山陰（紹興）。東吳個辰光又設立仔吳興郡（治今湖州）。乃麼吳郡、會稽郡搭吳興郡合稱「三吳」。貞觀時里，天下分成功仔十道，吳越地區劃歸江南道。開元年間因為江南道轄區忒大，劃分在拉江南東道，江南西道還有黔中道，吳越地區搭福建地區同屬江南東道；朝後貤拆分成功浙江東道搭浙江西道。五代十國是吳越國統治兩浙地區。宋滅脫仔吳越以後，在拉吳越國個土地浪設立兩浙路，南宋個辰光分置成功兩浙東路搭兩浙西路。蒙元辰光，置立仔江浙行省。明朝時里，江浙行省個蘇南皖南部分劃畀拉南直隸，長^[2]落來各府置立浙江省。

文化傳統

吳語是吳越地區個通用語言。吳越地區自古文化發達，歷史浪文化燦爛，人才輩出，產生仔大量個名士大儒。江浙民風細膩，溫潤，靈秀，是歷史浪有名個才子佳人產地，也從來一向是經濟搭文化儕交關發達個地區。

吳越地區個民眾多篤信佛教，自古就有「東南佛國」個美譽。個咾，吳越地區名山寶剎也交關多，比較有名個寺廟有杭州個靈隱寺、蘇州個寒山寺搭仔西園寺、湖州個法華寺、常州個天寧寺咾啥。四大佛山當中個普陀山也在拉吳越地區個舟山。

上古個吳越地區，「斷髮文身、魚食飯稻」，剛猛尚武。隋唐以來，吳越地區個民風由尚武轉向仔崇文。吳越自古文人輩出，是古代狀元搭進士產生頂多個地方，也是今朝出產兩院院士頂多個場許。

文化遺產

• 評彈
• 崑曲
• 越劇
• 蘇州園林
• 江南水鄉
• 江南絲竹
• 吳歌

內部連結

• 江蘇: 具體是江蘇長江南面個蘇州、無錫、常州搭鎮江南京個吳語部分。
• 上海：全境
• 浙江：全境
• 安徽：南面個涇縣、徽州等地
• 江西：東面個上饒地區
• 福建：浦城