无锡市
中国江苏省个地级市 From Wikipedia, the free encyclopedia
Remove ads
無錫（無錫閑話：vu sik [vu][siɪʔ]）勒垃長江三角洲長江対仔太湖當中個走廊部分，北遏長江，南控太湖，東面是蘇州，西面帖隔壁是常州，北面江對過是泰州市所管轄個靖江市；遠開上海128公里，搭浙江省交界，去南京183公里。
無錫是江南文明個發源地，也是吳文化個發源地，有文字記載個歷史就好倒退到商朝末年。1981年，國務院拿無錫市列垃全國十五個經濟中心城市裡向，也是頭一批國務院批准個13個較大個市之一，有地方立法權；無錫還是中華人民共和國歷史文化名城搭1998年國家旅遊局評定個第一批優秀旅遊城市[2][3]。1983年3月，實行市管縣體制，原蘇州地區個無錫縣、江陰縣搭原屬鎮江地區個宜興縣劃畀無錫市，也就是現在無錫市個範圍。無錫是上海大都市圈搭蘇錫常都市圈個中心城市之一，是中國民族工業搭仔鄉鎮工業個搖籃、蘇南模式個發祥地，聯勤保障部隊無錫聯勤保障中心駐地。
無錫市境內主要是平原，間花里花分布有低山、殘丘。南部是水網平原；北部是高沙平原；無錫個中部是低地墾成功個水網圩田；西南部地勢比較高，是宜興個低山搭丘陵地區。宜興地區山體儕作東西方向延伸，絕對高度500米以上，頂高峰是黃塔頂，海拔611.5米。錫山、江陰搭市區個山丘總體浪呈北東、北東東走向，高度由西南望東北逐級下降。頂高峰是惠山個三茅峰，海拔328.98米。
無錫是全國重要個旅遊城市、國家歷史文化名城，市里向有太湖黿頭渚、靈山大佛、拈花灣、無錫中視影視基地、蠡湖公園、崇安寺、惠山古鎮、錫惠名勝區等景點。從無錫走出過像顧愷之、倪雲林、錢穆、錢鍾書等名流，也有寄暢園、蠡園、黿頭渚等作代表個古今有名個園林。
Remove ads
歷史
商末，周太王個大兒子泰伯來到箇埭，建立吳國，定都無錫梅里（今梅村），泰伯帶來個中原文明同長江下游太湖流域個江南文化融合。漢高祖時期設置無錫。
史前到春秋戰國
無錫先民個原始文化好倒退到約六七千年前個馬家浜文化、崧澤文化搭良渚文化個長江文明。鴻聲彭祖墩、新瀆廟墩、葛埭橋庵基墩搭玉祁蘆花蕩等地，儕發現原始氏族個聚居點。
無錫勒垃商末有文字記錄，諸侯周太王個大兒子泰伯、二兒子仲雍為咾拿王位讓畀三兒子季歷，從陝西歧山向南跑，泰伯選擇蹲拉梅里，也就是現在無錫梅村，入鄉隨俗，斷髮文身。泰伯傳播先進文化技術，百姓尊奉伊為君主，自號「句吳」。周滅商，因泰伯嘸沒兒子，周武王追封仲雍個五世孫周章做吳君，正式建立吳國。無錫也故咾成為吳文化個發源地。
公元前473年，越國勾踐滅脫吳國。戰國時代，越國畀楚國滅脫。公元前248年，楚春申君黃歇封拉江東吳地，營建舊吳故地，修復舊吳墟作郡邑，箇也是無錫龜背形舊城成型個原因。
秦漢到唐宋
秦，無錫屬會稽郡。漢高祖五年（公元前202年）始置無錫縣；王莽時期曾改名有錫。隋、唐時期，開鑿大運河，無錫逐漸變成江南農產品、紡織品通望全國個中心。
箇段辰光，無錫成為了江南重要個經濟城市。唐、宋兩代，無錫儕畀望縣管拉，宋朝個辰光城裡向「四方商賈咸輦貨來市」。
元、明、清
元貞元年 （1295年），朝廷設立無錫州，箇個辰光個無錫已經是「浙右名邑之冠」。明朝，無錫發展迅速，叫「米碼頭」、「布碼頭」。明中後期，江南一帶歡喜文章、歡喜學習，出現像王紱、計六奇、邵寶等有名氣個文人。無錫還是銅活字印刷術搭崑曲個重要發源地之一。明末，顧憲成重修東林書院，勒垃箇面談論國事，叫東林黨。
