Івацэвічы (футбольны клюб)

«Івацэвічы» — беларускі футбольны клюб з Івацэвічаў. З 2018 году выступае ў Другой лізе чэмпіянату Беларусі. Хатнія матчы клюб ладзіць на стадыёне Кляноўка-Арэна, які быў адкрыты ў 2017 годзе.

Івацэвічы
Поўная назва	па-беларуску: Івацэвічы
Горад	Івацэвічы, Беларусь
Стадыён	Кляноўка-Арэна Умяшчальнасьць: 1052
Чэмпіянат	Другая ліга
· 2022	4 месца (Берасьцейскі дывізіён)

Гісторыя

Клюб быў закладзены ў 2010 годзе. «Івацэвічы» доўгі час выступалі толькі на аматарскім узроўні, беручы ўдзел у першынстве Берасьцейскай вобласьці. У 2011 годзе каманда была першай у зоне «Усход», але ў фінальных матчах саступіла. У 2016 годзе ў Кубку Рэгіёнаў «Івацэвічы» дасягнулі фіналу, дзе перамаглі «Золак» з Круглага Магілёўскае вобласьці зь лікам 2:0^[1]. Аднак, паводле выраку АБФФ вынікі былі ануляваныя праз удзел у складзе івацэвічцаў Дзьмітра Пятроўскага, які ў свой час меў прафэсійныя кантракты з клюбамі «Слонім», «Хваля» і «Баранавічы»^[2]. Згодна з рэглямэнтам, гульцы, якія калі-кольвек мелі дачыненьне да прафэсійных клюбаў, ня могуць браць удзел у розыгрышах Кубка Рэгіёнаў.

У канцы 2017 году ў горадзе, нарэшце, быў пабудаваны стадыён Кляноўка-Арэна, які дазволіў мясцовай камандзе прымаць гульні рэспубліканскіх спадорніцтваў. У тым ліку дзякуючы гэтаму, кіраўніцтва клюбу пастанавіла заявіцца ў 2018 годзе ў Другую лігу. У красавіку галоўным трэнэрам клюбу стаў Вадзім Бяленка, які да таго ўжо працаваў быў у клюбах «Хваля» і ЮАС, апошні зь якіх здолеў прасунуць у Першую лігу за год да далучэньня да «Івацэвічаў»^[3]. Клюб адразу стаў паказваць неблагія вынікі, фінішаваўшы ў 2018 і 2019 гадах на 5 і 7 радку адпаведна. Пасьля аб’яданьня абласных чэмпіянатаў з Другой лігай «Івацэвічы» двойчы прасоўваліся ў фінальны этап Берасьцейскага дывізіёну, але двойчы ім бракавала прасунуцца далей у плэй-оф лігі.

У чэрвені 2023 году клюб у розыгрышы Кубка Беларусі здолеў выбіць першалігавую «Воршу», дзякуючы чаму ўпершыню дасягнуў 1/16 фіналу^[4]. Тым ня менш, у наступным раўндзе «Івацэвічы» саступілі з буйнім лікам 1:6 салігорскаму «Шахцёру».

Статыстыка

Чэмпіянат і Кубак Беларусі

Сэзон	Ліга	Месца	Г	В	Н	П	РМ	Пкт	Кубак
2017									1/32
2018	Другая	7	28	11	6	11	46–45	39	1/64
2019	Другая	5	28	15	2	11	59–44	47	1/32
2020	Другая — група А	7	20	8	2	10	42–52	26	1/64
	Другая — за 13 месца	13	2	1	0	1	9–8
2021	Другая — Берасьцейскі (захад)	2	14	11	1	2	62–15	34	1/32
	Другая — Берасьцейскі (плэй-оф)	4	6	1	1	4	5–16	4
2022	Другая — Берасьцейскі (захад)	2	10	6	1	3	26–15	19	1/64
	Другая — Берасьцейскі (плэй-оф)	4	10	4	1	5	16–24	13
2023	Другая — Берасьцейскі (захад)								1/16

Галоўныя трэнэры

• Вадзім Бяленка (2018—2019)^[5]
• Дзьмітры Абакумаў (2019—2020)
• Дзьмітры Мілеўскі (з 2020 году)