Савушкін прадукт

«Савушкін прадукт»^[4] (рас. Савушкин продукт) — найбольшае прыватнае малочнае прадпрыемства Беларусі, заснаванае ў Берасьці ў сьнежні 1976 году ў якасьці дзяржаўнага камбінату.

«Савушкін прадукт»
Тып	адкрытае акцыянэрнае таварыства
Заснаваная	30 сьнежня 1976 (48 гадоў таму)[1]
Краіна	Беларусь
Разьмяшчэньне	Берасьце, вул. Янкі Купалы, д. 118
Ключавыя фігуры	Аляксандар Машэнскі, Аляксандар Саўчыц
Галіна	прамысловасьць
Прадукцыя	ёгурт, кефір, малако, масла, пражанка, сьмятана, спрэд, сыракваша, сыр і тварог
Абарачэньне	▼6411,108 млрд рублёў[2] (2015 г.; $394,442 млн)[3]
Апэрацыйны прыбытак	▼13,989 млрд руб (2015 г.; $0,861 млн)
Чысты прыбытак	▼1,47 млрд руб (2015 г.; $0,09 млн)
Лік супрацоўнікаў	2720 (2016 г.)
savushkin.by/by

На 2018 год ААТ «Савачкаў прадукт» выпускала 10 відаў малочных вырабаў — ёгурты, кефір, малако, масла, пражанку, сьмятану, спрэд, сыраквашу, сыры і тварог — пад 6 таварнымі знакамі: «Аптымаль» (ёгурты), «Берасьце-Літоўскае», «Ласкавае лета», «Савачкаў», «Супэркід» (бел. Звышдзіця) і «Тэас» (грэцкія ёгурты)^[5]. Таксама пад таварным знакам «Сапраўдны» выраблялі морсы, нэктары і сокі.

У 2017 годзе стаў фігурантам скандалу праз прынцыповую адмову ад ужываньня беларускай мовы на сваёй прадукцыі^[6].

Прадстаўніцтвы

На 2018 год ААТ «Савачкаў прадукт» мела прадстаўніцтвы ў ва ўсіх 6 абласьцях Беларусі: Пінск (Берасьцейская вобласьць), Віцебск (Бешанковіцкая шаша, д. 44), Горадня (вул. Гаспадарчая, д. 29), Гомель (вул. Магілёўская, д. 7а), Магілёў (вул. Алтайская, д. 22а) і вёска Каралішчавічы (Менскі раён)^[7]. За мяжой працавала 18 прадстаўніцтваў у 10 краінах:

• 7 краінах Азіі — Аб’яднаныя Арабскія Эміраты (Дубай), Азэрбайджан (Баку), Армэнія (Ерэван), Казахстан (Актаў, Алматы і Атыраў), Кітай (Ганконг і Чжэнчжоў у правінцыі Хэнань), Сынгапур (Усходняя вобласьць, акруга Бэдок, Прыбярэжны гасьцінец, д. 26) і Ярданія (акруга Даліна архідэяў, Аманская вобласьць);
• 3 краінах Эўропы — Малдова (Кішынёў), Расея (6: Бранск, Калінінград, Масква, Санкт-Пецярбург і Смаленск) і Эстонія (Талін)^[8].

Мінуўшчына

У сьнежні 1976 году заснавалі Берасьцейскі малаказавод, які ў 1977 годзе пераўтварылі ў камбінат. У 1979 годзе прадпрыемства перапрацоўвала 560 тонаў малака за содні. У 1994 годзе прадпрыемства прыватызавалі ў выглядзе ААТ. У 2001 годзе малочныя вырабы пачалі выпускаць пад таварным знакам «Савачкаў прадукт». У 2005 годзе ААТ «Берасьцейскі малочны камбінат» зьмяніла назву на «Савачкаў прадукт» і прыдбала сельскую гаспадарку «Олтуш» у Маларыцкім раёне. У 2006 годзе беларускі прадпрымальнік Аляксандар Машэнскі набыў 75% ААТ «Савачкаў прадукт». Рэшта акцыяў засталася ва ўрада Беларусі і 55 калгаспаў, якія пастаўлялі малако на завод. Машэнскі павяліў долю прадпрыемства на расейскім рынку, што зрабіла малаказавод найбольшым вытворцам малочных вырабаў у Беларусі. У 2009 г. да ААТ «Савачкаў прадукт» далучылі малочныя вытворчасьці ў Пінску і Століне (Берасьцейская вобласьць). У 2011 годзе абарачэньне ААТ «Савачкаў прадукт» склала каля $250 млн. Пагатоў 90% экспарту прыпала на Расею^[9].

1 ліпеня 2012 году ААТ «Савачкаў прадукт» атрымала дазвол на збыт харчаваньня ў Эўрапейскім Зьвязе пасьля праверак бясьпечнасьці сваіх вырабаў^[10]. 13 студзеня 2014 году прадпрыемства зьмяніла назву свайго таварнага знака з «Савачкаў прадукт» на «Савачкаў» (рас. Савушкин)^[11]. На травень 2014 году прадпрыемства мела падразьдзяленьні ў 3-х гарадах Берасьцейскай вобласьці — Камянцы, Пінску і Століне — і фэрму ў Маларыцкім раёне. Сукупны аб’ём перапрацоўкі малака складаў 1500 тонаў за содні^[1]. У 2015 годзе за мяжу прадалі звыш 60% вырабаў прадпрыемства. Сыравіну перапрацоўвалі закрытым спосабам без кантакту з чалавекам і паветрам. Найбольш працяглы тэрмін захоўваньня (6 месяцаў) мела ўльтрапастэрызаване малако («элітная апрацоўка»), якое награвалі да +137°C^[12].

Да сьнежня 2016 году перапрацоўчая магутнасьць ААТ «Савачкаў прадукт» вырасла да 4000 тонаў малака і 2500 тонаў сыроваткі за содні. Штодзень выраблялі 100 тонаў сокаў і 1000 тонаў малочных вырабаў, зь іх 100 тонаў сухой сыроваткі, 70 тонаў сыроў і 25 тонаў масла. Абарачэньне за 2016 год склала 750 млн дэмінаваных рублёў ($375 млн). У 2016 годзе ААТ «Савачкаў прадукт» стала 3-м па велічыні падаткаплатнікам Берасьцейскай вобласьці^[13]. Пагатоў продажы за мяжой перавысілі ў 2016 годзе $210 млн^[14]. 27 кастрычніка 2017 году абноўлены вэб-сайт ААТ «Савачкаў прадукт» займеў беларускамоўную вэрсію^[15].

Кіраўнікі

• Аляксандар Саўчыц (з 1998 году)^[1]