清朝雍正二年，無錫縣拆成無錫、金匱兩個縣、勒垃同一座城裡向管理。中後期，無錫依靠地理優勢，絲綢業高速發展，變成功江蘇省最大個產絲縣。原設垃上海個漕糧局遷到無錫，指定無錫作江蘇個漕糧轉運站。1888年到1911年，無錫是江浙兩省個漕運中心，年承辦漕糧超過130萬石。通過辦漕，確立無錫四大米市之一個地位，促進糧行業個發展，也推動無錫社會經濟個繁榮。
清末，農民起義多，尤其是太平天國，讓城裡向居民死傷過半，全城房屋幾乎儕打攤掉。
清末民初
1906年，滬寧鐵路滬錫段完工，無錫火車站營業，運河為主個漕運逐漸畀海運搭鐵路取代。但因為上海地價、工資忒高，一些民族企業家去地價、工資較便宜、工業原料豐富、交通運輸發達、資金周轉較方便個無錫造廠。1894年，無錫個楊氏家族開辦業勤紗廠，是無錫第一家現代化機器織布廠，也標誌無錫近代工業開始興起搭發展。隨後，榮氏、薛氏、唐氏、周氏等地方望族先後勒垃無錫開辦現代化工廠，無錫逐漸成為江南地區新個經濟中心城市，也是中國近現代民族工商業個搖籃。
正是經濟個繁榮搭社會個變革，無錫個現代思想啓蒙運動先進。1898年，裘廷梁、裘梅呂（女）叔侄創辦中國第一張白話報刊《無錫白話報》，其後，楊蔭杭、吳稚暉、秦毓鎏等革命反清事業里向個中堅力量。
國民辰光
1911年秋，辛亥；箇年11月16號，無錫宣告光復。第二年，中華民國成立，無錫、金匱兩縣合併成無錫縣，蘇常道管拉。辛亥革命以後，無錫工業化水平快速增長，從1910年到1919年，工廠由11家增至78家。
1927年3月22號，國民革命北伐軍到無錫，廢脫道治，歸江蘇省直屬。1934年起，國民政府勒垃無錫設第二行政專員公署，管理原先蘇常道個範圍。
黃金十年裡向，無錫高速發展，特謂是工商業，到1932年，無錫有170多家工廠，勞動工人超過6萬人，資本額達1,400－1,500萬元。當中棉紡織業規模最大，排拉第二個是麵粉工業，傳統個無錫米市勒垃工業化以後好每天生產26萬包麵粉，排拉上海、哈爾濱後頭，全國第3。商業方面，有貨棧9個，商店1,661家，幾百個市鎮。伊個辰光有流行曲《無錫景》，叫無錫「小上海」，上海還有「無錫人掌工商業，寧波人掌金融業」個民間言語。
建國之後
改革開放以來，無錫經濟因鄉鎮民營企業個發展而復甦。工業園區個開發吸引大規模個海外投資，無錫變成現代工業城市，經常勒城市綜合競爭力排行榜搭投資環境排行榜上名列前茅。
Remove ads
地理搭氣候
無錫勒垃長江三角洲，主要是平原，夾花里分布有低山、殘丘，地勢弗高。太湖平原是一個碟子樣個窪地，海拔一般3．5米以下，最低個地方海拔弗足2米；海灣式湖濱低山丘陵個地方，多丘陵、干地、山區；宜興市則是宜溧山地，有低山搭丘陵，最高個地方是勒垃南面個黃塔頂（611.5米），天目山個余脈，蘇南第一峰、江蘇省第二高峰。整個無錫總體浪河網密布、水美土肥、物產豐富，典型個江南水鄉。
無錫屬海洋性亞熱帶季風氣候，溫和濕潤，四季分明，年平均氣溫15.5 °C。雨量充沛，雨季較長，主要集中拉六月，市區年平均降雨量為1048毫米。全年無霜期有220天左右，市區日照時數為2019.4個鐘頭。一年裡向頂頂熱個辰光是7月，月平均氣溫28.0 °C；頂頂冷個辰光是1月，月平均氣溫2.8 °C。
交通
.JPG)
