邯郸路

邯鄲路是中國上海市虹口區、楊浦區一條東西走向個交通幹道，西起大柏樹立交，東到五角場，西段是楊浦虹口兩區區界，全長2640米，寬34.2米到40米。邯鄲路丄有中環線高架，勒垃復旦大學門前，中環是地道。

復旦大學附近個邯鄲路

歷史

邯鄲路1922年修個，因為伊拿引翔鄉幫殷行鄉連起來，叫翔殷路。1929年改名翔殷西路。侵華日軍佔領個辰光，改名叫明治通，汪精衛政權個辰光改名協和路。1947年，國民政府叫伊魏德邁路，紀念抗日戰爭里向擔任中國戰區美軍司令個魏德邁上將。1950年，上海市人民政府用河北邯鄲拿伊改成邯鄲路。^[1]後來邯鄲路主線成為中環個一部分，地面道路只預留機動車道搭仔行人路，畀復旦大學咾啥個踏腳踏車個人造成困擾。2021年年底，邯鄲路復旦大學門口新增加非機動車道。^[2]

交匯道路

邯鄲路西起大柏樹，是幫逸仙路、汶水東路、中山北一路、曲陽路交匯個路口，東到五角場，是隻四平路、翔殷路、黃興路、淞滬路、邯鄲路個五岔路口。其它幫邯鄲路相交個路有：運光路、松花江路、國權路、國年路、國順路、國達路、國定路、國賓路。