無錫市地理位置優越，勒垃滬寧線浪，老發頭裡是交通要道，伊水運個歷史悠久，好數到泰伯奔吳後鑿個伯瀆河。京杭大運河橫穿無錫，水運交通便當。現在，無錫境內有多條高速公路、國道、高鐵；市里向，國際機場、港口、地鐵等立體交通網絡優秀，是華東地區主要個一隻區域中心城市。
公路
無錫是國家公路運輸樞紐城市之一，有寧杭、沿江、滬寧等9條高速公路搭多條國、省道。
公路客運方面，2011年，無錫市拿長途汽車站合併拉一道，同無錫站北廣場（城際高鐵站）連拉一道，同無錫站南廣場、公交系統、地鐵形成大型交通中心區，叫中央車站。
無錫市里向快速路網弗小，包括快速內環、快速中環、鳳翔路高架、江海西路高架、通江大道、金城路高架、機場路高架、蠡湖大道、太湖大道等等。下屬縣級市宜興市有得直達無錫個宜馬快速通道搭仔正在快速化改造個范蠡大道，未來還會得建設宜興快速交通體系；江陰市里向有芙蓉大道等快速路，目前也勒拉規劃建設江陰市里向個快速路網體系。
航空
無錫碩放機場勒拉中國江蘇省無錫市新吳區碩放街道東南部，是一個軍民兩用機場。無錫地鐵3號線經過機場還有站頭，江蘇省第二大機場。
2024年12月14號，碩放機場年客流量突破1000萬人次，變成江蘇省第二家年客流量超過1000萬人次個機場。同時，無錫碩放機場關於新造第二跑道搭一跑道延長、還有新建T3航站樓、綜合交通樞紐等內容個總規修編方案得到民航局批覆。[4]
碼頭
無錫內河航運從漕運演變過來。現在伊依靠京杭大運河、蕪申運河、太湖等水系，到2013年年底，已建成航道總里程達1,577.97公里，等級航道里程476.89公里，一年四季儕好通船。
作為內河港口個無錫港是中國28個主要內河港之一[5]，由無錫（江陰）港搭無錫內河港組成[6]。
江陰港作為無錫地區唯一個出海通道，是國家一類對外開放口岸，遠開無錫市區38公里。箇面貼拉長江有約35公里個深水岸線，目前已造好超過43個萬噸級泊位數，是全國第五個億噸級個內河港口，也是長江沿線第四個「百萬標箱」個大港。
鐵路
無錫地區目前有京滬鐵路、滬寧高速鐵路、京滬高速鐵路、寧杭客運專線、新長鐵路搭滬寧沿江高速鐵路，有無錫站（京滬鐵路、滬寧高速鐵路）、無錫東站（京滬高速鐵路）、無錫新區站（滬寧高速鐵路）、惠山站（滬寧高速鐵路）、宜興站（寧杭客運專線）五個客運站點，儕是上海鐵路局管理個，當中無錫站是客貨運特等站。勒拉弗久個未來，泰錫宜城際鐵路搭沿江城際鐵路也會得勒拉無錫個惠山站設站，故咾惠山站也會得擴建[7]。
公共運輸
老底子無錫水網密密麻麻，城裡向路少，老百姓一般性出門乘船、乘轎子或者黃包車，故咾無錫公路運輸服務到1927年才出現頭一家汽車出租商行。1951年，無錫舉辦「蘇南物產交流會」，為咾方便參觀個人，才開闢頭一條市區公共汽車線路。
公共汽車方面，無錫市區有無錫市公交、錫惠公交、新區公交、馬山公交四家獨立運營個公交公司，攏總公交線路約200多條、公共汽車3,000多部。
差頭方面，有4,000多部差頭，乘車起步價統一3公里10元，超出每公里1.9元，算價鈿個辰光還會得算進去等候費等附加費。
在無錫，包括地鐵、公共汽車、計程車、公共腳踏車等公共運輸工具，儕好用無錫市民卡。
軌道交通
無錫地鐵目前有地鐵一號線、二號線、三號線、四號線、S1號線，全長145km公里。規劃中個無錫地鐵將會造9條市區地鐵、2條市域軌道交通，攏總11條線路個軌道交通網。
教育
高等學堂
江南大學 - 無錫學院
- 東南大學無錫校區
- 南京郵電大學無錫校區（規劃建設）
- 南京理工大學江陰校區
- 無錫高等師範學校
- 北京大學軟體與微電子學院
- 另外無錫市內還有超算中心、702研究所、微電子研究所等科研基地搭南京信息工程大學無錫研究院、復旦大學無錫研究院、華中科技大學無錫研究院、華中科技大學無錫研究院等等弗少大學研究院
- 專科教育方面，無錫擁有無錫職業技術學院、無錫南洋職業技術學院、江蘇信息職業技術學院、無錫科技職業學院、無錫商業職業技術學院、無錫工藝職業技術學院、無錫城市職業技術學院等一批專科學堂
高中
天一中學 - 無錫市第一中學
- 無錫市輔仁高級中學
- 江蘇省梅村高級中學
- 無錫市第三高級中學
- 無錫市第一女子中學
- 無錫市市北高級中學
- 江蘇省錫山高級中學
- 無錫市第六高級中學
- 無錫市公益中學
- 江蘇省南菁高級中學
- 江蘇省宜興中學
- 無錫市大橋實驗學校
醫院
無錫醫學歷史悠久。目前，無錫全市夯吧啷噹有一爿醫學院（江南大學附屬醫學院）搭著十家市立醫院、210家醫院，當中三級甲等醫院總共有十四爿。
- 無錫市人民醫院
- 無錫市第二人民醫院（南北院區）
- 江南大學附屬醫院（原三院四院，目前是南北院區，其中原四院即北院區未來計劃改擴建）
- 無錫市第五人民醫院
- 無錫市第七人民醫院
- 無錫市第九人民醫院
- 無錫市中醫院
- 無錫市婦幼保健中心
- 無錫市兒童醫院
- 解放軍904聯勤總院
- 江陰市人民醫院
- 江陰市中醫院
- 宜興市人民醫院
- 宜興市中醫院
宗教
佛教
- 崇安寺
- 惠山寺
- 南禪寺
- 祥符禪寺
- 大覺寺
- 靈山
- 梅園開原寺
道教
- 雷尊道院
- 水仙道院
伊斯蘭教
- 清真寺
天主教
- 三里橋若瑟堂
基督新教
- 無錫市基督教堂
文化
.jpg)
吳文化
無錫勒拉吳文化個當中位置，千年來，勒拉吳文化個浸育下頭，故咾城市風格鮮明，勒拉風土人情當中。無錫菜是明顯個甜糯風味江南菜、清雅個錫劇也透露出敏銳果敢個工商文化；亦有好用來吟風頌月個古典園林，也有譽為「小上海」個雄心；箇些固有文化老早變成代代無錫人價值觀搭生活方式所在。
無錫個公共文化場從民國開始。1912年開個無錫圖書館是中國最早創建個公立圖書館之一；1929年，無錫縣教育局勒拉孔廟個基礎浪設立歷史博物館，是無錫第一家公共博物館。只弗過，箇家博物館個文物勒拉抗戰里向儕弄壞脫，只挺碑刻個遺蹟，故咾現在改成無錫市碑刻陳列館。1958年，勒拉惠山寺出土個文物基礎上，設立無錫市博物館。2007年，拿原無錫市博物館、無錫革命陳列館搭無錫科普館合併起來，新造只無錫博物院，伊是江蘇省除脫南京博物院外唯一一個地級市博物院。
無錫市里向還有代表吳文化標誌個闔閭城遺址博物館、曾排垃全國十大考古新發現個鴻山貴族墓群遺址博物館搭從工業遺址改造來個中國民族工商業博物館、中國絲業博物館等國家級博物館；也有藍印花布博物館、平湖城博物館等交交關關多個民間博物館。
現在生活娛樂豐富化，無錫新造弗少專業美術、書畫、音樂場館。2014年，無錫大劇院畀英國《每日電訊報》文化版評垃「世界上十二座最壯觀個劇院」當中。
飲食
- 陽山水蜜桃
- 大浮楊梅
- 無錫毫茶
- 太湖翠竹
- 宜興陽羨茶
- 宜興百合
Remove ads
風景名勝
歷史名人
無錫歷來人文薈萃、賢能輩出，可謂鍾靈毓秀之地，故名流實在太多嘞。下頭僅僅羅列出些名人個名字。
參考文獻
外部連結
Wikiwand - on
Seamless Wikipedia browsing. On steroids.
Remove ads